जळगावच्या बांभोरी पुलावर भीषण अपघात; कार-कंटेनरच्या धडकेत तीन चुलतभावांचा मृत्यू

जळगावच्या बांभोरी उड्डाणपुलावर कार आणि कंटेनरची भीषण धडक! कारचा चक्काचूर झाला आणि तीन चुलतभावांचा मृत्यू झाला. देवीच्या यात्रेला नातेवाइकाला सोडून परतताना काळाने घाला घातला. अपघातानंतर कंटेनर कठड्यावर अडकल्याने महामार्गावर वाहतूक कोंडी झाली. बायपास बंदमुळे वाढलेल्या वाहतुकीचा प्रश्न पुन्हा ऐरणीवर आला.

• कार-कंटेनरची धडक; तीन चुलतभावांचा मृत्यू
• बांभोरी पुलावर कंटेनर कठड्यावर अडकला
• बायपास बंदमुळे वाहतूक कोंडीचा प्रश्न ऐरणीवर

जळगाव : जळगाव शहरालगतच्या बांभोरी उड्डाणपुलावर कार आणि कंटेनरमध्ये भीषण अपघात होऊन तीन चुलतभावांचा मृत्यू झाला. रविवारी रात्री घडलेल्या या दुर्घटनेत कारचा पूर्णपणे चक्काचूर झाला. पंकज प्रकाश चौधरी, रवींद्र अरुण चौधरी (दोघे रा. झुरखेडा, ता. धरणगाव) आणि हरीश हिंमत चौधरी (रा. चोपडा) अशी मृतांची नावे आहेत.

कंटेनरची जोरदार धडक; कारचा चक्काचूर

मिळालेल्या माहितीनुसार, तिघेही जळगावहून धरणगाव तालुक्यातील झुरखेडा या गावी परतत होते. त्यावेळी बांभोरी उड्डाणपुलावर समोरून आलेल्या कंटेनरने त्यांच्या कारला जोरदार धडक दिली. धडकेची तीव्रता इतकी होती की कार फिरून तिचे मोठे नुकसान झाले. या अपघातात तिघांचाही मृत्यू झाला.

देवीच्या यात्रेला नातेवाइकाला सोडून परतत होते

रविवारी पंकज यांच्या काकांचा दशक्रिया विधी होता. यासाठी जळगावहून आलेल्या आत्याच्या मुलाला भुसावळजवळील वनवली येथील देवीच्या यात्रेला जायचे होते. त्याला वनवली येथे सोडण्यासाठी तिघे कारने गेले होते. त्याला सोडून झुरखेड्याकडे परतताना बांभोरी पुलावर हा अपघात झाला.

हेही वाचा: लोणावळ्यात थरार! आईने चिमुकल्या लेकीसह दरीत घेतली उडी; झाडाच्या फांद्यांत अडकले अन्…

हरीशच्या कुटुंबावर दुःखाचा डोंगर

मृत हरीश सोलर क्षेत्रात काम करत होता. तो विवाहित असून त्याला दोन लहान भाऊ आहेत. त्याचे वडील सनपुले येथील दिव्यांग शाळेत स्वयंपाकी म्हणून काम करतात. अपघाताची बातमी समजताच नातेवाइकांनी जळगावच्या शासकीय वैद्यकीय महाविद्यालय व रुग्णालयात धाव घेतली. रुग्णालय परिसरात शोकाकुल नातेवाइकांची गर्दी झाली होती.

कंटेनर कठड्यावर अडकला; महामार्गावर वाहतूक कोंडी

अपघातानंतर कंटेनर उड्डाणपुलाच्या कठड्यावर धोकादायक स्थितीत अडकला. त्यामुळे तो खाली कोसळण्याची शक्यता निर्माण झाली होती. खबरदारी म्हणून वाहतूक थांबवण्यात आल्याने महामार्गावर वाहनांच्या लांबच लांब रांगा लागल्या. शहराच्या दिशेने खोटेनगरपर्यंत वाहतूक कोंडी झाली होती.

हेही वाचा:दामिनी पालव हत्या प्रकरणाचा ५ तासांत छडा; एकतर्फी प्रेम, १८ वार अन् आरोपीच्या घरापर्यंत पोहोचले पोलीस!

बायपास बंदमुळे अपघातांचा प्रश्न ऐरणीवर

पाळधी-तरसोद बायपास बंद असल्याने शहरातून जाणाऱ्या वाहनांची संख्या वाढली आहे. गेल्या अडीच महिन्यांत विविध अपघातांमध्ये १२ जणांचा मृत्यू झाल्याची माहिती देण्यात आली आहे. बांभोरी उड्डाणपुलावरील या भीषण अपघातामुळे महामार्गावरील वाहतूक व्यवस्थापन आणि बायपास सुरू करण्याचा प्रश्न पुन्हा चर्चेत आला आहे.