मुंबई : गेल्या अनेक दिवसापासून राज्याच्या राजधानीत गुह्यांच्या संख्येत वाढ झाली आहे. काही दिवसांपुर्वीच लिव्ह इन पार्टनरची हत्या (Mumbai Crime) केल्याची घटना उघडकीस आली होती तर, वसतिगृहातील एका मुलीची हत्या करण्यात आली होती. या दोन्ही घटनेचा तपास अद्याप सुरू असताना आता मुंबईतील चित्रसृष्टीतून एक धक्कादायक बातमी समोर येत आहे. चित्रपटसृष्टीतील मेकअप आर्टिस्ट (Makeup Artist Death In Mumbai) म्हणून काम करणाऱ्या एका युवतीचा मृतदेह संशयास्पद तिच्या फ्लॅटवर आढळून आला आहे. सारा यंथन (वय,26) असं या युवतीचं नाव आहे. या प्रकरणी कोणीतरी तिची हत्या करून गळफास लावल्याचा संशयही कुटुंबीयांनी व्यक्त केला आहे. खार पोलिस आणि गुन्हे शाखा या प्रकरणाचा तपास करत आहे.
मूळची नागालॅंड येथील सारा यंथन ही मुंबईत चित्रपट, टेलिव्हिजन आणि वेबसीरिजमध्ये मेकअप आर्टिस्ट म्हणून काम करत होती. ती खार दांडा परिसरात एका फ्लॅटमध्ये राहत होती. मंगळवारी रात्री ती फ्लॅटमध्ये हातावर जखमा तसेच रक्तबंबाळ स्थितीत मृतावस्थेत पंख्याला लटकलेली आढळली.
मिळालेल्या माहितीनुसार, रविवारी सकाळपासून सारा फाेनला प्रतिसाद देत नव्हती. तिच्या फ्लॅटच्या भाड्याची रक्कम थकलेली असल्याने सोमवारी एजंट भाड्यासाठी पुन्हा तिच्या घरी गेला तेव्हा त्याला संशय आला. त्याने तत्काळ पोलिसांना या घटनेची माहिती दिली. सोमवारी रात्री खार पोलिसांनी दरवाजा तोडला, तेव्हा सारा बेडरूममध्ये पंख्याला लटकलेल्या अवस्थेत रक्ताच्या थारोळ्यात सापडली. पोलिसांना तिच्या दोन्ही हातावर कापल्याच्या खुणाही आढळल्या.
पोलिसांनी नागालँडमध्ये राहणारी मृत साराची आई रोझी यांच्याशी संपर्क साधला. त्या मंगळवारी मुंबईत आल्या. खार पोलिसांनी मंगळवारी दुपारी कूपर हॉस्पिटलमध्ये सारा यंथनचे पोस्टमॉर्टम केले आणि मृतदेह तिच्या आईकडे सोपवला. साराचे एका बँकेत काम करणाऱ्या एका इसमासोबत संबंध होते आणि तो तिला लग्नासाठी बळजबरी करत होता. अशी माहिती तिच्या आईने दिली. पोलिस शवविच्छेदनाच्या अहवालाच्या प्रतीक्षेत आहेत. तिला कोणीतरी मारून नंतर फासावर लटकवल्यासारखे दिसत आहे. मला संशय आहे की तिची हत्या झाली आहे आणि पोलिसांनी याची चौकशी करून माझ्या मुलीला न्याय द्यावा, असे रोझी यांनी म्हण्टलं आहे.
