Cyber Crime News : निवृत्त शिक्षकाची फसवणूक; ‘डिजिटल अरेस्ट’ची भीती दाखवून लुटले

सायबर भामट्यांनी तब्बल ९७ लाख ८३ हजार रुपयांना गंडा घातल्याची धक्कादायक घटना उघडकीस आली आहे. याप्रकरणी सेलु पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.

Crime News : सेलू : सेलू शहरातील एका ७० वर्षीय निवृत्त शिक्षकाला ‘डिजिटल अरेस्ट’ची (Cyber Crime) भीती दाखवून सायबर भामट्यांनी तब्बल ९७ लाख ८३ हजार रुपयांना गंडा घातल्याची धक्कादायक घटना उघडकीस आली आहे. याप्रकरणी सेलु पोलीस ठाण्यात अज्ञात आरोपीविरुद्ध गुन्हा दाखल करण्यात आला असून संपूर्ण तालुक्यात या घटनेने खळबळ उडाली आहे.

 

मौलाना आझाद नगर येथील रहिवासी नागनाथ शंकरराव कुरमुडले (७०, निवृत्त शिक्षक) यांना ४ मार्च ते ८ एप्रिल २०२६ या कालावधीत विविध मोबाईल क्रमांकावरून फोन आले. आरोपींनी ‘रवि शर्मा’ व इतर असल्याचे भासवून फिर्यादीला व्हॉट्सअॅप व्हिडिओ कॉलद्वारे संपर्क साधला. तुमच्या आधार कार्डचा वापर करून मुंबईत सीम कार्ड काढण्यात आले असून, कॅनरा बँकेच्या खात्यावरून दोन कोटी रुपयांचा आर्थिक गैरव्यवहार झाला आहे. तुम्ही नरेश गोयल याला पैसे पाठवून २० लाख रुपये कमिशन घेतले आहे, अशी खोटी बतावणी आरोपींनी केली. अटक करण्याची भीती दाखवून आणि फिर्यादीच्या कौटुंबिक पार्श्वभूमीची माहिती काढून आरोपींनी त्यांना मानसिक दबावाखाली ठेवले.

हे देखील वाचा : श्रेयवादाचे राजकारण, भाजपात नाराजी; पक्ष संघटना कमकुवत अन् कार्यकर्ते निरुत्साही

नागरिकांनी जागरूक राहण्याचे आवाहन
कोणत्याही शासकीय यंत्रणेकडून अशा प्रकारे व्हिडिओ कॉलवर कोणालाही ‘डिजिटल अरेस्ट’ केले जात नाही. पैशांची मागणी करणाऱ्या संशयास्पद फोन कॉल्सना बळी पडू नका आणि त्वरित नजीकच्या पोलीस ठाण्याशी संपर्क साधा, असे आवाहन पोलीस प्रशासनाकडून करण्यात आले आहे.

पोलिस तपासाला वेग; आरोपींचा शोध सुरू

आरोपींनी फिर्यादीला त्यांच्या पोस्टातील एफडी (FD) मोडायला लावल्या, पेन्शनवर कर्ज घेण्यास भाग पाडले, इतकेच नव्हे तर त्यांच्या पत्नीचे सोन्याचे दागिने गहाण ठेवून त्यावरही कर्ज काढायला लावले, ही रक्कम वेळोवेळी आरटीजीएस (RTGS) आणि चेकद्वारे वेगवेगळ्या बँक खात्यांवर भरून घेतली. ही घटना कोणाला सांगितली तर तुमची पेन्शन बंद करू आणि तुमच्या मुलाची नोकरी घालवू, अशी धमकीही आरोपींनी दिली होती. सततच्या मानसिक त्रासाला कंटाळून अखेर फिर्यादीने पोलिसात धाव घेतली. या फसवणुकीत फिर्यादीचे एकूण ९७ लाख ८३ हजार रुपये गेले आहेत. फिर्यादीच्या तक्रारीवरून सेलु पोलीस ठाण्यात भारतीय न्याय संहिता (BNS) कलम ३१६(२), ३१८(४), ३५१(२) (३), ६१ (२) आणि माहिती तंत्रज्ञान कायदा कलम -६६ (सी), ६६ (डी) नुसार गुन्हा दाखल करण्यात आला आहे. पोलीस निरीक्षक दीपक बोरसे यांच्या मार्गदर्शनाखाली सपोनि सुनील पुंगळे या प्रकरणाचा अधिक तपास करत आहेत.

हे देखील वाचा : “खरातसोबत राजकीय लोकांचेही व्हिडीओ आहेत का? रोहित पवारांच्या प्रश्नांने उंचावल्या भुवया