मंगळवार, 20 ऑक्टोबर 2026
फोटो सौजन्य सोशल मिडिया
जिल्ह्यातील टँकरद्वारे पाणीपुरवठ्याची सर्वाधिक गरज धाराशिव तालुक्यात असल्याचे चित्र आहे. तालुक्यातील पाच गावांना सात टँकरद्वारे पाणीपुरवठा केला जात आहे. यामध्ये कौडगाव (बावी), कजरखेडा आणि बोरखेडा येथे प्रत्येकी एक, पळसप येथे तीन, तर नांदुर्गा येथे एक टैंकर सुरू आहे. उमरगा तालुक्यातील नारंगवाडी येथे दोन, बलसूर येथे एक आणि आनंदनगर येथे एक, असे चार टैंकर सुरू आहेत, लोहारा तालुक्यातील सास्तूर येथे एका टैंकरद्वारे पाणीपुरवठा केला जात आहे. दरम्यान, तुळजापूर, कळंब, भूम, वाशी आणि परंडा या पाच तालुक्यांत सध्या टँकरद्वारे पाणीपुरवठा सुरू नसल्याचे अहवालात नमूद आहे.
Nagpur News : बाजारपेठा गजबजल्या, वाहतूक कोंडीने रस्ते गुदमरले! वाहनांच्या गर्दीत नागरिकांची कसरत
टँकरवरील अवलंबित्व कमी करण्यासोबतच स्थानिक जलस्रोतांचा वापर करून पिण्याच्या पाण्याची गरज भागविण्यावर प्रशासनाने भर दिला आहे. जिल्ह्यात एकूण 286 खासगी विहिरींचे अधिग्रहण करण्यात आले आहे. त्यापैकी नऊ विंधन विहिरी टँकरद्वारे पाणीपुरवठ्यासाठी, तर 277 विहिरी टँकरव्यतिरिक्त पाणीपुरवठ्यासाठी अधिग्रहित करण्यात आल्या आहेत. या विहिरींच्या माध्यमातून स्थानिक पातळीवर पाणी उपलब्ध करून देण्याचा प्रयत्न केला जात आहे. त्यामुळे पाणीटंचाईग्रस्त गावांतील नागरिकांना पिण्याच्या पाण्यासाठी पर्यायी व्यवस्था उपलब्ध होत आहे.
पाणीटंचाईच्या काळात ग्रामीण भागातील महिला, ज्येष्ठ नागरिक आणि लहान मुलांना पिण्याच्या पाण्यासाठी मोठी धावपळ करावी लागते. त्यामुळे गावांमध्ये नियमित पाणीपुरवठा होणे महत्त्वाचे ठरते. टँकरद्वारे पाण्याचे वितरण सुरळीत ठेवण्यासोबतच अधिग्रहित विहिरींमधून उपलब्ध होणाऱ्या पाण्याचा योग्य वापर करणे आवश्यक आहे.
