घरगुती वादातून हॉटेल मालकाची निर्घृण हत्या; लोखंडी पाईप डोक्यात घातला अन्…

पुणे-सोलापूर राष्ट्रीय महामार्गा लगत आणि मस्तानी तलावाशेजारी असलेल्या हॉटेल सह्याद्रीच्या शेजारी असलेले अमृत गार्डन हे हॉटेलचे मालक विश्वास उघडे हे झोपेत होते.

पाटस : पुणे-सोलापूर राष्ट्रीय महामार्गात असलेल्या हॉटेल अमृत गार्डनमध्ये घरगुती कारणावरून वाद झाला. या वादातून हॉटेलमालकाची लोखंडी पाईप डोक्यात घालून निर्घृणपणे हत्या करण्यात आली. याप्रकरणी पाटस पोलिसांनी संशयित आरोपीला ताब्यात घेतले आहे.

अशरफ अस्लम शेख (वय २४, मूळ रा. सदर बाजार, सातारा, सध्या रा. हॉटेल सहयाद्री जवळ पाटस ता. दौड जि.पुणे) असे या संशयित आरोपीचे नाव असून, विश्वास बबन उघडे (वय ३१, रा. मांडवा, ता. वाशी, जि. धाराशिव) असे मृत व्यक्तीचे नाव आहे. ही घटना मंगळवारी (दि.१४) पहाटे ५ वाजण्याच्या आसपास हॉटेल सह्याद्री लगत असलेल्या अमृत गार्डन हॉटेलमध्ये घडली.

याबाबत पोलिसांनी दिलेली अधिक माहिती अशी की, पुणे-सोलापूर राष्ट्रीय महामार्गा लगत आणि मस्तानी तलावाशेजारी असलेल्या हॉटेल सह्याद्रीच्या शेजारी असलेले अमृत गार्डन हे हॉटेलचे मालक विश्वास उघडे हे झोपेत होते. तेव्हा आरोपींनी घरगुती कारणातून झालेल्या वादाचा राग मनात धरून त्याच्या डोक्यात लोखंडी पाईपने मारहाण करुन खून केला.

याबाबत सारिका सचिन गपाट (सध्या रा. पाटील वस्ती, केसनंद, वाघोली, ता. हवेली, जि. पुणे, मुळ रा. इंदापूर, ता. वाशी, जि. धाराशिव) यांनी यवत पोलीस ठाण्यात फिर्याद दिल्याने खुनाचा गुन्हा दाखल करण्यात आला. संबंधित आरोपीला पोलिसांनी ताब्यात घेतले आहे. या गुन्ह्याचा अधिक तपास पोलीस उपनिरीक्षक विजय कोल्हे हे करत आहेत.

चंद्रपुरातही धक्कादायक घटना

चंद्रपूर येथून एक धक्कादायक घटना समोर आली आहे. डॉ. बाबासाहेब आंबेडकर जयंती उत्सवानिमित्त सुरु असलेल्या मिरवणुकीत डीजेमध्ये नाचण्याच्या वादातून एकाची हत्या करण्यात आल्याची समोर आले आहे. या प्रकरणी पोलिसांनी पाच जणांना अटक केली आहे. ही घटना गांधी चौकात घडली आहे. या घटनेने आंबेडकर जयंती उत्सवाला गालबोट लागल्याचे बोलले जात आहे.