चंद्रभागेच्या पवित्र पात्रात दोन बेवारस मृतदेह; मंदिर समिती आणि पालिकेचा सुस्त कारभार चव्हाट्यावर!

पवित्र तीर्थक्षेत्र पंढरपूरच्या चंद्रभागा नदीपात्रात बेवारस मृतदेह आढळल्याने खळबळ उडाली आहे. यावरून भाजप नेते विक्रम शिरसट यांनी मंदिर समिती आणि नगरपालिकेला तीव्र आंदोलनाचा इशारा दिला आहे.

 

• चंद्रभागेच्या पवित्र पात्रात दोन बेवारस मृतदेह
• मंदिर समिती आणि पालिकेचा सुस्त कारभार चव्हाट्यावर

पंढरपूर (प्रतिनिधी): पवित्र तीर्थक्षेत्र पंढरपूर नगरीमध्ये सध्या पुरुषोत्तम मासानिमित्त दररोज एक लाखापेक्षा जास्त भाविक विठ्ठल-रुक्मिणीच्या दर्शनासाठी येत आहेत. अशा अत्यंत गर्दीच्या आणि पवित्र वातावरणात पंढरपुरातून एक संतापजनक प्रकार समोर आला आहे. चंद्रभागा नदीपात्रात दररोज एक बेवारस मृतदेह सापडत असल्याचे धक्कादायक वास्तव समोर आले असून, आज पुन्हा एकदा नदीपात्रात दोन बेवारस मृतदेह आढळल्याने पंढरपुरात मोठी खळबळ उडाली आहे. या घटनेमुळे मंदिर प्रशासन आणि नगरपालिका प्रशासनाचा भोंगळ कारभार पुन्हा एकदा चव्हाट्यावर आला आहे.

नदीपात्रात बेवारस मृतदेह तरंगत असल्याची माहिती मिळताच, भाजपचे माजी शहराध्यक्ष विक्रम शिरसट यांनी सहकाऱ्यांसह तातडीने घटनास्थळी धाव घेतली. त्यांनी घटनेचे गांभीर्य ओळखून पंढरपूर शहर पोलीस प्रशासनाला याची माहिती दिली आणि स्वतः पुढाकार घेत शववाहिकेची व्यवस्था करून मृतदेह रुग्णालयात रवाना केले.या गंभीर प्रकरणावर बोलताना विक्रम शिरसट यांनी प्रशासनाविरुद्ध तीव्र संताप व्यक्त केला.

“पवित्र चंद्रभागेच्या पात्रात दररोज अशा दुर्दैवी घटना घडत आहेत. मात्र, विठ्ठल रुक्मिणी मंदिर समिती आणि नगरपालिका प्रशासन याकडे डोळेझाक करत आहे. जर प्रशासनाने या बेवारस मृतदेहांची वेळीच आणि सन्मानपूर्वक विल्हेवाट लावली नाही, तर आम्ही हे मृतदेह थेट पंढरपूर नगरपालिकेच्या दारात आणून ठेवू आणि तीव्र आंदोलन करू,” असा इशारा शिरसट यांनी दिला.

Pandharpur : विठ्ठलाच्या दारात भाविकांची लूट? मंदिर समितीची मोठी कारवाई

दररोज लाखो भाविक येत असलेल्या पंढरपुरात नगरपालिका प्रशासन पूर्णपणे सुस्त झाले असून, अशा घटनांना आळा घालण्यासाठी प्रशासनाने तात्काळ ठोस पावले उचलावीत, अशी आग्रही मागणी आता पंढरपूरकरांमधून केली जात आहे.

सामाजिक कार्यकर्त्यांना मानधन देण्याची मागणी

अशा घटना घडल्यानंतर पोलीस आणि प्रशासकीय कारवाई पूर्ण होईपर्यंत, तसेच मृतदेहांचे शवविच्छेदन होईपर्यंत सामाजिक संघटनेचे कार्यकर्ते मनोज परमार आणि सर्वगोड हे घटनास्थळी थांबून मोलाचे सामाजिक काम करतात. या दोन्ही कार्यकर्त्यांच्या पाठीवर कौतुकाची थाप टाकत, “मंदिर समितीने या दोन्ही कार्यकर्त्यांना ठराविक मानधन सुरू करावे,” अशी मागणीही शिरसट यांनी यावेळी केली.

पंढरपूरचा कायापालट होणार! ४१५० कोटींच्या विकास आराखड्याला मान्यता; ३० महिन्यांत काम पूर्ण करण्याचे मुख्यमंत्र्यांचे निर्देश