शुक्रवार, 2 ऑक्टोबर 2026
सौजन्य फोटो - सोशल मीडीया
रायगड : सहलीचा आनंद लुटण्यासाठी हसत-खेळत घराबाहेर पडलेल्या आळंदीतील आठ विद्यार्थ्यांवर दिवेआगरच्या समुद्रकिनारी काळाने घाला घातला. गुरुवारी सायंकाळी समुद्रात उतरलेल्या विद्यार्थ्यांपैकी आठ जण पाण्याच्या प्रवाहात ओढले गेले आणि त्यांचा बुडून मृत्यू झाला. या दुर्घटनेने विद्यार्थी, पालक आणि संपूर्ण परिसरावर शोककळा पसरली आहे.
या दुर्घटनेत मृत्युमुखी पडलेल्या सुमित भरत अहिरे याच्या आठवणी सांगताना त्याचे मामा मुकेश माळी यांना अश्रू अनावर झाले. सुमितने कधीही कोणत्याही गोष्टीसाठी हट्ट केला नव्हता. मात्र, पहिल्यांदाच त्याने दिवेआगरच्या सहलीला जाण्याचा हट्ट केला आणि कुटुंबीयांनी त्याला परवानगी दिली. सुमितला इंजिनिअर व्हायचे होते. त्यासाठी त्याने विनर्स अकॅडमीत प्रवेश घेतला होता आणि अकरावीपासून JEE परीक्षेची तयारी सुरू केली होती. एकुलता एक असलेला सुमित अभ्यासासोबतच आई-वडिलांचीही काळजी घेत असे. नुकताच त्याचा वाढदिवसही झाला होता. मात्र, दिवेआगरची ही सहल त्याची अखेरची ठरली.
विनर्स अकॅडमीचे ४८ विद्यार्थी आणि शिक्षकांचा ग्रुप रायगड किल्ला आणि दिवेआगर येथे सहलीसाठी गेला होता. या गटात २५ मुले, १७ मुली आणि सहा शिक्षकांचा समावेश होता. दिवसभर पर्यटन केल्यानंतर विद्यार्थी दिवेआगर समुद्रकिनारी गेले. सायंकाळी काही विद्यार्थी समुद्रात उतरले. त्यावेळी पाण्याच्या खोलीचा आणि समुद्राच्या प्रवाहाचा अंदाज न आल्याने काही विद्यार्थी पाण्यात ओढले गेले. या दुर्घटनेत राजवीर वहिले, सोहम भांडवलकर, कौस्तुभ दौंड, यश वानखेडे, कैवल्य वासनकर, तन्मय वहिले, सुमित अहिरे आणि प्रणव बनसोडे यांचा मृत्यू झाला.
आठ विद्यार्थ्यांच्या मृत्यूनंतर विनर्स अकॅडमीने सहलीचे नियोजन करताना आवश्यक सुरक्षा निकष पाळले होते का, असा प्रश्न उपस्थित झाला आहे. अकॅडमी सुरू करताना आवश्यक परवानग्या घेण्यात आल्या होत्या का, याचीही चौकशी सुरू आहे. विद्यार्थ्यांना समुद्रात जाण्याची परवानगी होती का, त्यांना जीवरक्षक जॅकेट देण्यात आले होते का आणि समुद्रकिनारी त्यांच्यावर शिक्षकांची प्रत्यक्ष देखरेख किती होती, याचा तपास महत्त्वाचा ठरणार आहे. तसेच समुद्राची भरती-ओहोटी, पाण्याचा प्रवाह, सुरक्षित क्षेत्र, स्थानिक प्रशासनाचे इशारे आणि बचाव व्यवस्था याबाबत अकॅडमीने आधी माहिती घेतली होती का, याचाही तपास होण्याची शक्यता आहे.
सहलीदरम्यान विद्यार्थ्यांच्या सुरक्षेसाठी आपत्कालीन परिस्थितीची पूर्वतयारी करण्यात आली होती का, बचाव पथक किंवा स्थानिक जीवरक्षकांची उपलब्धता तपासली होती का, याबाबतही प्रश्न उपस्थित होत आहेत. या सर्व बाबींची अधिकृत चौकशी झाल्यानंतरच दुर्घटनेतील जबाबदारी निश्चित होऊ शकणार आहे. दरम्यान, विद्यार्थ्यांच्या मृत्यूने त्यांच्या कुटुंबीयांवर दुःखाचा डोंगर कोसळला आहे. हसत-खेळत सहलीला गेलेली मुले पुन्हा घरी न परतल्याने आळंदी परिसरात हळहळ व्यक्त होत आहे.
