धक्कादायक प्रकार; भररस्त्यात सोशल मीडिया इन्फ्लुएन्सरची गोळ्या झाडून हत्या; हत्येची जबाबदारी घेणारी पोस्ट व्हायरल
अमृतसर : पंजाबच्या अमृतसरमध्ये प्रसिद्ध सोशल मीडिया इन्फ्लुएन्सर आणि मेकअप आर्टिस्ट मॅड संधू यांची गोळ्या झाडून हत्या करण्यात आली. शनिवारी (३ ऑक्टोबर) सायंकाळी लोहारका रोडवर दुचाकीवरून आलेल्या दोन अज्ञात हल्लेखोरांनी त्यांच्यावर गोळीबार केला. गंभीर जखमी झालेल्या संधू यांना तातडीने खासगी रुग्णालयात दाखल करण्यात आले; मात्र उपचारादरम्यान त्यांचा मृत्यू झाला. पोलिसांनी हल्लेखोरांचा शोध सुरू केला असून, हत्येमागील कारण अद्याप स्पष्ट झालेले नाही. पोलिसांनी या प्रकरणात काही महत्त्वाचे धागेदोरे हाती लागल्याचे सांगितले आहे.
मॅड संधू हे त्यांची कार धुण्यासाठी लोहारका रोडवरील कार वॉश सेंटरजवळ आले होते. त्यावेळी दुचाकीवरून आलेल्या दोन हल्लेखोरांनी त्यांच्यावर जवळून गोळीबार केला आणि घटनास्थळावरून पसार झाले. प्राथमिक माहितीनुसार दोन ते तीन गोळ्या झाडण्यात आल्याचे पोलिसांनी सांगितले आहे. गोळीबारात संधू गंभीर जखमी झाले. त्यांना रुग्णालयात नेण्यात आले; मात्र त्यांचा मृत्यू झाला. पोलिसांनी घटनास्थळावरील सीसीटीव्ही फुटेज तपासण्यास सुरुवात केली असून, हल्लेखोरांची ओळख पटवण्यासाठी अनेक पथके काम करत आहेत.
दरम्यान, सोशल मीडिया पोस्टद्वारे कुख्यात गुंड गोल्डी ढिल्लो आणि जग्गा तरनतारन यांनी मॅड संधू यांच्या हत्येची जबाबदारी स्वीकारल्याचा दावा करण्यात आला आहे. या पोस्टमध्ये संधू यांच्या सोशल मीडिया कंटेंटबाबत आक्षेप असल्याचे नमूद करण्यात आल्याचे वृत्त आहे. मात्र, या पोस्टची स्वतंत्रपणे अधिकृत पुष्टी झालेली नाही.
मॅड संधू हे सोशल मीडिया आणि मेकअप क्षेत्रातील परिचित नाव होते. त्यांच्या सोशल मीडिया कंटेंट, कपडे आणि काही जुन्या व्हिडीओंवरून यापूर्वी वाद निर्माण झाला होता. एका निहंग गटाकडून त्यांच्या कंटेंटबाबत आक्षेप आणि इशारा देण्यात आल्याचेही समोर आले आहे. मात्र, या जुन्या वादाचा हत्येशी संबंध आहे, असे पोलिसांनी अद्याप स्पष्ट केलेले नाही. पोलिसांनी कुटुंबीयांचे जबाब नोंदवून गुन्हा दाखल केला आहे. हल्लेखोरांची ओळख, हत्येचा नेमका हेतू आणि सोशल मीडिया पोस्टमागील व्यक्तींची भूमिका याबाबत तपास सुरू आहे.
.png "Videos"){kind=small}
