पिस्तूल बाळगणाऱ्या सराइतांना ठोकल्या बेड्या; पुण्यातील 'या' भागातून सापळा रचून पकडले
पुणे : बेकायदेशीररित्या पिस्तूल बाळगणाऱ्या दोन सराईत गुन्हेगारांना गुन्हे शाखेच्या खंडणी विरोधी पथकाने सापळा रचून अटक केली. सिंहगड रस्त्यावरील दांडेकर पूल परिसरात ही कारवाई करण्यात आली असून, त्यांच्याकडून देशी बनावटीच्या पिस्तुलासह काडतूस जप्त करण्यात आले आहे. गणेश गौतम वाघमारे (वय २८), तेजस काशीनाथ शेलार (वय २५, दोघे रा. सर्व्हे क्रमांक १३०, दांडेकर पूल, सिंहगड रस्ता) अशी अटक करण्यात आलेल्यांची नावे आहेत. वरिष्ठ निरीक्षक शैलेश संखे, सहायक निरीक्षक राजेश माळगावे, उपनिरीक्षक अस्मिता लाड, राजेंद्र लांडगे, मयूर भोकरे व त्यांच्या पथकाने ही कारवाई केली आहे.
वाघमारे आणि शेलार हे सराईत गुन्हेगार आहेत. त्यांच्यावर गंभीर गुन्हे दाखल आहेत. वाघमारे याच्यावर पर्वती पोलिसांकडून महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्यात आली होती. या कारवाईत तो जामीन मिळवून कारागृहातून बाहेर पडला आहे. वाघमारे याच्याकडे देशी बनावटीचे पिस्तूल असून, तो दांडेकर पूल भागात दहशत माजवित असल्याची माहिती खंडणी विरोधी पथकातील पोलीस हवालदार राजेंद्र लांडगे, पोलीस शिपाई अमर पवार, मयूर भोकरे यांना बातमीदाराने दिली होती. नंतर पोलिसांच्या पथकाने सापळा लावून वाघमारे याला पकडले.
वाघमारे याच्याकडे पिस्तुलाबाबत चौकशी करण्यात आली. तेव्हा माझ्याकडे पिस्तूल आहे. मात्र, ते शेलार याने विकत घेतल्याची माहिती त्याने दिली. प्रतिस्पर्धी टोळीकडून हल्ला होण्याची शक्यता असल्याने दोघे पिस्तूल बाळगत असल्याची, माहिती त्याने पोलिसांना दिली. त्यानंतर पोलिसांनी शेलारला ताब्यात घेतले. शेलार याच्याकडून देशी बनावटीच्या पिस्तूलासह दोन काडतुसे जप्त करण्यात आली. दोघांवर पर्वती पोलीस ठाण्यात बेकायदा शस्त्र बाळगल्याप्रकरणी गुन्हा दाखल करण्यात आला आहे.
तडीपार गुंडांना पकडले
खंडणी विरोधी पथकाने दुसऱ्या कारवाईत शहरातून तडीपार केलेल्या दोन गुंडांना पकडले आहे. प्रथम उर्फ पॅडी सुरेश म्हस्के (वय २०, रा. दांडेकर पूल), रोशन अविनाश काकडे (वय २४, रा. तुकाईनगर, वडगाव बुद्रुक) अशी अटक करण्यात आलेल्यांची नावे अहोत. म्हस्के आणि काकडे यांना पुणे, पिंपरी-चिंचवड शहर, तसेच जिल्ह्यातून सिंहगड रस्ता पोलिसांनी तडीपार केले होते. तडीपार केल्यानंतर दोघेजण शहरात वास्तव्यास असल्याची माहिती खंडणी विरोधी पथकाला मिळाली. त्यानंतर सापळा लावून दोघांना पकडले. त्यांच्याकडून तीक्ष्ण शस्त्रे जप्त करण्यात आली.
.png "Videos"){kind=small}
