‘आत्महत्या करतो’ असा मेसेज, फोन बंद अन् पोलीस अंमलदार बेपत्ता; तांत्रिक तपासातून बारमध्ये सापडला…

‘आत्महत्या करतो’ असा मेसेज पाठवून पोलीस अंमलदार बेपत्ता झाल्याने खळबळ उडाली. काही तासांनी नारायणगावातील बारमध्ये तो मद्यधुंद अवस्थेत सापडला.

• आत्महत्येचा मेसेज पाठवून अंमलदार बेपत्ता
• नारायणगावातील बारमध्ये मद्यधुंद अवस्थेत सापडला
• वरिष्ठांवरील आरोपांची पोलीस प्रशासनाकडून चौकशी

पिंपरी : कामावर गैरहजर राहिल्याबाबत वरिष्ठ पोलीस निरीक्षकांनी जाब विचारल्यानंतर एका पोलीस अंमलदाराने आत्महत्या करणार असल्याचा संदेश पाठवून अचानक बेपत्ता झाल्याने पोलीस यंत्रणेची धावपळ उडाली. काही तासांच्या शोधमोहिमेनंतर संबंधित अंमलदार नारायणगाव परिसरातील एका बारमध्ये मद्यधुंद अवस्थेत आढळून आला. त्यामुळे चिंतेत असलेल्या पोलिसांनी सुटकेचा निःश्वास सोडला.

नेमकी घटना काय?

संबंधित पोलीस अंमलदार कामावर गैरहजर राहिल्यामुळे वरिष्ठ पोलीस निरीक्षकांनी त्याला याबाबत विचारणा केली होती. यावरून सकाळी दोघांमध्ये वाद झाला. वरिष्ठांकडून आपल्याला त्रास होत असल्याचा आरोप करत अंमलदाराने मोबाईलवर आपण आत्महत्या करणार असल्याचा संदेश पाठवला. त्यानंतर त्याचा मोबाईल बंद झाला आणि त्याच्याशी संपर्क होऊ शकला नाही. आत्महत्येचा संदेश आणि त्यानंतर संपर्क तुटल्याने पोलीस यंत्रणा तातडीने सतर्क झाली. वरिष्ठ अधिकाऱ्यांनी या प्रकाराची गंभीर दखल घेत अंमलदाराचा शोध सुरू केला.

हेही वाचा: MPSCच्या अभ्यासात जुळले सूर, PSI होण्यासाठी दिले 2.20 लाख, त्याच पतीने मागितले 40 लाख; प्रेमविवाहाची धक्कादायक कहाणी!

आधीच्या घटनेमुळे पोलिसांची चिंता वाढली

काही दिवसांपूर्वीच एका वरिष्ठ पोलीस अधिकाऱ्याच्या आरटीपीसीने आत्महत्या केल्याची घटना घडली होती. या पार्श्वभूमीवर पोलीस अंमलदाराने आत्महत्या करणार असल्याचा संदेश पाठवल्याने पोलिसांनी ही बाब अत्यंत गांभीर्याने घेतली. अंमलदाराचा शोध घेण्यासाठी पोलिसांकडून विविध पातळ्यांवर प्रयत्न सुरू करण्यात आले. त्याच्या मोबाईलचे तांत्रिक विश्लेषण करून त्याचे लोकेशन शोधण्याचा प्रयत्न करण्यात आला.

हेही वाचा: झुरळे, उंदरांनी कुरतडलेले अन्न; डॉमिनोजच्या मुंबईतील ३ आउटलेट्सचे परवाने FDAने केले निलंबित

तांत्रिक विश्लेषणातून नारायणगावात शोध

तांत्रिक विश्लेषणाच्या आधारे संबंधित अंमलदार नारायणगाव परिसरात असल्याची माहिती पोलिसांना मिळाली. त्यानंतर पोलीस पथकाने तातडीने त्या परिसरातील एका बारमध्ये धाव घेतली. तेथे संबंधित अंमलदार मद्यधुंद अवस्थेत बसलेला आढळून आला. त्यामुळे काही तासांपासून त्याच्या सुरक्षिततेबाबत चिंतेत असलेल्या पोलिसांनी सुटकेचा निःश्वास सोडला. दरम्यान, संबंधित अंमलदाराने वरिष्ठ अधिकाऱ्यांवर मानसिक छळाचे गंभीर आरोप केल्याचे समोर आले आहे. मात्र, या आरोपांची अधिकृत सत्यता अद्याप स्पष्ट झालेली नाही. या संपूर्ण प्रकरणाची पोलीस प्रशासनाकडून चौकशी केली जात आहे.