मंगळवार, 20 ऑक्टोबर 2026
(फोटो सौजन्य- इन्स्टाग्राम)
Kangana Ranaut: अभिनेत्री कंगना राणौत आपल्या बेधडक आणि वादग्रस्त वक्तव्यांमुळे नेहमीच चर्चेत असते. आता ती पुन्हा एकदा चर्चेच्या केंद्रस्थानी आली आहे. काही दिवसांपूर्वी कंगनाने अभिनेत्री कृती सेननच्या रक्षाबंधनाच्या जाहिरातीतील कपड्यांवर टीका केली होती. मात्र, आता कंगनाचा तब्बल ९ वर्षांपूर्वीचा रक्षाबंधनाच्या जाहिरातीतील व्हिडीओ सोशल मीडियावर पुन्हा व्हायरल झाला आहे.
कंगनाचा हा जुना जाहिरातीचा व्हिडीओ एका ज्वेलरी ब्रँडशी संबंधित आहे. या जाहिरातीत कंगना मॉडर्न ऑफ-शोल्डर ड्रेसमध्ये दिसत आहे. त्यामुळे कृती सेननच्या अलीकडील जाहिरातीतील कपड्यांवर कंगनाने केलेल्या वक्तव्याशी तिच्या जुन्या जाहिरातीची तुलना केली जात आहे.
What is this? 🐒 pic.twitter.com/hW884AZdIM — RAHUL (@RahulSeeker) August 27, 2026
अभिनेत्री आणि ‘बिग बॉस १९’ची स्पर्धक कुनिका सदानंद यांनीही कंगनाच्या जुन्या जाहिरातीवर प्रतिक्रिया दिली आहे. कंगनावर टीका करणारी एक पोस्ट त्यांनी एक्सवर री-पोस्ट केली आणि त्यावर उपरोधिक टिप्पणी करत लिहिलं, “मेरा कुत्ता कुत्ता, तेरा कुत्ता टॉमी???”
कुनिकाच्या या पोस्टनंतर सोशल मीडियावर पुन्हा एकदा कंगना आणि कृती सेनन यांच्या जाहिरातींची चर्चा सुरू झाली आहे.
कंगनाचा २०१७ सालचा जुना पोस्ट सध्या सोशल मीडियावर मोठ्या प्रमाणात शेअर केला जात आहे. अनेक युजर्सनी कंगनाच्या त्या जाहिरातीतील लूकची तुलना कृतीच्या रक्षाबंधनाच्या जाहिरातीतील कपड्यांवर केलेल्या कंगनाच्या टीकेशी केली आहे.
एका युजरने कंगनावर टीका करत लिहिलं की, “तिचा क्लिव्हेज सांस्कृतिक धक्का आणि माझा क्लिव्हेज संस्कारी क्लिव्हेज?” तर आणखी एका युजरने कंगनाला ‘पाखंडी’ म्हटलं. काही युजर्सनी कंगनाच्या जुन्या जाहिरातीचा संदर्भ देत इतरांच्या कपड्यांवर भाष्य करण्याच्या तिच्या भूमिकेवर प्रश्न उपस्थित केले आहेत.
काही दिवसांपूर्वी कृती सेनन एका ज्वेलरी ब्रँडच्या रक्षाबंधनाच्या जाहिरातीत दिसली होती. या जाहिरातीत तिने केप आणि ड्रेप्ड स्कर्टसोबत ब्रालेट-स्टाइल ब्लाउज परिधान केला होता. तसेच जाहिरातीत एका कुत्र्याला राखी बांधतानाचा प्रसंगही होता. या जाहिरातीवर सोशल मीडियावर मोठी चर्चा आणि टीका झाली होती.
यानंतर कंगना रनौतनेही कृतीच्या जाहिरातीवर प्रतिक्रिया दिली होती. कंगनाने महिलांकडे आज कपड्यांचे अनेक पर्याय उपलब्ध असताना रक्षाबंधनासारख्या सणाच्या दिवशी अशा प्रकारचा पोशाख का निवडला, असा सवाल केला होता. तिने हा जाहिरातीचा प्रकार ‘अजीब’ आणि ‘डरावना’ असल्याचं म्हटलं होतं.
कंगनाच्या टीकेनंतर कृती सेनननेही सोशल मीडियावर आपली भूमिका स्पष्ट केली होती. तिने म्हटलं होतं की, सणाचं खरं महत्त्व एखाद्या महिलेने कोणते कपडे घातले आहेत यावर ठरत नाही, तर त्या परंपरा आणि त्यांच्या अर्थाविषयी तिच्या मनात असलेल्या भावनेवर ठरतं.
महिलांनी काय परिधान करावं, हे सांगणं कधी थांबवणार, असा सवालही कृतीने केला होता. “संस्कृती आणि परंपरा मनात असतात, गळ्याच्या नेकलाइनमध्ये नाहीत,” असा संदेश तिने दिला होता.
आता कंगनाचा जुना रक्षाबंधनाचा जाहिरात व्हिडीओ समोर आल्याने कृतीच्या जाहिरातीवरून सुरू झालेला वाद पुन्हा चर्चेत आला आहे. दरम्यान, कुनिका सदानंद यांच्या पोस्टमुळे या प्रकरणाला आणखी रंगत आली आहे.
