शनिवार, 24 ऑक्टोबर 2026
संग्रहित फोटो
यवतमाळ : प्रेमसंबंधाच्या कारणावरून झालेल्या वादातून १८ वर्षीय तरुणावर धारदार शस्त्राने हल्ला करून त्याचा निर्घण खून करण्यात आल्याची धक्कादायक घटना शनिवार पहाटे यवतमाळ शहरातील पिंपळगाव भागातील बालाजी पार्क परिसरात घडली आहे. रोहित वीरेंद्र मेश्राम (वय १८, रा. बोबडे ले-आऊट, पिंपळगाव, यवतमाळ) असे मृत तरुणाचे नाव आहे. आकाश विजय ओंकार यांनी लोहारा पोलिस ठाण्यात तक्रार दाखल केली आहे. तक्रारीनुसार या खूनप्रकरणी १५ आणि १६ वर्षे असलेल्या २ विधिसंघर्षग्रस्त बालकांवर खुनाचा गुन्हा दाखल करण्यात आला आहे. पहाटे घडलेल्या या थरारक घटनेनंतर लोहारा पोलिस स्टेशनचे ठाणेदार रोहित चौधरी यांनी पोलिस पथकासह घटनास्थळी दाखल होत घटनेचा आढावा घेत पंचनामा करत पुढील तपास सुरु केला होता.
दरम्यान, या खुनाच्या या घटनेत सामिल दोन्ही आरोपी फसार असल्याची माहिती पोलिसांच्या प्राथमिक तपासातून समोर आली आहे. याबाबत मिळालेल्या माहितीनुसार, आकाश विजय ओंकार (वय ३९) यांनी लोहारा पोलिस ठाण्यात दिलेल्या जबानी तक्रारीनुसार, शनिवारी रात्री सुमारे १ ते १.३० वाजतादरम्यान संशयितापैंकी एकाने रोहितच्या मोबाइलवर फोन करून त्याला घराबाहेर बोलावले. रोहित हा घराबाहेर गेल्यानंतर बराच वेळ परत न आल्याने त्याच्या कुटुंबीयांनी त्याचा शोध घेतला. घराबाहेर आरडाओरड ऐकू आल्याने वडील आकाश ओंकार यांनी बाल्कनीतून बाहेर पाहिले. त्यावेळी रोहितला त्याचे दोन्ही अल्पवयीन मित्र आपल्या हातातील शस्त्रांनी मारहाण करीत असल्याचे दिसल्याचा दावा पोलिसात दाखल तक्रारीमध्ये करण्यात आला आहे. ही घटना पाहताच रोहितचे कुटुंबीय घटनास्थळी धावुन गेले. तोपर्यंत दोन्ही हल्लेखोर पळून गेले होते. तर रोहित रक्ताच्या थारोळ्यात पडलेला होता. त्याच्या पोट व छातीवर गंभीर वार करण्यात आल्याने पोटातील आतड्या बाहेर आल्या. यादरम्यान कोणतीही हालचाल करीत नसल्याने त्याचा मृत्यू झाल्याचे कुटुंबीयांच्या निदर्शनास आले.
प्रेयसीसोबत बोलल्यावरून वाद
या घटनेमागे २ दिवसापूर्वी झालेल्या वादाचा संबंध असल्याचा संशय आकाश विजय ओंकार यांनी व्यक्त केला. पोलिसात दाखल तकारीनुसार गुरुवारी रात्री मृताचा विधिसंघर्षग्रस्त दोन मित्र रोहितच्या प्रेयसीसोबत मोबाइलवर बोलत असल्याचे रोहितने पाहिले होते. त्यावरून बालाजी पार्क भाग-२ परिसरात रोहित आणि संशयित मित्र यांच्यात वाद झाला होता. त्यावेळी रोहितने संशयित मित्राला थापड मारल्याची माहिती आकाश ओंकार यांना होती. ही बाब त्यांनी आपल्या तक्रारीमध्ये नमूद केली.
