गुरुवार, 6 ऑगस्ट 2026
संग्रहित फोटो
पुणे : राज्यासह देशभरात गुन्हेगारी वाढली असून, अशातच आता पुण्यातून एक मोठी बातमी समोर आली आहे. बाजीराव रस्त्यावर भरदुपारी झालेल्या एका अल्पवयीन मुलाच्या खुनातील आरोपींना पुणे पोलिसांनी तब्बल १२ कोयत्यांसह पकडले आहे. यात तीन अल्पवयीन मुलांचा समावेश असून, पर्वती परिसरात धारदार शस्त्रांसह दहशत माजविण्याच्या तयारीत असल्याचा संशय पोलिसांना आहे. गुन्हे शाखेच्या युनिट दोनने ही कारवाई केली असून, एकाला अटक करण्यात आली आहे. विशेषत: कोयते या आरोपींनीच बनविले असल्याचेही समोर आले आहे.
गौरव राजू कांबळे (वय १८) असे अटक करण्यात आलेल्याचे नाव आहे. त्याच्या तीन साथीदारांना ताब्यात घेतले असून, याप्रकरणी पर्वती पोलिस ठाण्यात गुन्हा दाखल करण्यात आला आहे. गौरव कांबळे तसेच यातील एक अल्पवयीन मुलावर यापुर्वी खूनाचा गुन्हा दाखल आहे. खडक पोलिस ठाण्याच्या हद्दीत बाजीराव रस्त्यावर भरदुपारी एका मुलाचा दुचाकीवरून येऊन कोयत्याने वार करून खून झाला होता. त्याचे बोट देखील तोडले होते. या खुनाने शहरात मोठी खळबळ उडाली होती. मुलांमधील वादविवादातून हा प्रकार घडला होता. हे मुले जामीनावर बाहेर आले आहेत.
दरम्यान, गुन्हे शाखेच्या पथकाला गुप्त माहिती मिळाली होती की, पर्वतीतील जनता वसाहत परिसरात काही मुले शस्त्रे घेऊन थांबले आहेत. त्यानुसार वरिष्ठ निरीक्षक राहुल खिलारे यांच्या मार्गदर्शनाखाली पथकाने तातडीने सापळा रचून छापा टाकला. कारवाईदरम्यान गौरव कांबळे याला अटक करण्यात आली, तर त्याच्यासोबत असलेल्या तीन विधीसंघर्षित बालकांना ताब्यात घेण्यात आले. आरोपींकडून १२ धारदार लोखंडी शस्त्रे जप्त करण्यात आली. गौरव कांबळे तसेच यातील अल्पवयीन मुलांचीच जनता वसाहतीत गँग तयार केली आहे. गौरव यापुर्वी एका वेल्डींगच्या दुकानात नोकरी करत होता. तेथील कामातून त्याने हे १२ कोयते स्वत: तयार केल्याची माहिती पोलिसांनी दिली आहे. कोयत्यांचा वापर दहशत माजविण्यासाठी करणार असल्याचेही समोर आले आहे.
