नगरसेवक करणार ‘ड्रग्ज मुक्त प्रभाग’! पुणे पोलीस आयुक्तांचा महत्वकांक्षी उपक्रम

पुण्यातून ड्रग्जला हद्दपार करण्यासाठी पुणे पोलिसांनी कंबर कसली असून, या पार्श्वभूमीवर नगरसेवकांना 'माझा प्रभाग ड्रग्ज मुक्त' या उपक्रमाशी जोडण्यात आले आहे.

पुणे : पुण्यातून ड्रग्जला हद्दपार करण्यासाठी पुणे पोलिसांनी कंबर कसली असून, या पार्श्वभूमीवर नगरसेवकांना ‘माझा प्रभाग ड्रग्ज मुक्त’ या उपक्रमाशी जोडण्यात आले आहे. पोलीस आयुक्त अमितेश कुमार यांनी प्रायोगिक तत्त्वावर पहिल्या टप्यात चार प्रभागात हा उपक्रम सुरू करण्याचा निर्णय घेतला आहे. त्यानूसार, संबंधित भागात एकाही ठिकाणी ड्रग्ज विक्री, बाळगणे किंवा कोणी ड्रग्ज पिणार नाही, याची जबाबदारी पोलिसांसह नगरसेवक पार पाडणार आहेत.

 

विद्येच्या माहेर घरात गेल्या काही वर्षात ड्रग्जचे जाळे मोठ्या प्रमाणात पसरल्याचे समोर आले आहे. पोलिसांनी देशामधील तसेच आंतरराष्ट्रीय रॅकेटही उघडकीस आणले. तर, शहरातील पुरवठा साखळी मोडीत काढण्यासाठी पावले उचलली. यानंतर देखील शहरात आधून-मधून ड्रग्ज येत असल्याचे सातत्याने समोर येत आहे. विशेषत: गांजा व एमडी या ड्रग्जचे प्रमाण मोठ्या प्रमाणात आहे. नुकतेच पोलिस आयुक्तांच्या नगरसेवकांच्या जनता दरबार बैठकीत नगरसेवकांनी त्यांच्या भागात सुरू असलेल्या ड्रग्जबाबत धक्कादायक माहिती मांडली. त्यानंतर शहरात मोठी खळबळ उडाली.

पोलिस आयुक्त अमितेश कुमार यांच्याकडून सातत्याने ड्रग्ज मुक्त शहरासाठी ठोस पावले उचलली जात असताना पुन्हा अशा घटना समोर येत असल्याच्या पार्श्वभूमीवर आता थेट नगरसेवकांना ड्रग्ज मुक्तीसाठी सहभागी करून घेण्यात येणार आहे. आता प्रभाग मुक्त ड्रग्ज असा उपक्रम राबविला जाणार आहे. प्रायोगित तत्त्वावर पहिल्या टप्यात चार प्रभागात हा उपक्रम राबवून येथे ड्रग्जची विक्री, बाळगणे किंवा तो कोण-कोण पितो, यासंदंर्भात माहिती ठेवून पोलिसांसोबत ते उघड करणार आहेत.

पीटीपी अ‍ॅपच्या धर्तीवर ड्रग्जचेही अ‍ॅप

वाहतूक नियमभंगाचे फोटो पाठविण्यासाठी पुणे पोलिसांनी विकसीत केलेल्या पीटीपी अ‍ॅपच्या धर्तीवर आता ड्रग्ज विरोधीही असेच पीटीपी अ‍ॅप तयार केले जाणार आहे. ज्या माध्यमातून सर्व सामान्य नागरिक थेट फोटो, व्हिडीओ व लोकेशन पोलिसांना पाठवू शकणार आहेत. विशेष म्हणजे, माहिती पाठविणाऱ्याची माहिती अत्यंत गुप्तता पाळली जाणार आहे. जेणेकरून ड्रग्जला ब्रेक लागेल.

हे सुद्धा वाचा : पुणे ‘झेड’पी विषय समित्यांच्या सभापतींची निवड या महिन्यात होणार; पारदर्शक प्रक्रिया पार पडणार

स्थानिक पोलिस ठाण्यात अँटी ड्रग्जविरोधी पथक

ड्रग्ज मुक्तीसाठी आता पोलिस आयुक्तांनी प्रत्येक पोलिस ठाण्यात अँटी ड्रग्जविरोधी पथक स्थापन करण्याचा निर्णय घेतला आहे. ते पथक फक्त ड्रग्ज विरोधात कारवाई करणार आहे. पहिल्या टप्यात शहरातील ठरावीक दहा पोलिस ठाण्यात या स्कॉडची स्थापना केली जाणार आहे. त्यानंतर शहरातील ४४ पोलिस ठाण्यात हे पथक स्थापन केले जाणार आहे.