परदेशस्थ विद्यार्थ्यांची शिष्यवृत्ती रखडली; विद्यार्थी आर्थिक संकटात

महाराष्ट्र शासनाच्या अल्पसंख्याक विकास विभागाकडून परदेशात उच्च शिक्षणासाठी पाठविण्यात आलेल्या सुमारे ७५ विद्यार्थ्यांची शिष्यवृत्ती रखडल्यामुळे ते आर्थिक अडचणीत सापडले आहेत.

• परदेशस्थ विद्यार्थ्यांची शिष्यवृत्ती रखडली
• विद्यार्थी आर्थिक संकटात
• आंदोलन छेडण्याचा दिला इशारा

पुणे : महाराष्ट्र शासनाच्या अल्पसंख्याक विकास विभागाकडून परदेशात उच्च शिक्षणासाठी पाठविण्यात आलेल्या सुमारे ७५ विद्यार्थ्यांची शिष्यवृत्ती रखडल्यामुळे ते आर्थिक अडचणीत सापडले आहेत. शासनाने शिष्यवृत्तीला मान्यता दिल्यानंतरही निधी वितरणात झालेल्या दिरंगाईमुळे संबंधित विद्यार्थ्यांवर परदेशातील विद्यापीठांकडून फी भरण्यासाठी दबाव वाढला आहे. शासनाकडून शिष्यवृत्ती मिळेल या अपेक्षेवर हे विद्यार्थी परदेशात शिक्षणासाठी गेले. मात्र प्रत्यक्ष निधी न मिळाल्याने त्यांच्यासमोर आर्थिक संकट उभे राहिले आहे.

 

काही विद्यार्थ्यांनी विभागाशी संपर्क साधल्यानंतर “निधी उपलब्ध नाही, मागणी करण्यात आली आहे” असा प्रतिसाद मिळाल्याचे सांगितले जात आहे. त्यामुळे विद्यार्थ्यांमध्ये संभ्रम आहे. संबंधित विद्यार्थ्यांची थकीत शिष्यवृत्ती तात्काळ वितरित करावी, निधी वितरणातील दिरंगाईबाबत जबाबदार अधिकाऱ्यांवर कारवाई करावी आणि विद्यार्थ्यांचे शिक्षण खंडित होणार नाही यासाठी शासनाने विद्यापीठांशी समन्वय साधावा, अशी मागणीही त्यांनी केली. तसेच या प्रश्नावर तातडीने तोडगा न निघाल्यास आंदोलन छेडण्याचा इशाराही देण्यात आला आहे.

एका बाजूला सरकार अनावश्यक गोष्टीवर कोट्यवधी रुपये उधळत आहे. तर दुसऱ्या बाजूला राज्याचे व देशाचे भवितव्य घडवणाऱ्या विद्यार्थ्यांसाठी ‘निधी नाही’ असे लाजिरवाणे उत्तर दिले जात आहे. सरकारने तातडीने थकीत शिष्यवृत्ती वितरित करावी आणि विद्यापीठांशी समन्वय साधून विद्यार्थ्यांचे शिक्षण थांबणार नाही याची हमी द्यावी. अन्यथा तीव्र आंदोलन छेडण्यात येईल’ – अक्षय जैन, प्रदेशाध्यक्ष, माध्यम विभाग, युवक काँग्रेस

हे सुद्धा वाचा : उमेदवारी माघारी घेतली तरी काँग्रेस भूमिकेवर ठाम, 2029 ला बारामतीत काँग्रेसचा आमदार असेल; हर्षवर्धन सपकाळांचा विश्वास