पिंपळे गुरवमध्ये मालमत्तेच्या वादातून रक्तरंजित थरार; सावत्र नातवाने केली आजीची हत्या

प्रॉपर्टीमध्ये हिस्सा देत नसल्याच्या रागातून सावत्र नातवाने आपल्या ६५ वर्षीय सावत्र आजीची हत्या केल्याची धक्कादायक घटना पिंपळे गुरव येथे घडली आहे. ओंकार किसन शिंगोरे (वय २६) असे आरोपीचे नाव आहे.

• मालमत्तेच्या वादातून रक्तरंजित थरार
• सावत्र नातवाने केली आजीची हत्या
• पिंपळे गुरवमधील घटनेनं खळबळ

पिंपरी : राज्यासह देशभरात गुन्हेगारीच्या घटना वाढल्या असून, दररोज वेगवेगळ्या भागात गुन्हेगारीच्या गंभीर घटना घडत आहेत. अशातच आता प्रॉपर्टीमध्ये हिस्सा देत नसल्याच्या रागातून सावत्र नातवाने आपल्या ६५ वर्षीय सावत्र आजीची हत्या केल्याची धक्कादायक घटना पिंपळे गुरव येथे घडली आहे. ओंकार किसन शिंगोरे (वय २६) असे आरोपीचे नाव असून, मंगल बाबुराव शिंगोरे (वय ६५) असे मृत आजीचे नाव आहे. शुक्रवारी (दि. ९) सकाळी साडेआठ ते नऊच्या सुमारास ही घटना घडल्याची प्राथमिक माहिती आहे.

 

पिंपळे गुरव येथील कृष्णा चौकात गणेश सहकारी बँकेच्या शेजारील इमारतीत शिंगोरे कुटुंबीय राहत होते. प्रॉपर्टीतील हिस्सा देण्याच्या मुद्द्यावरून आरोपी आणि त्याच्या सावत्र आजीमध्ये वाद होता. याच कारणातून आरोपीने आजीची हत्या केल्याची माहिती समोर आली आहे.

खून केल्यानंतर स्वतःच पोलीस ठाण्यात हजर

आजीची हत्या केल्यानंतर आरोपी ओंकार शिंगोरे स्वतः सांगवी पोलीस ठाण्यात गेला. तेथे त्याने आजीचा खून केल्याची माहिती पोलिसांना दिल्याचे समजते. या घटनेमुळे परिसरात खळबळ उडाली असून, सांगवी पोलीस पुढील तपास करीत आहेत.

हे सुद्धा वाचा : सांगलीत महाविकास आघाडीचा प्रचार मेळावा; हर्षदा देशमुख-जाधव आणि जयंत आसगावकर यांच्या विजयाचा निर्धार

आरोपीवर यापूर्वीही गंभीर गुन्हे

पोलिसांकडून मिळालेल्या माहितीनुसार, आरोपी ओंकार शिंगोरे याच्यावर यापूर्वी खुनाचा एक गुन्हा, खुनाच्या प्रयत्नाचा गुन्हा तसेच अन्य गंभीर स्वरूपाचे गुन्हे दाखल आहेत. त्यामुळे या घटनेचे गांभीर्य वाढले आहे. प्रॉपर्टीच्या वादातून घडलेल्या या हत्येमागील नेमकी पार्श्वभूमी, घटनाक्रम आणि अन्य बाबींचा पोलीस तपास करीत आहेत.

हे सुद्धा वाचा : अहिल्यानगरमधील खून प्रकरणात मोठी अपडेट! २४ तासांत दोघे आरोपी पोलिसांच्या जाळ्यात