War Update : इस्लामाबाद चर्चेचा डाव फसला अन् समुद्रात रणधुमाळी; इराणने पाकिस्ताची केली ‘अशी’ फजिती, सुपरटँकर्सनी…

US-Iran War : इस्लामाबादमधील चर्चा फिसकटल्याने समुद्रात तणाव निर्माण झाला आहे. पाकिस्तानच्या 'शालिमार'सह तीन सुपरटँकर्सनी होर्मुझच्या सामुद्रधुनीत अचानक यू-टर्न घेतल्याने जागतिक चिंता वाढली आहे.

• चर्चा फिसकटली, युद्ध भडकलं
• पाकिस्तानी जहाजाचा यू-टर्न
• राजनैतिक तणाव

Pakistan ship Shalimar U-turn Hormuz : जागतिक राजकारणातून एक अत्यंत भीतीदायक बातमी समोर येत आहे. ज्या शांतता चर्चेकडे संपूर्ण जगाचे डोळे लागले होते, ती इस्लामाबादमधील अमेरिका-इराण चर्चा अखेर फिसकटली आहे. या चर्चेचा फज्जा उडताच त्याचे गंभीर पडसाद आता समुद्रात उमटू लागले आहेत. रविवारी होर्मुझच्या सामुद्रधुनीमध्ये (Strait of Hormuz) अशा काही घडामोडी घडल्या, ज्याने जागतिक तेल बाजारपेठेत आणि सागरी सुरक्षेच्या वर्तुळात मोठी खळबळ उडवून दिली आहे. इराणने हा अत्यंत महत्त्वाचा जलमार्ग बंद करण्याचे संकेत दिले असून, अनेक मोठ्या जहाजांना माघारी फिरावे लागले आहे.

समुद्रात नेमकं काय घडलं? ‘शालिमार’चा तो यू-टर्न!

मिळालेल्या माहितीनुसार, ओमानच्या आखातातून पर्शियन आखाताकडे निघालेले तीन महाकाय तेलवाहू टँकर्स इराणच्या लारक बेटाजवळ पोहोचले होते. या जहाजांना इराणकडून आधीच परवानगी मिळाली होती, मात्र अचानक परिस्थिती बदलली. पाकिस्तानचे ‘शालिमार’ आणि ‘एजियोस फानुरिओस-१’ या दोन टँकर्सनी शेवटच्या क्षणी आपला मार्ग बदलला आणि संयुक्त अरब अमिरातीच्या (UAE) दिशेने माघारी प्रवास सुरू केला. एका बाजूला दोन जहाजांनी माघार घेतली असताना, ‘मोबासा-बी’ हे तिसरे जहाज मात्र इराणच्या मंजूर मार्गाने पुढे जात राहिले. या विसंगतीमुळे आंतरराष्ट्रीय समुदायात चिंतेचे वातावरण आहे.

जागतिक घडामोडी संबंधित बातम्या वाचण्यासाठी येथे क्लिक करा : युद्धाचा बिगुल वाजला! J.D.Vance रिकाम्या हाताने परतले; ‘USS Frank E. Peterson’ आणि ‘USS Michael Murphy’ होर्मुझमध्ये दाखल

पाकिस्तानावरील संताप की अमेरिकेला इशारा?

तज्ञांच्या मते, पाकिस्तानच्या ‘शालिमार’ जहाजाने माघार घेणे हे केवळ तांत्रिक कारण नसून त्यामागे मोठे राजनैतिक राजकारण दडले आहे. याच आठवड्यात शनिवारी पाकिस्तानने सौदी अरेबियाच्या समर्थनार्थ आपली लढाऊ विमाने पाठवली होती. पाकिस्तानचे हे पाऊल इराणला रुचलेले नाही. त्यामुळेच इराणने मुद्दाम पाकिस्तानी जहाजांना रोखले असावे किंवा त्यांना धोक्याचा इशारा दिला असावे, अशी दाट शक्यता वर्तवली जात आहे. इस्लामाबादमधील चर्चा अयशस्वी होणे हे या आगीत तेल ओतण्यासारखे ठरले आहे.

See more

#Iran blocks #Pakistan-bound ship from passing through #StraitofHormuz, course changed to #Mumbaihttps://t.co/SGk7OVljOm — News9 (@News9Tweets) April 7, 2026

credit – social media and Twitter

जागतिक तेल पुरवठ्यावर संकट

होर्मुझची सामुद्रधुनी ही जगातील २०% तेल व्यापाराची जीवनवाहिनी आहे. जर इराणने हा मार्ग पूर्णपणे बंद केला, तर जागतिक स्तरावर इंधनाचे दर गगनाला भिडतील. अमेरिका आणि इराण यांच्यातील १४ दिवसांची शस्त्रसंधी आता संपली असून, दोन्ही बाजू युद्धाच्या पवित्र्यात आहेत. या तणावामुळे सागरी विमा कंपन्यांनी या मार्गावरून जाणाऱ्या जहाजांचे दर वाढवले असून, अनेक कंपन्यांनी आपली जहाजे लांबच्या मार्गाने नेण्याचा निर्णय घेतला आहे.

जागतिक घडामोडी संबंधित बातम्या वाचण्यासाठी येथे क्लिक करा : Peace Failed : महासत्तेचा ‘इगो’ अन् इराणचा ‘स्वाभिमान’! इस्लामाबादमधील शांतता चर्चेचा फज्जा; पाकिस्तानची मोठी प्रतिक्रिया

पुढे काय होणार?

सध्याची परिस्थिती पाहता, आखाती देशांमधील हा संघर्ष आता केवळ दोन देशांपुरता मर्यादित राहिलेला नाही. पाकिस्तानची एन्ट्री आणि सौदीला दिलेली लष्करी मदत यामुळे हे युद्ध अधिक गुंतागुंतीचे झाले आहे. इराणने जर आपली आक्रमक भूमिका कायम ठेवली, तर अमेरिका लवकरच मोठी लष्करी कारवाई करण्याची शक्यता आहे. अशा परिस्थितीत भारतासारख्या देशांची ऊर्जा सुरक्षा टांगणीला लागली आहे. आता संपूर्ण जगाचे लक्ष याकडे आहे की, राजनैतिक मार्ग पुन्हा कधी उघडला जातो की हे वादळ महायुद्धाकडे वळते.