महाविद्यालयीन तरुणावर शस्त्राने वार, मित्रांनाही मारहाण; नेमकं काय घडलं?

महाविद्यालयीन तरुणावर शस्त्राने वार करुन खुनाचा प्रयत्न केल्याची घटना कोढवा भागात घडली आहे. टोळक्याने तरुणाबरोबर असलेल्या मित्रांनाही मारहाण केली आहे. याप्रकरणी टोळक्याविरुद्ध गु्न्हा दाखल करण्यात आला आहे.

पुणे : पुण्यासह राज्यभरात गुन्हेगारी वाढली असून, दररोज खून, खुनाचा प्रयत्न, लुटमार यासारख्या घटना घडत आहेत. वाढत्या गुन्हेगारीमुळे नागरिकांमध्ये भिती पसरत आहे. अशातच आता एक मोठी बातमी समोर आली आहे. महाविद्यालयीन तरुणावर शस्त्राने वार करुन खुनाचा प्रयत्न केल्याची घटना कोढवा भागात घडली आहे. टोळक्याने तरुणाबरोबर असलेल्या मित्रांनाही मारहाण केली आहे. मोहम्मद उस्मान कामील खान (वय १९, रा. मीठानगर, कोंढवा) असे जखमी झालेल्याचे नाव आहे. याप्रकरणी टोळक्याविरुद्ध गु्न्हा दाखल करण्यात आला आहे. याबाबत खान याने कोंढवा पोलिस ठाण्यात तक्रार दिली आहे.

पोलिसांच्या माहितीनुसार, खान आणि आरोपी हे ओळखीचे आहेत. आरोपी कोंढव्यातील मीठानगर भागात राहायला आहेत. किरकोळ कारणावरुन त्यांच्यात वाद झाला होता. (दि. १२ ऑगस्ट) रात्री साडेआठच्या सुमारास खान आणि त्याच्याबरोबर असलेले दोन मित्र कोंढव्यातील पारगेनगर चौकातून निघाले होते. त्या वेळी आरोपींनी खान आणि त्याच्याबरोबर असलेल्या मित्रांना अडवले. आरोपींनी खान याच्यावर शस्त्राने वार केले. त्याच्याबरोबर असलेल्या मित्रांना मारहाण केली. खान याच्या डोक्यात दगड घालून आरोपी पसार झाले. खुनाचा प्रयत्न केल्या प्रकरणी तिघा आरोपींविरुद्ध गुन्हा दाखल करण्यात आला असून, पसार झालेल्या आरोपींचा शोध घेण्यात येत आहे. पोलीस उपनिरीक्षक सागर पवार तपास करत आहेत.

हे सुद्धा वाचा  : तुकाराम मुंढे ॲक्शन मोडमध्ये; आरोपी सिया गोयलच्या वडिलांचे दुकान सील

दारू पिण्यासाठी पैसे न दिल्याचा राग अनावर

पुण्यातून एक मोठी बातमी समोर आली आहे. दारू पिण्यास पैसे न दिल्याने तरुणाच्या डोक्यात दगड घातल्याची घटना गुलटेकडीतील डायसप्लॉट परिसरात घडली आहे. यामुळे परिसरात तणावाचे वातावरण निर्माण झाले होते. दरम्यान पोलिसांनी खुनाचा प्रयत्न केल्याप्रकरणी एकाला अटक केली. राजू शिवलिंगप्पा इककळकी (वय ३०, रा. डायसप्लाॅट, गुलटेकडी) असे गंभीर जखमी झालेल्याचे नाव आहे. याप्रकरणी प्रेम संजय काळे (वय २८, रा. डायसप्लाॅट, गुलटेकडी) याला अटक करण्यात आली आहे. याबाबत इककळकी याची आई लक्ष्मीबाई (वय ५८) यांनी स्वारगेट पोलिस ठाण्यात तक्रार दिली आहे. पोलिसांच्या माहितीनुसार, राजू इककळकी बुधवारी (१२ ऑगस्ट) सकाळी साडेसातच्या सुमारास गुलटेकडीतील डायसप्लॉट परिसरात थांबला होता. आरोपी राजू याचा ओळखीचा आहे. आरोपी प्रेम याने त्याच्याकडे दारू पिण्यास पैसे मागितले. पण, त्याने दारू पिण्यास पैसे देण्यास नकार दिला. त्यावेळी चिडून जाऊन राजू याला शिवीगाळ करुन मारहाण करण्यास सुरुवात केली. आरोपीने त्याच्या डोक्यात दगड घातला. गंभीर जखमी झाल्यानंतर आरोपीने त्याला दगडाने मारहाण केली. मारहाणीत तो गंभीर जखमी झाला.