'या' आयपीओची शेअर बाजारात निराशाजनक सुरुवात, गुंतवणूकदार तोट्यात (फोटो सौजन्य - सोशल मीडिया)
Voler Car Share Marathi News: कॉर्पोरेट कर्मचाऱ्यांना वाहतूक सुविधा पुरवणाऱ्या व्होलर कार्सच्या शेअर्सने लिस्टिंगलाच आयपीओ गुंतवणूकदारांची माेठी निराशा केली आहे. शेअर्सचे आज 19 फेब्रुवारी राेजी एनएसई एसएमई प्लॅटफॉर्मवर कमकुवत लिस्टिंग झाले. सूचीबद्ध झाल्यानंतर शेअर्समध्ये आणखी घसरण झाली. शेअर्सला लोअर सर्किट लागले.
व्होलर कार्सचा शेअर्स एनएसई एसएमईवर ९० रुपयांवर लिस्ट झाला. आयपीओमध्ये शेअर्सची किंमत 90 रुपये होती. म्हणजे आयपीओ गुंतवणूदारांना कसलाही लिस्टिंग फायदा मिळाला नाही. लिस्टिंगनंतर शेअर्स आणखी घसरून ८५.५० रुपयांच्या लोअर सर्किटवर आला. आयपीओ गुंतवणूकदार आता ५ टक्क्यांनी तोट्यात आहेत.
बोली प्रक्रियेच्या तिसऱ्या दिवसाच्या अखेरीस, व्होलर कार आयपीओला गुंतवणूकदारांकडून जोरदार प्रतिसाद मिळाला होता. व्होलर कार्सचा २७.०० कोटी रुपयांचा आयपीओ १२-१४ फेब्रुवारी दरम्यान सबस्क्रिप्शनसाठी खुला होता. हा आयपीओ एकूण १३.६२ पट सबस्क्राइब झाला. यामध्ये पात्र संस्थात्मक खरेदीदारांसाठी (QIB) राखीव असलेला भाग 9.34 पट, नॉन-इन्स्टिट्यूशनल इन्व्हेस्टर्स (NII) साठीचा भाग 18.56 पट आणि किरकोळ गुंतवणूकदारांसाठीचा भाग 13.94 पट भरण्यात आला. या आयपीओ अंतर्गत १० रुपयांच्या दर्शनी मूल्याचे ३० लाख नवीन शेअर्स जारी करण्यात आले आहेत. या शेअर्सद्वारे उभारलेल्या निधीचा वापर कंपनी खेळत्या भांडवलाच्या गरजा पूर्ण करण्यासाठी, इश्यूशी संबंधित खर्च पूर्ण करण्यासाठी आणि सामान्य कॉर्पोरेट उद्देशांसाठी करेल.
व्होलर कार ग्रे मार्केट प्रीमियम किंवा जीएमपी देखील लिस्टिंगच्या आधी +५ वर होता. याचा अर्थ असा की व्होलर कारचे शेअर्स इश्यू किमतीपेक्षा ₹ ५ च्या प्रीमियमवर व्यवहार करत होते. याचा अर्थ असा की बाजारातील सहभागींना व्होलर कारचे शेअर्स ₹ ९५ वर लिस्ट होण्याची अपेक्षा होती, जे ₹ ९० च्या इश्यू किमतीपेक्षा ५.५६% जास्त आहे . तथापि, लिस्टिंगमुळे गुंतवणूकदारांची निराशा झाली.
व्होलर कार्सबद्दल
२०१० मध्ये स्थापन झालेली व्होलार कार मोठ्या बहुराष्ट्रीय कंपन्या आणि कॉर्पोरेट क्लायंटना कर्मचारी वाहतूक सेवा (ETS) प्रदान करते. कंपनीकडे २५०० हून अधिक कार, एसयूव्ही, ईव्ही, बस आणि टेम्पो ट्रॅव्हलर्सचा ताफा आहे. कंपनीचा व्यवसाय कोलकाता, मुंबई, पुणे, भुवनेश्वर, दिल्ली-एनसीआर आणि अहमदाबादमध्ये पसरलेला आहे.
१०० कोटी रुपयांपेक्षा थोडे जास्त मूल्य असलेल्या व्होलर कारचा आयपीओमधून मिळणारा निधी त्यांच्या खेळत्या भांडवलाच्या गरजा आणि सामान्य कॉर्पोरेट उद्देशांसाठी वापरण्याचा मानस आहे. एनएसईवरील आकडेवारीनुसार, या स्टॉकचे सध्या बाजार भांडवल ९९.१८ कोटी रुपये आहे.
