रविवार, 1 नोव्हेंबर 2026
Pakistan मध्ये Lockdown ची वेळ! ( सौजन्य - सोशल मीडिया )
पंतप्रधान शाहबाज शरीफ यांच्या अध्यक्षतेखाली नुकत्याच झालेल्या एका उच्चस्तरीय बैठकीत आपत्कालीन योजनेच्या मसुद्यावर चर्चा झाली. या योजनेअंतर्गत, इंधन आणि विजेचा वापर तात्काळ कमी करण्यासाठी सरकार अनेक कठोर उपाययोजनांचा विचार करत आहे. सरकारी आणि खाजगी क्षेत्रातील संस्थांसाठी तीन दिवसांच्या सुट्टीसह चार दिवसांचा आठवडा, रोटेशनल ड्युटी, ऑनलाइन वर्ग आणि इतर उपाययोजना लागू करण्याचा सरकार विचार करत आहे. ही संकट इतकं वाढलं आहे की संपूर्ण जगावर याचा परिणाम दिसून येणार आहे.
सरकारी आणि खाजगी क्षेत्रातील कार्यालये, शाळा आणि महाविद्यालये आठवड्यातून फक्त चार दिवस उघडी ठेवण्याचा प्रस्ताव आहे. शुक्रवार, शनिवार आणि रविवार सुट्टी जाहीर केली जाऊ शकते.शाळा बंद असल्याने, महाविद्यालयीन आणि विद्यापीठातील शिक्षण तात्काळ ऑनलाइन पद्धतीने सुरू केले जाऊ शकते.
कॉर्पोरेट आणि आयटी क्षेत्रातील कर्मचाऱ्यांना आठवड्यातून किमान दोन दिवस घरून काम करण्याची परवानगी द्यावी आणि सरकारी कर्मचाऱ्यांसाठी रोटेशनल ड्युटी पद्धत लागू करावी, असे सुचवण्यात आले आहे. वीज वाचवण्यासाठी, व्यावसायिक बाजारपेठा आणि शॉपिंग मॉल्स रात्री ८:०० वाजेपर्यंत बंद करण्याचे आदेश दिले जाऊ शकतात. रेस्टॉरंट्स आणि लग्न समारंभांसाठीची सभागृहे रात्री १०:०० वाजेपर्यंत बंद करणे आवश्यक असेल.
या नियमातून फक्त वैद्यकीय दुकानांसारख्या अत्यावश्यक सेवांना सूट दिली जाईल. सरकारी विभाग आणि मंत्र्यांसाठीच्या इंधन वाटपात ५०% पर्यंत कपात केली जाऊ शकते.
पाकिस्तान सध्या इंधनाच्या गंभीर संकटाचा सामना करत आहे. अमेरिका-इराण युद्ध सुरू असताना, होर्मुझच्या सामुद्रधुनीतून होणारा पुरवठा विस्कळीत झाला आहे. पाकिस्तान आपल्या पेट्रोलियम गरजांपैकी ७०% मध्य-पूर्वेकडील देशांकडून आयात करतो. सध्याच्या भू-राजकीय तणावामुळे, पाकिस्तानकडे सध्या केवळ २८ दिवसांचा पेट्रोल आणि डिझेलचा साठा असल्याचा अंदाज आहे. याव्यतिरिक्त, कच्च्या तेलाच्या वाढलेल्या किमतींमुळे पाकिस्तानचा परकीय चलन साठा आणखी वेगाने कमी होण्याचा धोका आहे. परिणामी, परिस्थिती नियंत्रणात आणण्यासाठी सरकारकडे कठोर निर्बंध लादण्याशिवाय पर्याय नाही.
