पोलिसाच्या मारहाणीनंतर थेट कोमात, शुद्धीवर आल्यानंतर गुन्हा दाखल; नेमकं काय घडलं?

एका पोलीस कर्मचाऱ्याने कारचालकाला बेदम मारहाण केल्याची धक्कादायक घडना घडली आहे. त्याला बेशुद्ध होईपर्यंत बेदम मारहाण करुन जीवे ठार मारण्याचा प्रयत्न केल्याचा प्रकार समोर आला आहे.

पुणे : राज्यासह देशभरात गुन्हेगारी वाढली असून, दररोज वेगवेगळ्या भागात खून, खुनाचा प्रयत्न, मारहाण यासारख्या घटना घडत आहेत. वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता एक मोठी बातमी समोर आली आहे. कुटूंबियाला देवदर्शनास घेऊन गेल्यानंतर एसटी स्थानकावर पोलिस कर्मचारी व पत्नीमध्ये वाद झाला आणि त्याने पत्नीला मारहाण सुरू केली. तेव्हा त्यांचा वाद पाहून एकाने हा वाद सोडविण्यासाठी मध्ये उडी घेतली. त्यावेळी पोलीस अंमलदाराने त्याला बेशुद्ध होईपर्यंत बेदम मारहाण करुन जीवे ठार मारण्याचा प्रयत्न केल्याचा प्रकार समोर आला आहे.

तो कारचालक तब्बल अडीच महिने रुग्णालयात बेशुद्ध अवस्थेत होता. तो नुकताच शुद्धीवर आला आणि त्यानंतर त्याने करमाळा पोलीस ठाण्यात खुनाचा प्रयत्न केल्याचा गुन्हा दाखल केला आहे. या प्रकरणात आता गुन्हा दाखल होऊन आरोपी पोलिसाला अटक झाली आहे. त्याच्यावर अटकेची कारवाई झाल्यानंतर या पोलिस अंमलदाराला पोलीस खात्यातून निलंबितही करण्यात आले आहे. अमित सुरेश जाधव (वय ४२, रा. भवानी पेठ) असे या पोलिसाचे नाव आहे. त्याला पोलिस खात्यातून निलंबीत करण्यात आले आहे. पोलिस उपायुक्त पी.आर पाटील यांनी याबाबतचे आदेश दिले आहेत. याबाबत शुभम चंद्रकांत भोसले (वय २७,रा. मंगळवार पेठ) यांनी करमाळा पोलीस ठाण्यात तक्रार दिली आहे.

पोलिसांच्या माहितीनुसार, शुभम भोसले हे चालक म्हणून काम करतात. ३१ मे २०२६ रोजी ते, त्यांचा मित्र प्रथमेश चव्हाण यांची इर्टिका गाडी घेऊन अमित जाधव यांच्या कुटुंबातील त्यांची पत्नी, आई, बहिण व दोन मुलांसह देवदर्शनासाठी घेऊन गेले होते. काही ठिकाणी फिरुन रात्री साडेनऊ वाजता ते करमाळा एस टी बसस्थानकाजवळ चहा, नाष्टा करण्यासाठी थांबले. सुरेश जाधव हा अचानक चिडला. त्याने त्याच्या पत्नीशी वाद घातला त्यांना मारहाण सुरू केली. हा प्रकार पाहून शुभम व त्याचा भाचा प्रथमेश त्यांची भांडणे सोडवण्याचा खूप वेळ प्रयत्न करु लागले. परंतु, अमित ऐकत नव्हता. त्यांची भांडणे सोडविताना त्याने शुभम यांना लाथाबुक्क्यांनी मारहाण करुन शिवीगाळ करु लागला. बाजुला पडलेल्या झाडाच्या काठीने शुभम यांच्या हातावर जोरात मारले. त्यानंतर पायावर, डोक्यात काठी मारल्याने ते खाली पडले. डोक्यात काठी मारल्यामुळे डोक्यातून रक्तस्त्राव होऊन ते बेशुद्ध पडले. करमाळा येथे उपचार घेतल्यानंतर त्यांना पुण्यात उपचारासाठी दाखल केले होते.

हे सुद्धा वाचा : जुन्या किरकोळ कारणावरून तरुणाचा खून, आईने आरडाओरड केली पण…; नांदेड जिल्ह्यातील घटनेनं खळबळ