आठवीच्या विद्यार्थिनीची गणवेशाच्या ओढणीने गळफास घेऊन आत्महत्या; हरसूल परिसरात खळबळ
नाशिक : त्र्यंबकेश्वर तालुक्यातील काथवडपाडा येथील अवघ्या १३ वर्षांच्या विद्यार्थिनीने राहत्या घरी शाळेच्या गणवेशाच्या ओढणीने गळफास घेऊन आत्महत्या केल्याची अत्यंत दुर्दैवी व धक्कादायक घटना उघडकीस आली आहे. या घटनेमुळे हरसूल व बोरीपाडा परिसरात मोठी हळहळ व्यक्त केली जात असून सर्वत्र शोककळा पसरली आहे. लावण्या लहुदास भोंडवे (वय १३, रा. काथवडपाडा, पो. देवडोंगरा, ता. त्र्यंबकेश्वर, जि. नाशिक) असे मृत विद्यार्थिनीचे नाव आहे.
मिळालेल्या माहितीनुसार, लावण्या ही बोरीपाडा येथील सरकारी आदिवासी आश्रमशाळेत इयत्ता आठवीच्या वर्गात शिक्षण घेत होती. सध्या शाळेत चाचणी परीक्षा सुरू आहे. सामान्यतः आश्रमशाळेतील इतर विद्यार्थी तेथेच मुक्कामी राहून अभ्यास करतात; मात्र घर जवळ असल्याने लावण्या ही दररोज शाळेतून घरी ये-जा करत असे. गुरुवारी (दि. ३) सायंकाळी साडेसात वाजताच्या सुमारास शाळेतून घरी परतल्यानंतर लावण्याने काथवडपाडा येथील राहत्या घरी छताच्या वास्याला शाळेच्या ड्रेसच्या ओढणीने गळफास लावून घेतला. कुटुंबीयांच्या ही बाब निदर्शनास येताच त्यांनी तत्काळ आरडाओरड करत तिला खाली उतरवले आणि उपचारासाठी हरसूल येथील प्राथमिक आरोग्य उपकेंद्रात दाखल केले. मात्र, तेथील डॉक्टरांनी वैद्यकीय तपासणी करून तिला मृत घोषित केले.
आत्महत्येचे कारण अद्यापही गुलदस्त्यात
हरसूल आरोग्य केंद्रात रात्रीच्या वेळी शवविच्छेदन करण्याची सुविधा उपलब्ध नसल्यामुळे, शुक्रवारी (दि. ४ सप्टेंबर) सकाळी शवविच्छेदन उरकून मृतदेह शोकाकुल नातेवाईकांच्या स्वाधीन करण्यात आला. ऐन परीक्षेच्या काळात आणि लहान वयात मुलीने एवढे टोकाचे पाऊल का उचलले, या आत्महत्येचे नेमके कारण अद्याप समोर येऊ शकलेले नाही. मोलमजुरी करणाऱ्या पालकांच्या मुलीने आत्महत्या का केली, याचा शोध हरसूल पोलीस घेत आहेत. याप्रकरणी तिचे वडील लहुदास कृष्णा भोंडवे (वय ३५, व्यवसाय- मजुरी, रा. काथवडपाडा) यांनी दिलेल्या खबरीवरून हरसूल पोलिस ठाण्यात अकस्मात मृत्यूची नोंद करण्यात आली आहे. पोलिस उपनिरीक्षक वडघुले हे या घटनेचा पुढील अधिक तपास करत आहेत.
.png "Videos"){kind=small}
