भारतातील इलेक्ट्रिक टू-व्हीलर बाजारात आपले स्थान मजबूत करण्यासाठी होंडा कंपनी आता वेगाने पावले उचलत आहे. कंपनीने नुकतीच भारतात ‘QC3’ इलेक्ट्रिक स्कूटर सादर केली होती, ज्याची रेंज १४५ किमी असल्याचे जाहीर करण्यात आले आहे. याचदरम्यान, होंडाने थायलंड आणि व्हिएतनाममध्ये नुकतीच लाँच केलेली ‘होंडा UC3’ या नवीन इलेक्ट्रिक स्कूटरचे डिझाईन पेटंट भारतात दाखल केले आहे. होंडा ही अशी एकमेव मुख्य ऑटोमोबाईल ब्रँड आहे, ज्याची भारतीय इलेक्ट्रिक स्कूटर मार्केटमध्ये म्हणावी तशी पकड नाही, कारण त्यांचे पूर्वीचे ‘अॅक्टिवा ई’ आणि ‘QC1’ हे मॉडेल अपुऱ्या विक्रीमुळे बंद करावे लागले होते. मात्र, आता ‘UC3’ मुळे कंपनी बाजारात जोरदार पुनरागमन करण्याच्या तयारीत आहे.
बॅटरी, परफॉर्मन्स आणि रेंजची माहिती
या नवीन ई-स्कूटरच्या तांत्रिक बाबींचा विचार केला तर, होंडा UC3 मध्ये ३.२ kWh क्षमतेची फिक्सड LFP बॅटरी पॅक देण्यात आला आहे. ही स्कूटर एकाच चार्जिंगमध्ये तब्बल १२२ किलोमीटरची कमाल रेंज देण्यास सक्षम आहे. या स्कूटरमधील इलेक्ट्रिक मोटर ८ bhp कमाल पॉवर जनरेट करते, जी साधारण १६० सीसीच्या पेट्रोल स्कूटरइतकीच उत्तम कामगिरी करते. तसेच, ही स्कूटर ताशी ८० किलोमीटरच्या टॉप स्पीडने धावू शकते. यात १२ इंच आकाराची पुढील आणि मागील चाके देण्यात आली आहेत.
डिझाईन आणि युनिक लूक
होंडा UC3 चे डिझाईन मॅक्सी-स्कूटर आणि निओ-रेट्रो स्कूटरचे एक अप्रतिम मिश्रण आहे. या स्कूटरच्या पुढील भागाचा लूक मॅक्सी-स्कूटरसारखा आहे, तर मागील बाजू, साइड पॅनल्स आणि सीटचा आकार निओ-रेट्रो मॉडेलशी साम्य सांगणारा आहे. यात आकर्षक थ्री-पीस LED DRL युनिट दिले आहे, जे इंडिकेटरचेही काम करते. DRL च्या अगदी खाली LED हेडलाइट, तर वरील बाजूस विंडस्क्रीन आणि चार्जिंग सॉकेट बसवण्यात आले आहे. थायलंडमध्ये ही स्कूटर पर्पल सफायर व्हाईट आणि ग्रेफाइट ब्लॅक या रंगांमध्ये उपलब्ध असून तिथे याची किंमत सुमारे ४.१० लाख रुपये आहे.
अडव्हान्स फीचर्स आणि अंतर्गत स्टोरेज
रायडर्सच्या सोयीसाठी या ई-स्कूटरमध्ये अनेक आधुनिक फीचर्स समाविष्ट करण्यात आले आहेत. यात इको, स्टँडर्ड आणि स्पोर्ट असे मल्टि रायड मोड, ट्रॅक्शन कंट्रोल, रिव्हर्स असिस्ट, टाईप-सी यूएसबी चार्जिंग पोर्ट, की-लेस स्टार्टसह स्मार्ट की, रिजेनरेटिव्ह टेक आणि होंडा रोडसिंकयुक्त ५ इंचाचा टीएफटी इन्स्ट्रुमेंट कन्सोल मिळतो. तसेच, सुरक्षिततेसाठी यात ऑल-LED लायटिंग स्टँडर्ड म्हणून दिली असून, सामान ठेवण्यासाठी यात २६ लिटरची मोठी अंडरसीट स्टोरेज क्षमता देण्यात आली आहे.
भारतीय बाजारातील स्पर्धा आणि भविष्यातील योजना
भारतात बजाज, टीव्हीएस आणि हिरोसारख्या भारतीय कंपन्या इलेक्ट्रिक टू-व्हीलर सेगमेंटमध्ये आघाडीवर आहेत. इतकेच नव्हे तर, जपानच्याच यामाहा आणि सुझुकी या प्रतिस्पर्धी ब्रँड्सनीही अनुक्रमे EC-06 आणि e-Access द्वारे भारतीय बाजारात आपले पाय रोवले आहेत. या तीव्र स्पर्धेमुळे होंडा आता गांभीर्याने आपले EV धोरण आखत असून, आगामी काळात भारतीय ग्राहकांसाठी एकापाठोपाठ एक अनेक नवीन इलेक्ट्रिक मॉडेल लाँच करण्याची दाट शक्यता वर्तवली जात आहे.
.png "Videos"){kind=small}
