पाकिस्तानच्या माजी उच्चायुक्तांची गरळ! “अमेरिकेने हल्ला केल्यास दिल्ली-मुंबईला उडवू”; अब्दुल बासित यांचे चिथावणीखोर विधान

पाकिस्तानचे माजी उच्चायुक्त अब्दुल बासित यांनी भारताच्या दिल्ली आणि मुंबई शहरांना लक्ष्य करण्याची धमकी दिली आहे. अमेरिकेने पाकिस्तानवर हल्ला केल्यास भारत आमचे पहिले लक्ष्य असेल, असे त्यांनी म्हटले आहे.

• पाकिस्तानच्या माजी उच्चायुक्तांची गरळ!
• “अमेरिकेने हल्ला केल्यास दिल्ली-मुंबईला उडवू”
• अब्दुल बासित यांचे चिथावणीखोर विधान

मध्यपूर्वेतील (Middle East) वाढता तणाव आणि जागतिक भू-राजकीय घडामोडींच्या पार्श्वभूमीवर पाकिस्तानचे माजी उच्चायुक्त अब्दुल बासित यांनी भारताच्या विरोधात पुन्हा एकदा अत्यंत प्रक्षोभक विधान केले आहे. “जर अमेरिकेने कधी पाकिस्तानवर हल्ला केला किंवा आमच्या अण्वस्त्र कार्यक्रमाला लक्ष्य केले, तर प्रत्युत्तर म्हणून भारतावर हल्ला करण्याशिवाय आमच्याकडे कोणताही पर्याय उरणार नाही,” असे बासित यांनी म्हटले आहे. एका पाकिस्तानी वृत्तवाहिनीवरील चर्चेदरम्यान त्यांनी हे चिथावणीखोर विधान केले.

नेमके प्रकरण काय?

अब्दुल बासित यांनी हे विधान अमेरिकेच्या नॅशनल इंटेलिजन्सच्या संचालक तुलसी गॅबार्ड यांनी व्यक्त केलेल्या चिंतेनंतर केले आहे. गॅबार्ड यांनी पाकिस्तानच्या लांब पल्ल्याच्या बॅलिस्टिक क्षेपणास्त्र कार्यक्रमावर प्रश्नचिन्ह उपस्थित केले होते. त्यावर एका पाकिस्तानी टीव्ही चॅनेलने बासित यांना ‘सर्वात वाईट परिस्थिती’ (Worst Case Scenario) विचारली असता, त्यांनी थेट भारताच्या दिल्ली आणि मुंबई या शहरांना लक्ष्य करण्याची धमकी दिली.

See more

“If America attacks Pakistan, we’ll nuke India. Our missiles may not reach America but we’ll destroy Delhi & Mumbai.” – Pak’s former high commissioner to India Abdul Basit Rabid Islamism for you. And there is a bunch in India who wants Aman ki Aasha.pic.twitter.com/nvThPsawfw — Pakistan Untold (@pakistan_untold) March 21, 2026

“भारतावर हल्ला करण्याशिवाय पर्याय नाही”

चर्चेदरम्यान बासित यांना विचारण्यात आले की, “जर परिस्थिती बिघडली आणि अमेरिकेने पाकिस्तानच्या अण्वस्त्र क्षमतेवर हल्ला करण्याचा प्रयत्न केला, तर पाकिस्तानकडे काय पर्याय असेल?” यावर उत्तर देताना बासित म्हणाले, “अशा स्थितीत आम्हाला काहीही विचार करण्याची गरज नाही. जर कोणी आमच्यावर वाईट नजर टाकली, तर आम्ही थेट मुंबई आणि नवी दिल्लीवर हल्ला केला पाहिजे. त्यानंतर काय होईल ते आपण नंतर पाहू. जरी आमचा संघर्ष अमेरिकेशी असला, तरी जगाला हे माहित असले पाहिजे की अशा परिस्थितीत पाकिस्तान भारतालाच लक्ष्य करेल.”

US Iran War : अमेरिकेला कोटींचा फटका! इराणने पाडले सर्वात शक्तिशाली F-15 फायटर जेट; पहा थरारक VIDEO

तुलसी गॅबार्ड यांच्यावर टीका आणि क्षेपणास्त्र क्षमतेवर भाष्य

अब्दुल बासित यांनी यावेळी भारतीय वंशाच्या अमेरिकन अधिकारी तुलसी गॅबार्ड यांच्यावरही टीका केली. “तुलसी गॅबार्ड यांचा दृष्टीकोन नेहमीच पाकिस्तान विरोधी राहिला आहे. त्यांनी आमची क्षेपणास्त्रे पाहिली, पण भारताची अग्नी-5 आणि अग्नी-6 ही आंतरखंडीय क्षेपणास्त्रे त्यांना दिसत नाहीत,” असा आरोप त्यांनी केला. इतकेच नव्हे तर, “आमची मारक क्षमता वाढावी आणि भविष्यात आम्ही इस्रायललाही लक्ष्य करू शकू, अशी मी प्रार्थना करतो,” असे वादग्रस्त विधानही त्यांनी केले.

“अमेरिका आमचा धोरणात्मक भागीदार कधीच होणार नाही”

2014 ते 2017 या काळात भारतात पाकिस्तानचे उच्चायुक्त राहिलेल्या बासित यांनी अमेरिकेसोबतच्या संबंधांवरही भाष्य केले. ते म्हणाले, “भारत हा अमेरिकेचा धोरणात्मक भागीदार आहे. डोनाल्ड ट्रम्प सत्तेत आल्यानंतर परिस्थिती काहीशी सुधारेल असे आपल्याला वाटते, पण हे लक्षात ठेवा की अमेरिका दीर्घकाळ पाकिस्तानचा भागीदार राहणार नाही. आपण ट्रम्प प्रशासनाकडून जेवढा फायदा करून घेता येईल तेवढा घ्यावा, पण आपण त्यांचे स्ट्रॅटेजिक पार्टनर आहोत या भ्रमात राहू नये.”

तज्ज्ञांचे मत आणि प्रादेशिक तणाव

अब्दुल बासित यांनी यापूर्वीही अनेकदा भारतविरोधी विधाने केली आहेत. मात्र, अण्वस्त्रधारी देशांच्या संदर्भात अशा प्रकारची भाषा वापरणे आंतरराष्ट्रीय शिष्टाचारांच्या विरोधात असल्याचे संरक्षण तज्ज्ञांचे मत आहे. बासित यांचे हे विधान जागतिक स्तरावर पाकिस्तानची प्रतिमा अधिक मलिन करू शकते. सध्या दक्षिण आशियामध्ये आधीच तणावाचे वातावरण असताना, अशा चिथावणीखोर विधानांमुळे प्रादेशिक अस्थिरता वाढण्याची शक्यता वर्तवली जात आहे.

Iran war strategy : खामेनेईंनी मृत्यूपूर्वीच रचले होते चक्रव्यूह? इराणच्या सूडाने ट्रम्प-नेतन्याहूंची उडाली झोप; जगाला मोठा इशारा