Nashik News: नाशिकमध्ये महिला चोरट्यांच्या टोळीचा धुमाकूळ! दररोज १०० डीपींमधून फ्युज चोरीला; सातपूरकर तासनतास अंधारात

Nashik News: नाशिक शहरातील सातपूर परिसरात मागील आठ दिवसांपासून महावितरणच्या विद्युत वितरण पेट्यांमधील (डीपी) फ्युज चोरीला जाण्याचे प्रकार समोर येत आहेत. महिला चोरट्यांची एक टोळी दररोज सुमारे १०० लहान-मोठ्या डीपींमधून फ्युज चोरत असल्याचा दावा करण्यात येत आहे.

• महावितरणाचे दररोज १०० फ्यूज चोरीला
• महात्मा नगर, कॉलेज रोड परिसरात टोळी सक्रिय
• सातपूरकर तासनतास अंधारात

नाशिक: नाशिक शहरातील सातपूर विभागामध्ये येणाऱ्या विविध परिसरांमध्ये मागील आठ दिवसांपासून महावितरणच्या डीपींमधून (ट्रान्सफॉर्मर) फ्युज चोरीला जाण्याचा अत्यंत गंभीर प्रकार सुरू आहे. यामुळे स्थानिक नागरिकांना तासनतास अंधारात राहावे लागत असून, दैनंदिन जीवन विस्कळीत झाले आहे. सातपूर हा प्रमुख औद्योगिक आणि दाट लोकवस्तीचा निवासी भाग असल्याने येथे डीपींची संख्या लक्षणीय आहे. याच बाबीचा गैरफायदा घेत चोरट्या महिलांच्या एका टोळीने दररोज सकाळी किमान १०० लहान-मोठ्या डीपींमधून फ्युज अनधिकृतपणे काढून लंपास करण्याचा धडाका लावला आहे. त्यामुळे परिसरातील विद्युत पुरवठा खंडीत झाल्याने ऐन उन्हाच्या तडाख्यात नागरिकांना वीजपुरवठा खंडित होण्याचे संकट सहन करावे लागत आहे. (Nashik News)

नागरिकांना सहकार्याचे आवाहन

या गंभीर प्रकाराची दखल घेत महावितरण प्रशासनाने स्थानिक पोलीस ठाण्यांना तातडीने पत्र देऊन चोरट्या महिलांच्या टोळीवर कडक कायदेशीर कारवाई करण्याची विनंती केली आहे. तसेच, नागरिकांना आपल्या परिसरात असे संशयास्पद प्रकार किंवा भंगार गोळा करणाऱ्या महिला डीपीजवळ दिसल्यास त्यांना त्वरित रोखावे, असे आवाहन करण्यात आले आहे. नागरिक अशा संशयितांना पकडून थेट पोलिसांच्या स्वाधीन करू शकतात किंवा महावितरणच्या ७८७५७६६४४२, ७८७५७६६४४३ आणि ७८७५७६६४४६ या हेल्पलाइन क्रमांकांवर संपर्क साधून तातडीने माहिती द्यावी, असे आवाहन महावितरणतर्फे करण्यात आले आहे.

Nashik News : डांगर उत्पादक शेतकरी संकटात! ७० टक्के पीक खराब,किलोला मिळतोय अवघा ४ ते ५ रुपये भाव

सकाळी चोरी, सायंकाळी परिसरात अंधार

महावितरणच्या अधिकाऱ्याऱ्यांनी दिलेल्या माहितीनुसार, पथुज चोरीचे हे प्रकार प्रामुख्याने सकाळी घडतात. मात्र, सकाळी नागरिक नौकरी व कामधंद्यानिमित्त घराबाहेर पडलेले असतात, तर काही नागरिक वीज यंत्रणेचे काही दुरुस्ती काम सुरू असावे, या गैरसमजातून त्वरित तक्रार करत नाहीत, परिणामी, सायंकाळी ५ वाजेनंतर नागरिक घरी परतल्यानंतर वीज गेल्याच्या तक्रारीचा महावितरणकडे अचानक ओघ वाढतो. महावितरणकडे असलेल्या अपुऱ्या मनुष्यबळात एकाच वेळी अनेक भागांत नवे फ्युज बसवून वीजपुरवठा पूर्ववत करताना कर्मचाऱ्यांची मोठी कसरत होत असून, यात अनेक तासांचा कालावधी निघून जात आहे.

या परिसराला बसतोय मोठा फटका

फ्युज चोरीच्या या सत्रामुळे महात्मा नगर, वावरे लेन, अद्वैत कॉलनी, मॉडेल कॉलनी, श्रमिक कॉलनी, उदय नगर, डिसोझा कॉलनी, एसटी कॉलनी, माणिक नगर, व्हीसे मळा, आर्किटेक्ट कॉलनी, विश्वास बँक परिसर, सावरकर नगर आणि कॉलेज रोड या प्रमुख भागांना मोठा फटका बसला असून, येथे अंधाराचे साम्राज्य पसरत आहे. उन्हाची तीव्रता वाढली असतानाच या घटना वाढल्याने नागरिकांत संताप व्यक्त होत आहे.

मोठी बातमी! ‘या’ तारखेपासून त्र्यंबकेश्वर मंदिर दोन महिने बंद; सिंहस्थ कुंभमेळ्याआधी प्रशासनाचा निर्णय