रुग्णालय की मद्यालय? वायसीएमच्या शवविच्छेदन कक्षात मद्याच्या बाटल्या अन्…; व्हिडीओच्या दाव्याने खळबळ

पिंपरी-चिंचवड महापालिकेच्या यशवंतराव चव्हाण स्मृती रुग्णालयातील (वायसीएम) शवविच्छेदन विभागात मद्यपार्टी झाल्याचा कथित प्रकार समोर आल्याने मोठी खळबळ उडाली आहे.

• शवविच्छेदन विभागात मद्यपार्टी झाल्याचा कथित प्रकार
• मद्याच्या बाटल्यांचा व्हिडीओ व्हायरल झाल्याचा दावा
• रुग्णालयाच्या कारभारावर प्रश्नचिन्ह

पिंपरी : मृत व्यक्तीला सन्मानाने अखेरचा निरोप मिळावा आणि दुःखाच्या प्रसंगी नातेवाइकांना संवेदनशीलतेने वागणूक मिळावी, अशी अपेक्षा असते. मात्र, पिंपरी-चिंचवड महापालिकेच्या यशवंतराव चव्हाण स्मृती रुग्णालयातील (वायसीएम) शवविच्छेदन विभागात मद्यपार्टी झाल्याचा कथित प्रकार समोर आल्याने मोठी खळबळ उडाली आहे. शवविच्छेदन कक्षात मद्याच्या बाटल्या, पेग, चकण्यासह जेवणाचे ताट आणि मद्यप्राशन केल्याचा संशय निर्माण करणाऱ्या व्यक्ती दिसत असल्याचा व्हिडीओ समाजमाध्यमांवर व्हायरल झाल्याचा दावा केला जात आहे. या प्रकारामुळे रुग्णालयाच्या कारभारावर आणि संबंधित कर्मचाऱ्यांच्या जबाबदारीवर गंभीर प्रश्नचिन्ह उपस्थित झाले आहे.

 

नातेवाईक प्रतीक्षेत, आतमध्ये कथित मद्यपार्टी!

एका बाजूला मृत्यूचा दाखला मिळवण्यासाठी मृतांच्या नातेवाइकांना रात्रभर ताटकळत थांबावे लागत असल्याचा आरोप आहे. तर दुसरीकडे, याच विभागात मद्यपार्टी सुरू असल्याचे कथित चित्र समोर आल्याने नागरिकांमधून तीव्र संताप व्यक्त होत आहे. मृतदेहांशी संबंधित कामकाज चालणारा शवविच्छेदन विभाग हा अत्यंत संवेदनशील परिसर असतो. अशा ठिकाणी मद्यपान किंवा पार्टीसारखा प्रकार घडला असल्यास तो केवळ शिस्तभंगाचा विषय राहत नाही, तर रुग्णालयातील कामकाज, सुरक्षितता आणि सार्वजनिक आरोग्य संस्थेच्या प्रतिष्ठेशी संबंधित गंभीर बाब ठरते.

तक्रारदारामुळे प्रकार उघडकीस आल्याचा दावा

मिळालेल्या माहितीनुसार, एका तक्रारदाराने संबंधित ठिकाणी जाऊन पाहणी केली असता हा कथित प्रकार उघडकीस आल्याचे सांगितले जात आहे. त्यानंतर या घटनेचा व्हिडीओ व्हायरल झाल्याने रुग्णालय प्रशासनाच्या कार्यपद्धतीवर प्रश्न उपस्थित केले जात आहेत. व्हिडीओमध्ये दिसणारी व्यक्ती कायमस्वरूपी वैद्यकीय अधिकारी वैभव म्हस्के असल्याचा दावा सूत्रांकडून केला जात आहे. मात्र, संबंधित व्यक्तीची ओळख, घटनेची वेळ, नेमकी परिस्थिती आणि मद्यप्राशन झाले होते का, याची अधिकृत पडताळणी होणे आवश्यक आहे.

हे सुद्धा वाचा : पिंपरी-चिंचवडकरांनो, पाणी जपून वापरा! १० टक्के पाणीकपातीला सुरुवात; अपव्यय केल्यास…; आयुक्तांनी दिला इशारा

महापालिका प्रशासन जबाबदारी निश्चित करणार का?

महापालिकेच्या रुग्णालयात अशा प्रकारच्या गंभीर आरोपांमुळे प्रशासनाने तातडीने दखल घेणे अपेक्षित आहे. संबंधित व्हिडीओची सत्यता तपासून, आवश्यक असल्यास सीसीटीव्ही फुटेज आणि ड्युटीवरील कर्मचाऱ्यांची माहिती पडताळून निष्पक्ष चौकशी करावी अशी मागणी नागरिकांकडून केली जात आहे.