पुण्यातील बाणेरमध्ये एकाचा खून, चाकूने सपासप वार करत जागीच संपवलं; कारण…

बाणेरमधील ब्रम्हकुमारी मेडिटेशन सेंटरमधील महिलेशी एकतर्फी प्रेमातून झालेल्या वादात जागामालकाचा एकाने धारधार शस्त्राने वार करुन खुन केल्याची धक्कादायक घटना घडली आहे.

पुणे : राज्यासह देशभरात गुन्हेगारी वाढली असून, अशातच आता पुण्यातून एक धक्कादायक बातमी समोर आली आहे. बाणेरमधील ब्रम्हकुमारी मेडिटेशन सेंटरमधील महिलेशी एकतर्फी प्रेमातून झालेल्या वादात जागामालकाचा एकाने धारधार शस्त्राने वार करुन खून केल्याची धक्कादायक घटना घडली आहे. खून केल्यानंतर तो स्वतः चतुःश्रृंगी पोलिस ठाण्यात हजर झाला आणि या घटनेची माहिती दिली.

घनश्याम संजय रायकर (वय ४९, रा. ब्रम्हकुमारी  मेडिटेशन सेंटरसमोर, बाणेर) असे खून झालेल्या व्यक्तीचे नाव आहे. तर  सोलुमन सुर्यभान शेंडगे (वय ५२, रा. फिरस्ता) असे आरोपीचे नाव असून, त्याच्याविरुद्ध बाणेर पोलिस ठाण्यात खूनाचा गुन्हा दाखल करण्यात आला आहे. ही घटना गुरूवारी (दि. ६) सकाळी साडे अकरा वाजताच्या सुमारास रायकर फार्म हाऊस बाणेर परिसरात घडली आहे.

पोलिसांच्या माहितीनुसार, घनश्याम रायकर यांची बाणेर येथील जागा आहे. त्यांनी २५ वर्षांपूर्वी तेथे ब्रम्हकुमारी मेडिटेशन सेंटर उभारले आहे. आरोपी सोलुमन याचे लग्न झाले असून, त्याचा घटस्फोट झाला आहे. त्यामुळे तो असाच फिरस्ती आहे. ब्रम्हकुमारी सेंटरमधील एका महिलेशी शेंडगे याचे एकतर्फी प्रेम असल्याची माहिती आहे. तो गेल्या एक वर्षांपासून महिलेला त्रास देत होता. गुरुवारी सकाळी तो चाकू घेऊन आला. त्यावेळी जागा मालक रायकरही तेथेच होते. त्यांच्यात वादावादी झाली. त्याने चाकू दाखविला. तेव्हा रायकर हे पळून जाऊ लागले. तेव्हा सोलुमन याने त्यांचा पाठलाग करुन त्यांच्यावर सपासप वार केले. ते तेथेच कोसळले. त्यानंतर सोलुमन तेथून पळून तेथ चतुःश्रृंगी पोलिस ठाण्यात हजर झाला.

हे सुद्धा वाचा : गुन्हेगारांची काढली ‘धिंड’ अन् पोलिसांची झाली अडचण! नेमकं प्रकरण काय?

दरम्यान सोलुमनने तेथील पोलिसांना आपण खून केल्याचे सांगितले. तात्काळ चतुःश्रृंगी पोलिसांनी हा प्रकार बाणेर पोलिसांना कळविला. नागरिकांनी रायकर यांना उपचारासाठी नजकीच्या रुग्णालयात दाखल केले. मात्र त्यांचा उपचारापुर्वीच मृत्यू झाल्याचे डॉक्टरांनी सांगितले. घटना घडलेली हद्द बाणेर पोलिस ठाण्याची आहे. त्यामुळे त्याला पुढील कारवाईसाठी बाणेर पोलिसांच्या ताब्यात देण्यात आले. पुढील तपास बाणेर पोलिस करत आहेत.

हे सुद्धा वाचा : बाजीराव रस्त्यावरील खुनातील आरोपीला पोलिसांनी ठोकल्या बेड्या; ‘या’ परिसरात सापळा रचून पकडले