सोमवार, 2 नोव्हेंबर 2026
(फोटो सौजन्य- सोशल मीडिया)
Amitabh Bachchan: बॉलिवूडचे महानायक अमिताभ बच्चन दर रविवारी आपल्या चाहत्यांची भेट घेतात. गेल्या अनेक वर्षांपासून त्यांनी ही परंपरा कायम ठेवली आहे. दर रविवारी बिग बींची एक झलक पाहण्यासाठी त्यांच्या मुंबईतील ‘जलसा’ या निवासस्थानाबाहेर चाहत्यांची मोठी गर्दी जमते. मात्र, १ नोव्हेंबरच्या रविवारी चाहत्यांना अमिताभ बच्चन एका वेगळ्याच अंदाजात पाहायला मिळाले. यावेळी ते बुलेटप्रूफ असल्याचे सांगितल्या जाणाऱ्या पारदर्शक काचेच्या सुरक्षा केबिनमधून चाहत्यांना अभिवादन करताना दिसले. विशेष म्हणजे, वडिलांच्या सुरक्षेसाठी मुलगा अभिषेक बच्चनही ‘जलसा’बाहेर उपस्थित होता.
सुरक्षेच्या कारणास्तव अमिताभ बच्चन यावेळी मोकळ्या जागेत उभे राहण्याऐवजी पारदर्शक काचेच्या सुरक्षा कवचामागे उभे राहिले. या केबिनमधून त्यांनी आपल्या खास शैलीत हात जोडून चाहत्यांना नमस्कार केला आणि त्यांच्या शुभेच्छांचा स्वीकार केला. बिग बींचा हा व्हिडीओ सोशल मीडियावर चर्चेत आहे.
वडिलांच्या सुरक्षेसाठी अभिषेक बच्चनही ‘जलसा’बाहेर
अमिताभ बच्चन चाहत्यांना अभिवादन करत असताना अभिषेक बच्चनही तिथे उपस्थित होता. व्हिडीओमध्ये अभिषेक चाहत्यांना नमस्कार करतानाच आजूबाजूच्या परिसरावर लक्ष ठेवताना दिसत आहे. तसेच ‘जलसा’बाहेर तैनात असलेले सुरक्षा कर्मचारी गर्दीवर नियंत्रण ठेवताना दिसले.
अमिताभ बच्चन यांनी अलीकडेच आपल्या आरोग्याशी संबंधित समस्यांबाबत भाष्य केले होते. त्यातच त्यांच्या ‘जलसा’ या निवासस्थानाला बॉम्ब हल्ल्याची धमकी मिळाल्याची माहिती समोर आली होती. टायगर श्रॉफवरील कथित हल्ल्याच्या घटनेनंतर आलेल्या एका धमकीच्या ईमेलमध्ये मुंबई महापौर कार्यालय, एका शाळेसह अमिताभ बच्चन यांच्या वांद्रे येथील ‘जलसा’ निवासस्थानावर ३१ ऑक्टोबर रोजी ग्रेनेड हल्ला करण्याची धमकी देण्यात आल्याचा दावा करण्यात आला होता.
या धमक्यांच्या पार्श्वभूमीवर बिग बींच्या सुरक्षेत वाढ करण्यात आल्याचे सांगितले जात आहे. मात्र, या परिस्थितीतही त्यांनी चाहत्यांना भेटण्याची आपली परंपरा कायम ठेवली आहे. गेल्या रविवारी ते कोणत्याही काचेच्या सुरक्षा केबिनशिवाय चाहत्यांना भेटले होते. पण यावेळी अधिक सुरक्षा व्यवस्थेतून त्यांनी चाहत्यांना अभिवादन केले. त्यामुळे अमिताभ बच्चन यांच्या सुरक्षेची आणि अभिषेक बच्चनच्या उपस्थितीची सध्या चर्चा रंगली आहे.
