शुक्रवार, 13 नोव्हेंबर 2026
White House: व्हाईट हाऊसजवळ जिममध्ये शिरून हल्लेखोराचा अंदाधुंद गोळीबार; १ ठार, ४ जखमी अन् नंतर हल्लेखोरानेही संपवले जीवन ( फोटो सौजन्य : सोशल मीडिया )
अमेरिकेची राजधानी वॉशिंग्टन डीसी पुन्हा एकदा गोळीबाराच्या आवाजाने हादरून गेली आहे. अमेरिकेचे राष्ट्राध्यक्ष ज्या ठिकाणी राहतात, त्या अत्यंत सुरक्षित मानल्या जाणाऱ्या व्हाईट हाऊसपासून (White House) अवघ्या एक मैल अंतरावर असलेल्या ‘लोगन सर्कल’ (Logan Circle) परिसरात गुरुवारी सकाळी ८ वाजेच्या सुमारास हा धक्कादायक प्रकार घडला. या भीषण गोळीबारात एका निष्पाप व्यक्तीचा जागीच मृत्यू झाला असून, इतर चार जण गंभीर जखमी झाले आहेत. या घटनेनंतर संपूर्ण परिसरात प्रचंड दहशत आणि घबराट पसरली असून, पोलिसांनी तात्काळ कारवाई करत संपूर्ण भागाला वेढा घातला आणि जवळच्या शाळांमध्ये लॉकडाऊन जाहीर केले.
सकाळच्या शांत वातावरणात लोक नेहमीप्रमाणे आपल्या कामाची आणि व्यायामाची सुरुवात करत असतानाच हा रक्तरंजित थरार घडला. वॉशिंग्टन डीसीमधील १५ व्या आणि पी स्ट्रीट्स एनडब्ल्यू (15th and P Streets NW) परिसरातील प्रसिद्ध ‘विडा फिटनेस’ (VIDA Fitness) या व्यायामशाळेत ही घटना घडली. प्रत्यक्षदर्शींनी दिलेल्या माहितीनुसार, एक बंदूकधारी अचानक जिममध्ये शिरला आणि त्याने तेथे व्यायाम करणाऱ्या एका सदस्याच्या पाठीत आणि मानेवर अगदी जवळून गोळ्या झाडल्या. गोळी लागताच तो तरुण रक्ताच्या थारोळ्यात खाली कोसळला आणि त्याचा जागीच मृत्यू झाला. जिममध्ये गोळीबार केल्यानंतर हल्लेखोर इमारतीतून बाहेर पडला आणि त्याने रस्त्यावरही अंदाधुंद गोळीबार सुरू केला, ज्यामध्ये आणखी चार जण जखमी झाले.
गोळीबार झाला त्या वेळी जिममध्ये सुमारे ५० जण व्यायाम करत होते. अचानक झालेल्या मोठ्या आवाजामुळे सुरुवातीला लोकांना वाटले की कोणाच्या तरी हातून जड वजन (Weights) खाली पडले असावे. मात्र, काही सेकंदांतच किंचाळ्यांचा आवाज सुरू झाला आणि गोळीबार झाल्याचे लक्षात येताच जिममध्ये एकच पळापळ सुरू झाली.
जागतिक घडामोडी संबंधित बातम्या वाचण्यासाठी येथे क्लिक करा : Nvidia: 33 वर्षांच्या सुवर्णयुगाचा शेवट! एनव्हिडियाचे संस्थापक जेन्सन हुआंग यांचा राजीनामा; कोण आहेत नव्या अंतरिम CEO कोलेट क्रेस?
त्या वेळी ट्रेडमिलवर धावणाऱ्या एका महिला साक्षीदाराने तो थरारक प्रसंग सांगताना म्हटले की, “ते दृश्य अत्यंत भयावह होते. मी एका जखमी व्यक्तीला जीव वाचवण्यासाठी इमारतीतून बाहेर पळताना पाहिले. त्याला गोळी लागली होती आणि त्या भागातून जाण्याशिवाय जिममधून बाहेर पडण्याचा दुसरा कोणताही मार्ग नव्हता.” जेव्हा ही महिला बाहेर येऊन एका पोलीस अधिकाऱ्याशी बोलत होती, तेव्हा तिला पुन्हा एकदा गोळीबाराचे आवाज ऐकू आले. अनेक व्यायाम करणाऱ्या सदस्यांनी जीव वाचवण्यासाठी आपत्कालीन दरवाजातून धाव घेत जवळच्या लॉन्ड्री रूममध्ये सुमारे २० मिनिटे स्वतःला कोंडून घेतले होते.
जिमबाहेर गोळीबार केल्यानंतर संशयित हल्लेखोर शेजारील एका सात मजली निवासी इमारतीच्या अपार्टमेंटमध्ये जाऊन लपला. घटनेची माहिती मिळताच अवघ्या ३० सेकंदांत वॉशिंग्टन डीसी पोलीस आणि स्वाट (SWAT) पथक घटनास्थळी दाखल झाले. पोलिसांनी संपूर्ण इमारतीला घेराव घातला. या वेळी हल्लेखोराने बंद दरवाजाआडून पोलिसांच्या दिशेनेही दोन वेळा गोळीबार केला, तसेच अपार्टमेंटमधील गॅस पाईपलाईन तोडून आग लावण्याचाही प्रयत्न केला.
पोलिसांच्या विशेष निगोशिएशन (वाटाघाटी) पथकाने तब्बल तासभर हल्लेखोराशी संवाद साधून त्याला आत्मसमर्पण करण्यास समजावण्याचा प्रयत्न केला. मात्र, अचानक आतून आणखी एका गोळीचा आवाज आला. पोलिसांनी तात्काळ दरवाजा तोडून आत प्रवेश केला असता, हल्लेखोर रक्ताच्या थारोळ्यात पडलेला दिसला; त्याने स्वतःवरच गोळी झाडून आत्महत्या केली होती. पोलिसांनी घटनास्थळावरून तीन बंदुका जप्त केल्या आहेत. प्राथमिक तपासानुसार, हा हल्लेखोर त्याच जिमचा सदस्य होता आणि इमारतीच्या ‘होमओनर्स असोसिएशन’सोबत त्याचा काहीतरी वाद सुरू होता.
जागतिक घडामोडी संबंधित बातम्या वाचण्यासाठी येथे क्लिक करा : UAE मध्ये भरधाव ट्रकने 23 गाड्यांना चिरडल्यानंतर आगीचा भडका; 2 भारतीयांसह 14 जणांचा करुण अंत, 30 जण जखमी
या घटनेनंतर सुरक्षिततेच्या कारणास्तव पोलिसांनी १५ व्या स्ट्रीटचा १५०० ब्लॉक परिसर पूर्णपणे रिकामा करून सील केला. या परिसरात विडा फिटनेस सेंटरसह सेंट ल्यूक्स एपिस्कोपल चर्च, अनेक निवासी घरे आणि प्रसिद्ध ‘होल फूड्स’ सुपरमार्केट आहे. नागरिकांना या भागाकडे न फिरकण्याचे आवाहन करण्यात आले आणि परिसरातील रहिवाशांना मोबाईलवर आणीबाणीचे संदेश पाठवून घराबाहेर न पडण्याच्या सूचना दिल्या गेल्या. तसेच, परिसरातील सर्व शाळांमध्ये तात्काळ लॉकडाऊन लागू करण्यात आले.
या मोठ्या कारवाईत स्थानिक पोलिसांच्या मदतीसाठी ‘फेडरल ब्युरो ऑफ अल्कोहोल, टोबॅको, फायरआर्म्स अँड एक्सप्लोझिव्ह्स’ (ATF) आणि एफबीआयचे (FBI) विशेष एजंट्सही घटनास्थळी तैनात करण्यात आले होते. पोलिसांनी दिलेल्या माहितीनुसार, या हल्ल्यातील चार जखमींना वेगवेगळ्या रुग्णालयांत दाखल करण्यात आले असून, त्यापैकी एकाची प्रकृती अत्यंत चिंताजनक आहे, तर इतर तिघांची प्रकृती स्थिर आहे. वॉशिंग्टन डीसीच्या महापौर म्युरियल बाउझर यांनी या घटनेचा तीव्र निषेध केला असून, व्हाईट हाऊसला या संपूर्ण घटनेची माहिती देण्यात आली आहे.
Ans: हा गोळीबार अमेरिकेच्या व्हाईट हाऊसपासून अवघ्या एक मैल अंतरावर असलेल्या वॉशिंग्टन डीसीमधील 'लोगन सर्कल' (Logan Circle) परिसरातील १५ व्या आणि पी स्ट्रीट येथील 'विडा फिटनेस' जिममध्ये आणि बाहेर झाला.
Ans: या हल्ल्यात एका व्यक्तीचा मृत्यू झाला असून चार जण जखमी झाले आहेत. त्यानंतर शेजारील इमारतीत लपलेल्या संशयित हल्लेखोराने पोलिसांशी झालेल्या वाटाघाटीनंतर स्वतःवर गोळी झाडून आत्महत्या केली.
Ans: पोलिसांनी १५ व्या स्ट्रीटचा परिसर पूर्णपणे सील केला, नागरिकांना घरातच राहण्याचे (Shelter-in-place) आदेश दिले आणि खबरदारीचा उपाय म्हणून जवळच्या सर्व शाळांमध्ये लॉकडाऊन लागू केले.
