बारामतीत 16 वर्षीय विद्यार्थिनीची इमारतीवरून उडी मारून आत्महत्या; परिसरात खळबळ
बारामती : भिगवण रोड परिसरातील एका निवासी इमारतीच्या चौथ्या मजल्यावरील टेरेसवरून १६ वर्षीय विद्यार्थिनीने उडी मारल्याची धक्कादायक घटना शुक्रवारी (दि. ४) पहाटे घडली आहे. गंभीर जखमी अवस्थेत तिला वैद्यकीय महाविद्यालय, बारामती येथे उपचारासाठी दाखल करण्यात आले होते. मात्र उपचारादरम्यान पहाटे सुमारे पाच वाजता तिचा मृत्यू झाला आहे. गेल्या आठवड्यापूर्वी एका अल्पवयीन मुलीने देखील अशाच प्रकारे गच्चीवरून उडी मारून आत्महत्या केली होती, या घटनेनंतर ही दुसरी आत्महत्या आहे, त्यामुळे बारामती परिसरात पालकांमध्ये चिंतेचे वातावरण निर्माण झाले आहे.
मृत विद्यार्थिनी बारामतीतील एका महाविद्यालयात इयत्ता अकरावी विज्ञान शाखेत शिक्षण घेत होती. सध्या तिच्या परीक्षा सुरू होत्या. मागील काही दिवसांपासून अभ्यास होत नसल्याने तसेच परीक्षेचे टेन्शन येत असल्याचे ती आई-वडिलांना सांगत होती, अशी प्राथमिक माहिती पालकांनी पोलिसांना दिली आहे.
गुरुवारी रात्री ती सुमारे साडेबारा वाजेपर्यंत अभ्यास करीत होती. त्यानंतर टेरेसवर जाऊन येते, असे सांगून ती चौथ्या मजल्यावरील गच्चीवर गेली. बराच वेळ होऊनही ती खाली न आल्याने वडील तिला पाहण्यासाठी वर गेले. त्यावेळी ती टेरेसच्या कड्यावर बसलेली दिसली. वडिलांनी आवाज दिल्यानंतर तिने अचानक खाली उडी मारल्याची माहिती प्राथमिक चौकशीत समोर आली आहे. गंभीर जखमी झाल्यानंतर आई-वडील व शेजाऱ्यांच्या मदतीने तिला तातडीने रुग्णालयात दाखल करण्यात आले. उपचारादरम्यान काही काळ ती शुद्धीवर होती. मात्र त्यानंतर प्रकृती गंभीर झाल्याने तिचा मृत्यू झाला.
या घटनेप्रकरणी कुटुंबीयांनी सध्या कोणत्याही व्यक्तीविरुद्ध संशय किंवा तक्रार व्यक्त केलेली नाही. मात्र अभ्यास व परीक्षेचा ताण हे प्राथमिक कारण सांगितले जात असले तरी आत्महत्येमागील नेमके कारण अद्याप स्पष्ट झालेले नाही. यापूर्वीही सदर विद्यार्थिनी घरातून निघून गेल्याची नोंद पोलिसांकडे असल्याने त्या प्रकरणातील कागदपत्रे व तपासातील बाबींची पडताळणी केली जात आहेत. घटनास्थळ, सीसीटीव्ही फुटेज, वैद्यकीय कागदपत्रे तसेच डिजिटल माहितीची तपासणी करण्यात येत आहे. पालक, नातेवाईक, मैत्रिणी, सहाध्यायी व शिक्षकांचे जबाबही घेण्यात येत आहेत.
बारामती शहर पोलिसांनी अकस्मात मृत्यूची नोंद करून पुढील तपास सुरू केला आहे. अल्पवयीन विद्यार्थिनीची ओळख गोपनीय ठेवण्यात आली असून तिचे नाव, छायाचित्र किंवा ओळख पटेल अशी माहिती प्रसिद्ध करू नये, असे आवाहन पोलिसांनी केले आहे.
.png "Videos"){kind=small}
