11 महिन्याच्या चिमुकल्याच्या खुनाचा ‘असा’ झाला उलगडा; शिरूर तालुक्यात खळबळ

गणपती भांबर्डे (ता.शिरुर) येथे जन्मदात्या आईनेच आपल्या ११ महिन्यांच्या मुलाचा निर्घृण खून केल्याची धक्कादायक घटना उघडकीस आली असून, या घटनेमुळे परिसरात एकच खळबळ उडाली आहे.

रांजणगाव : गणपती भांबर्डे (ता.शिरुर) येथे जन्मदात्या आईनेच आपल्या ११ महिन्यांच्या मुलाचा निर्घृण खून केल्याची धक्कादायक घटना उघडकीस आली असून, या घटनेमुळे परिसरात एकच खळबळ उडाली आहे. सोशल मीडियामुळे या घटनेला वाचा फुटल्याचे शिरुरचे उपविभागीय पोलिस अधिकारी प्रशांत ढोले यांनी सांगितले. या प्रकरणी रांजणगाव एमआयडीसी पोलिसांनी आरोपी आईला अटक केली आहे.

 

याबाबत रांजणगाव पोलिसांनी दिलेल्या माहितीनुसार, यश रविंद्र पवार (वय ११ महिने) असे मृत मुलाचे नाव असून, याप्रकरणी वडील रविंद्र अशोक पवार (रा. भांबर्डे, ता. शिरूर) यांनी रांजणगाव एमआयडीसी पोलीस स्टेशनला फिर्याद दिली आहे. त्यानुसार मयत मुलाची आई पुजा रवींद्र पवार हिच्याविरुद्ध खुनाचा गुन्हा दाखल करण्यात आला आहे. ८ मार्च रोजी सायंकाळच्या सुमारास भांबर्डे येथील शेतातील विहिरीजवळ ही घटना घडली आहे. सुरुवातीला हा प्रकार अकस्मात मृत्यू म्हणून नोंदविण्यात आला होता. मात्र पोलिसांनी सखोल तपास केला असता धक्कादायक बाब समोर आली आहे.

पोलिसांच्या तपासात आरोपी महिलेने मुलगा हा नेहमी किरकिर करून रडतो, कोठेतरी निघून जाऊन दुसरा चांगला नवरा पाहून लग्न करावे, मुलाला सोबत घेऊन गेल्यावर कोणी लग्न करणार नाही असा विचार करून तिने हा प्रकार केल्याचे पोलिसांनी सांगितले. महिलेने मुलाचे डोके घरासमोरील सिमेंटच्या ओट्यावर आपटून त्याचा खून केल्याचे स्पष्ट झाले. त्यानंतर पुरावा नष्ट करण्याच्या उद्देशाने रक्त धुऊन काढून मृतदेह कपड्यांच्या बॅगमध्ये भरला. पुढे शेतातील विहिरीत बुडवण्यासाठी बॅगमध्ये दगड टाकून मृददेह पाण्यात फेकून दिल्याचेही निष्पन्न झाले आहे.

आरोपी महिलेने आपल्या तिसऱ्या लग्नाचे फोटो इन्स्टाग्राम या सोशल मीडियावर शेअर केल्याचे ५ एप्रिलला दिसलें असता रवींद्र पवार यांनी महिलेचा नुकताच विवाह झालेला पारनेर (जि. अहिल्यानगर) येथील तिसरा पती याला फोन करुन तुम्ही तुमचा संसार सुखाचा करा, परंतू माझे मुल मला परत आणून द्या, असे सांगितले असता पुजा हिने मुलं माझ्याकडे सुखरुप आहे, असे सांगून मुल देण्यास टाळाटाळ केली. रविंद्र यांना शंका आली. या मुलाचा लग्नाला अडसर होऊ नये म्हणून आईने खून केल्याचे निष्पन्न झाले. दरम्यान मयत मुलाची आई हिला सोमवारी, दिनांक ६ रोजी अटक करुन पोलिसांनी खाक्या दाखवताच आरोपी आईने खुनाची कबुली दिली असल्याचे शिरुरचे उपविभागीय पोलिस अधिकारी प्रशांत ढोले व रांजणगावचे पोलिस निरीक्षक महादेव वाघमोडे यांनी पत्रकार परिषदेत सांगितले. उपविभागीय पोलीस अधिकारी प्रशांत ढोले, पोलीस निरीक्षक महादेव वाघमोडे यांच्यासह पोलिस पथकाने घटनास्थळी भेट देऊन पंचनामा केला. तसेच वैद्यकीय अधिकारी व फॉरेन्सिक पथकानेही तपासात सहभाग घेतला.

हे सुद्धा वाचा : शाळेत झाली ओळख, यूट्यूबवरून शिकून सुरू केला ड्रग्जचा धंदा; दोन शिक्षकांना पोलिसांनी केली अटक