एकटा टाटा समूह पाकिस्तानच्या संपूर्ण अर्थव्यवस्थेवर भारी, टाटाच्या कंपन्यांनी दिलाय 120 टक्क्यांपर्यंत परतावा!
देशातील सर्वात मोठे औद्योगिक घराणे म्हणून टाटा समूहाची ओळख आहे. टाटा समूहातील बहुतांश कंपन्यांच्या शेअर्समध्ये या वर्षभरात मोठी वाढ झाली आहे. या वर्षात समूहाचे एकूण मार्केट कॅप सुमारे 3.77 लाख कोटी रुपयांनी वाढून 31.65 लाख कोटी रुपये इतके झाले आहे. विशेष म्हणजे टाटा समूहाचे हे मार्केट कॅप पाकिस्तानच्या अर्थव्यवस्थेपेक्षा अधिक आहे.
शेअर्समध्ये 120 टक्के तेजी
टाटा समूहातील 12 कंपन्यांचे शेअर्स 2024 या वर्षात 25 टक्के ते 120 टक्क्यांपर्यंत वाढले आहेत. यातील आठ शेअर्स 50 टक्क्यांपेक्षा जास्त वधारले आहेत. टाटा समूहाचे एकूण मार्केट कॅप 400 अब्ज डाॅलरपेक्षा जास्त आहे. तर पाकिस्तानच्या अर्थव्यवस्थेचा आकार 338 अब्ज डाॅलर आहे. म्हणजे एकटा टाटा समूह पाकिस्तानच्या संपूर्ण अर्थव्यवस्थेवर भारी आहे.
पीएम किसान योजनेचे 2000 रुपये ‘या’ दिवशी मिळणार; 19 व्या हप्त्याकडे शेतकऱ्यांचे लक्ष!
ट्रेंटच्या शेअर्समध्ये सर्वाधिक 121 टक्के वाढ
टाटा समूहाच्या एफएमसीजी कंपनी ट्रेंटच्या शेअर्समध्ये सर्वाधिक 121 टक्के वाढ झाली आहे. या काळात शेअर्सची किंमत 3,056 रुपयांवरून 6,750 रुपयांपर्यंत वाढली आहे. टाटा समूहाची हॉस्पिटॅलिटी कंपनी द इंडियन हॉटेल्स कंपनीची यंदा 78 टक्के वाढ झाली आहे. या काळात या शेअर्सची किंमत 438 रुपयांवरून 779 रुपयांपर्यंत वाढली आहे.
व्होल्टासचे शेअर्स 68 टक्के वाढले
इलेक्ट्रॉनिक उपकरणे बनवणारी टाटा समूहाची कंपनी व्होल्टासचे शेअर्स यावर्षी 68 टक्के वाढले आहेत. यावर्षी व्होल्टास शेअर्सची किंमत 978 रुपयांवरून 1,649 रुपयांपर्यंत वाढली आहे. त्याचप्रमाणे टीआरएफच्या शेअर्सची किंमत 64 टक्के वाढली आहे. या कालावधीत हा शेअर्स 253 रुपयांवरून 416 रुपयांपर्यंत वाढला आहे.
टाटा इन्व्हेस्टमेंट कॉर्पोरेशनचे शेअर्स 56 टक्के वाढले
टाटा ग्रुपची आणखी एक कंपनी ऑटोमॅटिक स्टॅम्पिंग्स अँड असेंबलीजचे शेअर्स जानेवारीपासून 62 टक्के वधारले आहेत. वर्षाच्या सुरुवातीला या शेअर्सची किंमत 420 रुपये होती. आता किंमत 680 रुपयांवर पोहोचली आहे. त्याचप्रमाणे यावर्षी टाटा इन्व्हेस्टमेंट कॉर्पोरेशनच्या शेअर्समध्ये 56 टक्के वाढ झाली आहे. या काळात शेअर्सची किंमत 4283 रुपयांवरून 6679 रुपये झाली आहे.
समूह कंपनी तेजस नेटवर्कचे शेअर्स यंदा 869 रुपयांवरून 1337 रुपयांपर्यंत वाढले आहेत. या कालावधीत हा शेेअर्स 54 टक्के वाढला आहे. टाटा समूहाची कंपनी ऑटोमोबाईल कॉर्पोरेशन ऑफ गोवाच्या शेअर्समध्ये 53 टक्के वाढ झाली आहे. हा शेअर्स 1,423 रुपयांवरून 2,176 रुपयांपर्यंत वाढला आहे.
(टीप : शेअर बाजार, म्यूच्यूअल फंड हे जोखमीच्या अधीन असतात. वरती दिलेली माहिती माहितीस्तव देण्यात आली आहे. गुंतवणुकीसाठी शिफारस, सल्ला देण्याचा यामागील उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
