(फोटो सौजन्य - Chatgpt)
पश्चिम बंगालची राजधानी कोलकाता येथील हावडा स्थानकावर हा सगळा प्रकार उघडकीस आला आहे. तिथे पोर्टर्सच्या एका टोळीने एका प्रवाशाकडून ७ ट्रॉली बॅग आणि ४ हँड लगेजसाठी थोडे थोडके नाही तर तब्बल ४,७०० रुपये उकळले. ही रक्कम रेल्वेने निश्चित केलेल्या पोर्टर शुल्कापेक्षा कित्येक पटींनी जास्त आहे. नेमकं काय घडलं सविस्तर जाणून घेऊयात.
अरुणभा मुखर्जी एका मोठ्या बांधकाम कंपनीत इंजीनियर आहेत. ते पश्चिम बंगालमधील कूचबिहारहून मुंबईला प्रवास करत होते. त्यांच्यासोबत त्यांची पत्नी, चार महिन्यांची मुलगी, वृद्ध आई आणि त्यांचा मदतनीस होते. ते शुक्रवारी पहाटे ५ वाजता कूचबिहारहून ट्रेनने हावडा येथे पोहोचले. त्यानंतर थोड्याच वेळात त्यांना मुंबईला जाण्यासाठी दुसरी ट्रेन पकडायची होती. जेव्हा त्यांची कूचबिहारहून आलेली ट्रेन हावडा स्टेशनवर पोहोचली, तेव्हा मुसळधार पाऊस सुरु होता. त्यांनी आपले सामान उतरवलं आणि काय करावं अशा प्रश्नांत पडले. त्याच वेळी, कुलींचा एक गट त्यांच्याजवळ आला आणि त्यांनी मदतीचा हात पुढे केला. कामाचे दर विचारल्यावर, त्यांनी काहीही सांगण्यास नकार दिला आणि फक्त एवढेच म्हणाले की ते हे काम कमी पैशात करतील.
कुलीने सर्व सामान एका मोठ्या ट्रॉलीवर ठेवलं आणि तो दुसऱ्या प्लॅटफॉर्मच्या दिशेने चालू लागला. त्याचवेळी, कुली म्हणाला की ६,००० रुपये होतील. मुखर्जींनी विचारले, “किती?” हमालाने उत्तर दिले, “एवढेच.” जेव्हा त्यांनी विरोध केला, तेव्हा हमालाने धमकी दिली, “तुम्ही एवढे पैसे दिले नाहीत, तर मी सर्व सामान रुळांवर फेकून देईन.” या सगळ्या प्रकारात त्याने आपल्या साथीदारांना बोलावलं.मुखर्जींसोबत त्यांची लहान मुलगी आणि वृद्ध आई होत्या. त्यांची ट्रेन लवकरच हावड्याहून निघणार होती. मुसळधार पाऊस पडत होता, त्यामुळे त्यांच्याकडे फारसे पर्याय नव्हते. त्यांनी हमालाशी घासाघीस केली तर हमालाने तब्बल ५,००० रुपये मागितले. अखेरीस, ते ४७,०० रुपयांवर सहमत झाले. त्यांच्याकडे जास्त रोख रक्कम नव्हती, म्हणून त्यांनी १,७०० रुपये रोख आणि ३,००० रुपये यूपीआयद्वारे दिले. त्यानंतर ते दुसऱ्या ट्रेनमध्ये चढले.
ते शनिवारी त्याच ट्रेनने मुंबईच्या छत्रपती शिवाजी महाराज टर्मिनल (CSMT) येथे पोहोचले. जेव्हा त्यांनी तेवढेच सामान स्टेशनच्या बाहेर नेण्यासाठी कुलीला बोलावलं. तेव्हा त्यांच्याकडून ८०० रुपये आकारण्यात आले. तेव्हाच अरुणभ मुखर्जी यांच्या लक्षात आले की हावडामध्ये कुलीने त्यांच्याकडून बरेच जास्त पैसे आकरले.
त्यानंतर मुखर्जी यांनी काही फोटोंसह या घटनेचा सविस्तर तपशील फेसबुकवर पोस्ट केला. त्यांनी पूर्व रेल्वे प्रशासनाला या प्रकरणाची चौकशी करून दोषी कुलींवर कारवाई करण्याचे आवाहन केले. सीसीटीव्ही फुटेजच्या माध्यमातूनही गुन्हेगारांची ओळख पटवतील.
रेल्वे प्रवाशांची फसवणूक टाळण्यासाठी, रेल्वे बोर्डाने पोर्टर्ससाठी शुल्क निश्चित केले आहे. गेल्या वर्षी याचा आढावा घेण्यात आला होता. सुधारित शुल्कानुसार, प्रमुख रेल्वे स्थानकांवर ४० किलोपर्यंतच्या सामानासाठी तुम्हाला ८५ रुपये द्यावे लागतील. मध्यम आकाराच्या स्थानकांवर हे शुल्क ८० रुपये आणि लहान स्थानकांवर ७५ रुपये आहे. जर तुम्ही दोन चाकी किंवा चार चाकी ट्रॉली वापरली, तर तुम्हाला १३५ रुपये द्यावे लागतील. या ट्रॉलीमध्ये १६० किलोपर्यंतचे सामान वाहून नेता येते.
.png "Videos"){kind=small}
