Mumbai Crime: काशिमीरा पोलिसांची कारवाई! लग्न करून हनिमूनलाच लुटणारी ‘चोरटी नवरी’ आणि बनावट बाप अटकेत

मिरा-भाईंदरमध्ये लग्नाच्या नावाखाली फसवणूक करणाऱ्या ‘चोरटी नवरी’ टोळीचा पर्दाफाश झाला. हनिमूनच्या रात्रीच नवऱ्याचे पैसे, दागिने घेऊन फरार होणाऱ्या बाप-लेकीला अटक झाली असून त्यांनी आतापर्यंत 5 जणांना लुटल्याचं समोर आलं.

• लग्न करून हनिमूनलाच नवऱ्याला लुटून फरार होणारी टोळी सक्रिय
• बाप-लेकीच्या जोडीने 5 जणांची लाखोंची फसवणूक
• काशिमीरा पोलिसांची कारवाई; दोघांना अटक, तपास सुरू

मुंबई:  मिरा-भाईंदर परिसरात लग्नाच्या नावाखाली फसवणूक करणाऱ्या एका धक्कादायक टोळीचा पर्दाफाश झाला आहे. हनिमूनच्या रात्रीच नवरदेवाच्या घरातील पैसे, दागिने आणि मौल्यवान वस्तू घेऊन फरार होणारी ‘चोरटी नवरी’ आणि तिचा तथाकथित बाप अखेर काशिमीरा पोलिसांच्या जाळ्यात अडकले आहेत. या बाप-लेकीच्या जोडीनं आतापर्यंत अनेकांना लग्नाच्या आमिषाने फसवून लाखोंची लूट केल्याचं तपासात उघड झालं असून, या प्रकरणामुळे परिसरात खळबळ उडाली आहे.

काय नेमकं प्रकरण?

मीरा भाईंदरच्या काशिमीरा येथे राहणारे 53 वर्षांचे सेवलकुमार नाडर हे व्यवसायाने इस्टेट एंजंट होते, त्यांना लग्न करायच होत. तेवढ्यात चोरट्या नवरीचा तथाकथित बाप केसरीमल रांका याने नाडार यांच्याशी संपर्क साधला. लग्न लावून देण्याकरीता त्याच्याकडून 44 हजार रुपये देखील घेतले आणि त्यांनतर त्याने आरोपी नेहा अरुण खेडेलवाल उर्फ जन्नत या २२ वर्षीय तरुणीशी लग्न लावून दिले. लग्न लागल्यानंतर दोन दिवसांनी बाप आणि मुलगी फरार झाली. नाडार यांच्या घरातील मौल्यवान वस्तू, सोन्या चांदीचे दागिने आणि रोख रक्कम असा एकूण 5 लाखांचा ऐवज घेऊन ती नववधु तरुणी पसार झाली. त्यामुळे, आपली फसवणूक झाल्याचं कळल्यावर नाडर यांनी थेट काशिमीरा पोलीस ठाणं गाठलं आणि चोरट्या नवरीची तक्रार केली.

Amravati Scandal : 180 अल्पवयीन मुली अन् 350 अश्लील व्हिडीओ..! मुलींना देह व्यापारासाठी धमकावले, काय आहे या व्हिडीओमागील सत्य?

काशिमीरा पोलिसांनी या घटनेचा सखोल तपास केला. या तरुणीने आत्तापर्यंत एक दोन नव्हे तब्बल पाच जणांना असं लग्न करुन फसवल्याच समोर आलं. अहिल्यानगर तालुक्यातील संगमनेर, जोगेश्वरी, बोरीवली, मुंबई आणि जळगाव येथील पाचोरा येथे अशाच प्रकारे गुन्हा केल्याचं समोर आले आहे. अहिल्यानगर येथील संगमनेर तालुक्यातील विशाल डोके याची देखील अशीच फसवणूक या बाप लेकिने केली आहे. डोके याचा लग्नाचा व्हिडिओ देखील समोर आला आहे.

दोघेही अटकेत

आरोपी नेहा अरुण जाधव ही मूळची राहणारी संगमनेर जिल्हा अहमदनगर येथील आहे. तिचे वय २२ वर्षे असून तिच्या तथाकथित बापाचे नाव केसरीमल लक्ष्मीलाल रांका असं आहे. रांका हा नाशिक येथील राहणारा आहे, त्याच वय 41 वर्षे आहे. काशिमीरा पोलिसांनी या दोघांनाही अटक केली. या प्रकरणाचा पुढील तपास वरिष्ठ पोलीस निरीक्षक राजेंद्र कांबळे यांच्या मार्गदर्शनाखाली सुरू असून, या टोळीमार्फत आणखी किती जणांची फसवणूक झाली आहे, याचा शोध पोलीस करत आहेत.

Thane Crime: काशिगाव पोलिसांची मोठी कारवाई; 50 हून अधिक गुन्ह्यांचा आरोपी अटक