रविवार, 20 सप्टेंबर 2026
मध्यरात्री बसमध्ये तरुणीवर अत्याचाराचा प्रयत्न; खासगी बसच्या वाहकाने घेतला एकटेपणाचा फायदा (संग्रहित फोटो)
नागपूर : कुटुंबीयांना भेटण्यासाठी गावी जात असलेल्या तरुणीशी खासगी ट्रॅव्हल्स बसच्या वाहकाने अश्लील चाळे केले. मध्यरात्री बसमधील बहुतांश प्रवासी झोपलेले असताना तिच्या एकटेपणाचा फायदा घेत अत्याचाराचा प्रयत्न केला. तरुणीने आरडाओरड करून प्रतिकार केल्याने वाहक घाबरला आणि पुढील अनर्थ टळला. ही संतापजनक घटना विजयंत ट्रॅव्हल्सच्या बसमध्ये घडली.
पोलिसांनी दिलेल्या माहितीनुसार, पीडित २१ वर्षीय तरुणी मूळची मध्यप्रदेशातील मंडला येथील असून, नागपुरातील एका कुटुंबाकडे घरकाम करते. अधूनमधून ती कुटुंबीयांना भेटण्यासाठी गावी जाते. ७ सप्टेंबर रोजी गावी जाण्यासाठी ती एमपी बसस्थानकावर पोहोचली. रात्री १०.३० वाजताच्या सुमारास ती विजयंत ट्रॅव्हल्सच्या बसमध्ये (एमएच-४०/ए.के.-६६९९) बसली. बस पुढील प्रवासाला निघाल्यानंतर मध्यरात्रीनंतर बहुतांश प्रवासी झोपी गेले.
बस निर्जन परिसरातून जात असताना वाहक तिच्या आसपास घुटमळत होता. त्याने तरुणीशी अश्लील संभाषण सुरू करून आक्षेपार्ह वर्तन करण्यास सुरूवात केली. या प्रकारामुळे तरुणी घाबरली. मात्र, तिने धैर्याने त्याला विरोध केला.
तिकीट, कर्मचाऱ्यांच्या नोंदी तपासल्या
संशयित वाहकाची ओळख पटवण्यासाठी पोलिसांकडून बसचे तिकीट बुकिंग, कर्मचारी आणि प्रवासाशी संबंधित नोंदी तपासल्या जात आहेत. घटनेच्या वेळी बसमध्ये कोणकोणते कर्मचारी उपस्थित होते, याचीही माहिती घेतली जात आहे.
दिल्लीच्या घटनेनंतरही प्रश्न कायम
२०१२ मध्ये दिल्लीतील धावत्या बसमध्ये घडलेल्या अमानुष अत्याचाराच्या घटनेनंतर सार्वजनिक वाहतुकीत महिलांच्या सुरक्षेचा प्रश्न देशभर ऐरणीवर आला. बसमध्ये चालक वाहकांसह कर्मचाऱ्यांची पडताळणी, प्रवाशांच्या सुरक्षेसाठी उपाययोजना आणि तक्रारींची तातडीने दखल यावर भर देण्यात आला. नागपुरातील ताज्या घटनेमुळे रात्रीच्या बसप्रवासात महिला प्रवाशांच्या सुरक्षेचा मुद्दा पुन्हा चर्चेत आला आहे.
रायगडमध्ये अल्पवयीन मुलीवर अत्याचार
दुसऱ्या एका घटनेत, रायगड जिल्ह्यातील म्हसळा तालुक्यात १७ वर्षीय अल्पवयीन मुलीवर वारंवार लैंगिक अत्याचार केल्याचा गंभीर प्रकार समोर आला आहे. या प्रकरणी पाच जणांविरोधात म्हसळा पोलीस ठाण्यात गुन्हा दाखल करण्यात आला आहे. विशेष म्हणजे, या पाच आरोपींपैकी दोन आरोपी अल्पवयीन असल्याची माहिती आहे. पोलिसांनी आरोपींना ताब्यात घेतल्याचे सांगण्यात येत आहे.
