रविवार, 16 ऑगस्ट 2026
संग्रहित फोटो
पुणे : परदेशी बनावटीचे पिस्तूल बाळगणाऱ्या सराइताला लोहमार्ग पोलिसांच्या पथकाने खडकी रेल्वे स्थानक परिसरात पकडले आहे. या प्रकरणात सराइताच्या साथीदारालाही अटक केली आहे. त्यांच्याकडून परदेशी बनावटीचे पिस्तूल, सहा काडतुसे जप्त केली आहेत. याप्रकरणी वीर श्याम दलगज (वय २२, रा. पारसी चाळ, देहूरोड), सार्थक शिवनागी वाघलगवे (वय २२, रा. पिंपरी) यांना अटक केली आहे.
पुणे रेल्वे स्थानक लोहमार्ग पोलिस ठाण्याचे वरिष्ठ निरीक्षक प्रमोद खोपीकर, उपनिरीक्षक शंभू रणवरे, यशवंत साळुंखे, अमरदीप साळुंखे, इम्तियाज आवटी, धीरज कपिले, प्रशांत डोईफोडे, अमोल शेळके, सागर शेंडकर, गणेश बच्छाव यांनी ही कामगिरी केली आहे. दलगजविरुद्ध देहूरोड पोलिसांत गंभीर स्वरुपाचे दोन गुन्हे दाखल आहेत.
११ ऑगस्ट रोजी लोहमार्ग पोलिसांचे पथक खडकी रेल्वे स्थानक परिसरात मध्यरात्री गस्त घालत होते. त्यावेळी दलगज हा फलाट क्रमांक एक परिसरात थांबला होता. अंधारात थांबलेल्या दलगज याला पोलिसांना पाहिले. पोलिसांना पाहताच तो पसार झाला. पोलिसांनी त्याला पाठलाग करुन पकडले. पोलिसांनी त्याची झडती घेतली. तेव्हा त्याच्याकडे परदेशी बनावटीचे पिस्तूल, तसेच सहा काडतुसे सापडली. पिस्तुलाबाबत पोलिसांनी चौकशी केली. तेव्हा साथीदार वाघलगवे याने पिस्तूल दिल्याची माहिती मिळाली. पोलिसांनी वाघलगवे याला ताब्यात घेतले. परदेशी बनावटीचे पिस्तूल कुठून आणले, तसेच त्यांना कोणी दिले, यादृष्टीने पोलिसांकडून तपास करण्यात येत आहे.
हे सुद्धा वाचा : नोकरीत भागेना, बहाद्दराने काढला ड्रग्जचा कारखाना; पोलिसांना सुगावा लागला अन्…
सहकारनगर परिसरातही गुन्हेगारांकडून पिस्तूलांचा साठा पकडला
पुणे शहरातील गुन्हेगारी पिस्तूलांच्या आधारावर दहशत माजवित असल्याचे दिसत असून, हा आधार मिळवत गुन्हेगार धुडगूस घालत असताना सहकारनगर परिसरातही गुन्हे शाखेने मोठा शस्त्रसाठा जप्त केला आहे. गुन्हेगारांना पिस्तूल घेऊन फिरताना पकडल्याने मोठा गुन्हा देखील टळल्याचे सांगितले जात आहे. त्यांच्याकडून चार पिस्तूल आणि सहा काडतुसे जप्त करण्यात आली आहेत. ही कारवाई युनिट दोनच्या पथकाने केली आहे. सुफियान बशीर शेख (वय २२), निलेश प्रभुलिंग कुंभार (वय २१), तुकाराम बाबासाहेब गवते (वय १९), ऋषभ ऊर्फ ऋषी शिवाजी भगत (वय २३) आणि अमित राजाराम पिलावरे (वय २५) अशी अटक करण्यात आलेल्यांची नावे आहेत. त्यांच्या अंगझडतीत चार पिस्तुले आणि सहा जिवंत काडतुसे आढळून आली.
