सोमवार, 9 नोव्हेंबर 2026
Egypt Train Crash: इजिप्तमध्ये भीषण रेल्वे अपघात! उभ्या ट्रेनला मागून धडक; ७ ठार तर १०० हून अधिक प्रवासी जखमी ( फोटो सौजन्य : सोशल मीडिया )
इजिप्तची (Egypt Train Crash) राजधानी कैरोच्या दक्षिणेला वसलेल्या गिझा गव्हर्नरेटमध्ये रविवारी एक अत्यंत काळीज पिळवटून टाकणारा रेल्वे अपघात घडला आहे. एकाच रुळावर उभ्या असलेल्या प्रवाशांनी भरलेल्या ट्रेनला मागून येणाऱ्या दुसऱ्या भरधाव ट्रेनने जोरदार धडक दिली. ही टक्कर इतकी भीषण होती की, ट्रेनचे अनेक डब्बे रुळावरून घसरले आणि त्यांचा चक्काचूर झाला. या दुर्घटनेत ट्रेन ऑपरेटरसह किमान ७ प्रवाशांचा जागीच मृत्यू झाला असून १०० हून अधिक जण गंभीर जखमी झाले आहेत. अपघाताचे भयानक फोटो आणि व्हिडिओ सोशल मीडियावर समोर आल्यानंतर जगभरातून हळहळ व्यक्त केली जात आहे.
मिळालेल्या अधिकृत माहितीनुसार, हा दुर्दैवी अपघात कैरो शहरापासून सुमारे ५२ किलोमीटर अंतरावर असलेल्या गिझा गव्हर्नरेटमधील अल-अय्यात (El Ayyat) परिसरात घडला. नैऋत्येकडील फयूम गव्हर्नरेटच्या (Faiyum) दिशेने जाणारी ट्रेन आपल्या निर्धारित मार्गाने प्रवास करत होती. याच दरम्यान, दक्षिणेकडे अस्वानच्या (Aswan) दिशेने जाणारी एक दुसरी ट्रेन रुळावर थांबलेली होती.
जागतिक घडामोडी संबंधित बातम्या वाचण्यासाठी येथे क्लिक करा : Pakistan : पाकिस्तानात दिवाळीच्या दिवशी हिंदूंचे कौतुक; पंतप्रधान शाहबाज शरीफ यांनी जिनांचा उल्लेख करत केला मोठा दावा
फयूमकडे जाणाऱ्या ट्रेनच्या चालकाचे नियंत्रण सुटल्याने किंवा सिग्नल यंत्रणेतील त्रुटीमुळे ही ट्रेन थेट उभ्या असलेल्या कैरो-अस्वान ट्रेनच्या शेवटच्या डब्यावर जाऊन आदळली. दोन्ही गाड्यांचा वेग आणि धडक इतकी जोरदार होती की, धडकेच्या आवाजाने संपूर्ण परिसर हादरून गेला. स्थानिक नागरिकांनी दिलेल्या माहितीनुसार, अपघातानंतर लगेचच भीषण किंकाळ्या आणि आक्रोशाचा आवाज ऐकू आला.
अपघात घडताच स्थानिक ग्रामस्थ आणि प्रत्यक्षदर्शी तात्काळ मदतीसाठी घटनास्थळी धावले. अल-अय्यातमधील काफर गिरजा येथील रहिवासी आयमान जमाल यांनी मीडियाला दिलेल्या माहितीनुसार, अपघाताची माहिती मिळताच स्थानिक लोकांनी कोणतीही वेळ न गमावता ढिगाऱ्याखाली अडकलेल्या लोकांना बाहेर काढण्यास सुरुवात केली.
प्रवाशांना खिडक्या आणि तुटलेल्या डब्यांमधून बाहेर काढत आपत्कालीन वैद्यकीय पथकांना पाचारण करण्यात आले. बचाव पथके आणि सुमारे ७० हून अधिक रुग्णवाहिका घटनास्थळी दाखल होईपर्यंत स्थानिकांनी सुमारे ८० जखमी प्रवाशांना तात्काळ जवळच्या रुग्णालयात हलवण्यास मदत केली. थांबलेल्या ट्रेनच्या शेवटच्या डब्यात काही प्रवासी वाईट रीतीने अडकले होते; दुर्दैवाने, त्यांना बाहेर काढण्यापूर्वीच त्यांचा गुदमरून आणि गंभीर दुखापतींमुळे मृत्यू झाला होता.
जागतिक घडामोडी संबंधित बातम्या वाचण्यासाठी येथे क्लिक करा : Poland : पोलंडमध्ये माथेफिरूचा थरार! 6 जणांची हत्या करून घरात आई-वडिलांनाही उडवले; 2 दिवसांचा राष्ट्रीय शोक जाहीर
या दुर्घटनेची गंभीर दखल घेत इजिप्तचे अध्यक्ष अब्देल-फताह अल-सिसी यांनी सोशल मीडियाद्वारे शोक व्यक्त केला आहे. “अपघातास जबाबदार असणाऱ्या कोणत्याही निष्काळजी कर्मचाऱ्याला किंवा अधिकाऱ्याला पाठीशी घातले जाणार नाही,” असे स्पष्ट करत त्यांनी या दुर्घटनेच्या तात्काळ उच्चस्तरीय तपासाचे निर्देश दिले आहेत.
इजिप्तच्या रेल्वे प्राधिकरणाने (Egyptian Railway Authority) तात्काळ हाय-पॉवर क्रेन आणि आपत्कालीन पथके घटनास्थळी रवाना केली आहेत. अपघातग्रस्त डब्बे रुळावरून हटवून मार्ग मोकळा करण्याचे आणि विस्कळीत झालेली रेल्वे वाहतूक पूर्ववत करण्याचे काम युद्धपातळीवर सुरू आहे. विशेष म्हणजे, याच अल-अय्यात जिल्ह्यात गेल्या सप्टेंबर महिन्यातही दोन मालगाड्यांची धडक होऊन अपघात झाला होता.
Ans: हा अपघात कैरोच्या दक्षिणेला असलेल्या गिझा गव्हर्नरेटमधील अल-अय्यात जिल्ह्यात घडला, जिथे गिझा-फयूम ट्रेनने रुळावर उभ्या असलेल्या कैरो-अस्वान ट्रेनला मागून धडक दिली.
Ans: या अपघातात ट्रेन चालकासह किमान ७ प्रवाशांचा मृत्यू झाला आहे आणि १२५ हून अधिक लोक जखमी झाले आहेत.
Ans: इजिप्तचे अध्यक्ष अब्देल-फताह अल-सिसी यांनी अपघाताची तात्काळ चौकशी करण्याचे आणि निष्काळजीपणासाठी जबाबदार असलेल्यांवर कठोर कारवाई करण्याचे आदेश दिले आहेत.
