मोशीत महिलेचा निर्घृण खून, चेहरा विद्रूप करून ओळख लपवण्याचा प्रयत्न; पोलिसांनी २४ तासांत उकलले खुनाचे गूढ

मोशीतील बोऱ्हाडेवाडी परिसरात धारदार शस्त्राने वार करून एका महिलेचा खून केल्याची धक्कादायक घटना उघडकीस आली आहे. तिची ओळख पटू नये म्हणून चेहराही विद्रूप करण्यात आला होता.

• मोशीतील बोऱ्हाडेवाडीत महिलेची निर्घृण हत्या
• चेहरा विद्रूप करून ओळख लपवली
• पोलिसांनी २४ तासांत उकलले खुनाचे गूढ

पिंपरी : मोशीतील बोऱ्हाडेवाडी परिसरात धारदार शस्त्राने वार करून एका महिलेचा खून केल्याची धक्कादायक घटना उघडकीस आली आहे. तिची ओळख पटू नये म्हणून चेहराही विद्रूप करण्यात आला होता. मात्र, गोपनीय माहिती आणि तांत्रिक विश्लेषणाच्या आधारे एमआयडीसी भोसरी पोलिसांनी मृत महिलेची ओळख पटवून खुनाच्या गुन्ह्याचा अवघ्या २४ तासांत उलगडा केला आहे. याप्रकरणी चार संशयितांना मंगळवारी (दि. १३ ऑक्टोबर) अटक करण्यात आली आहे.

 

प्रियंका आकाश कांबळे (वय ३०, रा. मोरे वस्ती, टॉवर लाइन, चिखली) असे खून झालेल्या महिलेचे नाव आहे. आकाश ऊर्फ घाऱ्या रमेश कांबळे (वय २८, रा. बोऱ्हाडेवाडी, मोशी), प्रथम बालाजी कांबळे (२२, रा. गव्हाणे वस्ती, भोसरी), रोहित दिनेश शिंदे (वय १९) आणि दिनेश मधुकर वाघमारे (वय १९, दोघे रा. बोऱ्हाडेवाडी, मोशी) अशी अटक केलेल्यांची नावे आहेत.

पोलिस उपायुक्त मारुती जगताप यांनी दिलेल्या माहितीनुसार, बोऱ्हाडेवाडी येथे सोमवारी (दि. १२ ऑक्टोबर) पहाटे अडीचच्या सुमारास एका अनोळखी महिलेचा मृतदेह आढळला. तिच्या मानेवर आणि चेहऱ्यावर धारदार शस्त्राने वार केले होते. चेहरा विद्रूप केल्यामुळे मृत महिलेची ओळख पटविण्याचे आव्हान पोलिसांसमोर होते. याप्रकरणी एमआयडीसी भोसरी पोलिस ठाण्यात अज्ञात व्यक्तीविरोधात खुनाचा गुन्हा दाखल करण्यात आला. गुन्ह्याचे गांभीर्य लक्षात घेऊन पोलिसांनी विशेष तपास पथक नेमले. गोपनीय माहिती आणि तांत्रिक विश्लेषणाच्या आधारे तपासाची दिशा निश्चित केली. त्यातून मृत महिला प्रियंका कांबळे असल्याचे निष्पन्न झाले. त्यानंतर संशयितांचा माग काढून चार संशयितांना अटक केली. संशयितांना न्यायालयात हजर केले असता १६ ऑक्टोबरपर्यंत पोलिस कोठडी सुनावण्यात आली आहे.

हे सुद्धा वाचा : धक्कादायक ! सरकारी नोकरीचे आमिष दाखवून अत्याचार, ‘तो’ व्हिडिओ व्हायरल

पोलिस उपायुक्त रोहिदास पवार, मारुती जगताप, सहायक आयुक्त सुधाकर यादव यांच्या मार्गदर्शनाखाली वरिष्ठ पोलिस निरीक्षक गणेश जामदार, पोलिस निरीक्षक भोजराज मिसाळ, उपनिरीक्षक बालाजी जोनापल्ले, पोलिस अंमलदार प्रशांत सोरटे, संजय जरे, चंद्रकांत गवारी, गणेश बोऱ्हाडे, स्वप्नील शेलार, राहुल लोखंडे, सुनील चौधरी, बाजीराव सानप, नितीन खेसे, भागवत शेप, गजानन आढे, आशिष गोपी, स्वप्नील झनकर, पवन कोंडेदेशमुख, प्रवीण मुळुक, अमोल दातार, राजू जाधव व अरुणा खंदारे यांच्या पथकाने ही कामगिरी केली आहे.

पती- पत्नीमध्ये कौटुंबिक वाद होते. यातून पती आकाश कांबळे याने साथीदारांच्या मदतीने प्रियंक कांबळेचा खून केल्याचे प्राथमिक तपासातून समोर आले आहे. यात सखोल चौकशी आणि तपास करण्यात येत आहे. – सुधाकर यादव, सहायक पोलिस आयुक्त.