महापालिकेचा शिपाई शिवानंद पाटीलवर आणखी एक गुन्हा दाखल; नेमकं प्रकरण काय?

पुणे महापालिकेत विविध पदावर नोकरी लावण्याचे आमिषाने फसवणूक प्रकरण समोर असतानाच पालिकेच्या शिक्षण विभागातील शिपाई शिवानंद बाळासाहेब पाटील याने आणखी एकाची तब्बल १५ लाखांची फसवणूक केल्याचा प्रकार समोर आला आहे.

पुणे : पुणे महापालिकेत विविध पदावर नोकरी लावण्याचे आमिषाने फसवणूक प्रकरण समोर असतानाच पालिकेच्या शिक्षण विभागातील शिपाई शिवानंद बाळासाहेब पाटील याने आणखी एकाची तब्बल १५ लाखांची फसवणूक केल्याचा प्रकार समोर आला आहे. कनिष्ठ, वरिष्ठ अभियंता तसेच उपआयुक्त पदावर नोकरी लावण्याचे आमिषाने ही फसवणूक केली असून, त्यांना बनावट लेटरहेड देखील दिल्याचे समोर आले आहे. याप्रकरणी पर्वती पोलिस ठाण्यात शिवानंद बाळासाहेब पाटील याच्याविरूद्ध विविध कलमान्वये गुन्हा नोंद करण्यात आला आहे. याबाबत ३५ वर्षीय तरुणाने तक्रार दिली आहे. हा प्रकार डिसेंबर २०२३ ते १२ ऑगस्ट २०२६ पर्यंत सुरू होता.

मिळालेल्या माहितीनुसार, तक्रारदार धायरी परिसरात राहण्यास आहेत. त्यांची आरोपी शिवानंद याच्यासोबत ओळख झाली होती. या ओळखीनंतर शिवानंद याने त्यांना आपण महापालिकेत क्रिडा अधीक्षक म्हणून नोकरीस असल्याची बतावणी केली. तर त्यांना मंत्रालयात चांगली ओळख असल्याचे सांगत पालिकेत कनिष्ठ अभियंता, वरिष्ठ अभियंता अथवा उपआयुक्त या पदावर नोकरी लावण्याचे आमिष दाखविले. नंतर त्यांच्याकडून वेळोवेळी रोख स्वरूपात त्यांच्याकडून १५ लाख रुपये घेतले. याबदल्यात त्यांना बनावट जॉईनिंग लेटर देऊन त्यांची फसवणूक केली.

तीनही पदांचे लेटर हेड

शिवानंद पाटील हा पालिकेत शिपाई आहे. त्यामुळे त्याचा मुक्त वावर होता. त्याने तक्रारदार यांना तीनही पदांचे बनावट नियुक्तीचे पत्र दिले. त्यावर स्वाक्षऱ्या, शिक्के देखील मारले होते. यासोबतच बदलीचे आदेश आणि बनावट ओळखपत्र देखील दिले गेल्याचे तक्रारीत नमूद करण्यात आले आहे.

हे सुद्धा वाचा  : धनेगाव पेट्रोल पंपावरील खूनप्रकरणी मोठी अपडेट; पोलिसांनी सहाव्या फरार आरोपीला ठोकल्या बेड्या

यापुर्वी शिवानंदसोबतच इतरांवर गुन्हा

पुणे महानगर पालिकेतील विविध विभागात नोकरी मिळवून देण्याचे आमिषाने बनावट लेटरहेड, बनावट शिक्के, वरिष्ठ अधिकाऱ्यांच्या खोट्या स्वाक्षऱ्या आणि बनावट नियुक्तीपत्रांच्या आधारे उमेदवारांची तब्बल ४५ लाख रुपयांची फसवणूक केल्याप्रकरणी यापुर्वी शिवाजीनगर पोलिसांत जेजुरी देवस्थानचे विश्वस्त राजेंद्र बबन खेडेकर यांच्यासह, महानगर पालिकेचा शिक्षण विभागातील शिपाई शिवानंद बाळासाहेब पाटील, नमिता गोवर्धन बसनोडे, तसेच त्यांच्या इतर साथीदारांवर गुन्हा दाखल आहे. हा सर्व प्रकार देखील मार्च २०२२ ते जुलै २०२६ या कालावधीत घडला आहे.