पार्टीसाठी पैसे न दिल्याचा राग अनावर! मित्राकडून १८ वर्षीय तरुणावर चाकूने सपासप वार; डोळ्यांवरही केला हल्ला

राज्यासह देशभरात गुन्हेगारी वाढली असून, अशातच आता पार्टी देण्यासाठी पैसे नसल्याचे सांगितल्याचा राग मनात धरून मित्रानेच १८ वर्षीय तरुणाच्या छातीत चाकू खुपसल्याचा धक्कादायक प्रकार समोर आला आहे.

• पार्टीसाठी पैसे न दिल्याचा राग अनावर
• १८ वर्षीय तरुणावर चाकूने सपासप वार
• डोळ्यांवरही केला हल्ला

छत्रपती संभाजीनगर : राज्यासह देशभरात गुन्हेगारी वाढली असून, दररोज वेगवेगळ्या भागात खून, खुनाचा प्रयत्न, मारहाण यासारख्या घटना घडत आहेत. अशातच आता पार्टी देण्यासाठी पैसे नसल्याचे सांगितल्याचा राग मनात धरून मित्रानेच १८ वर्षीय तरुणाच्या छातीत चाकू खुपसल्याचा धक्कादायक प्रकार समोर आला आहे. त्यानंतर उपचारासाठी घाटीत नेण्याचा बहाणा करून त्याला हमालवाड्यातील मोकळ्या मैदानात नेले. तेथे त्याच्या डोळ्यात चाकू खुपसत पाठ व शरीरावर वार करुन गंभीर जखमी केले आहे.

 

रक्तबंबाळ अवस्थेत तरुणाने दुचाकीस्वाराकडून लिफ्ट घेवून घाटी रुग्णालय गाठले. ही घटना १० ऑक्टोबर रोजी सायंकाळी पाच वाजेच्या सुमारास घडली आहे. याप्रकरणी अल्पवयीन यश हिवराळे आणि त्याच्या तीन साथीदारांविरुद्ध हर्सल पोलिस ठाण्यात गुन्हा दाखल करण्यात आला आहे. प्रकरणात सय्यद इम्रान सय्यद गफूर (३७, रा. जहांगीर कॉलनी, हसुल) यांनी फिर्याद दिली आहे.

फिर्यादीचा मुलगा फैजान सय्यद ईमान (वय १८, रा. जहांगीर कॉलनी, हर्सल) हा शनिवारी सायंकाळी पाचच्या सुमारास कपडे खरेदीसाठी सिटी चौकाकडे जात होता. एकतानगर, हसूल येथील सानिया मेडिकलजवळ त्याचा मित्र यश हिवराळे थांबलेला होता. यशने फैजानला जवळ बोलावून बऱ्याच दिवसांपासून पार्टी दिली नसल्याचे म्हणत पैशांची मागणी केली. फैजानने पैसे नसल्याचे सांगताच यशने शिवीगाळ करून वाद घातला. पार्टी दे, नाहीतर येथेच खतम करतो, अशी धमकी देत त्याच्या छातीत चाकू खुपसला. छातीतून रक्तस्राव सुरू झाल्यानंतर यशने फैजानला घाटीत नेतो, असे सांगितले. त्याच्यासोबत असलेल्या अन्य तीन मित्रांनी फैजानला दुचाकीवर बसवले; मात्र घाटीकडे नेण्याऐवजी त्याला रेल्वे पटरीजवळील हमालवाड्यातील मोकळ्या मैदानात नेले.

हे सुद्धा वाचा : नागरिकांनो, पाणी जपून वापरा! धरणांत अवघा ६.४४ टक्के पाणीसाठा; पुढील १० महिने पाणी जपून वापरण्याचे आवाहन

डोळ्यात खुपसला चाकू 

मैदानात यश हिवराळे याच्यासह त्याच्या तीन साथीदारांनी फैजानला खाली पाडले. पार्टी न दिल्याच्या कारणावरून त्याच्या उजव्या डोळ्यात चाकू खुपसला, तसेच पाठ व शरीरावर वार केले. त्यानंतर त्याला तेथेच सोडून चौघे हल्लेखोर तेथून पळून गेले. या घटनेमुळे मोठी खळबळ उडाली आहे.