शुक्रवार, 14 ऑगस्ट 2026
फौजी चित्रपटाचा पहिला लुक समोर
देशप्रेमावर आधारित चित्रपट
देशप्रेम, शौर्य आणि मातृभूमीशी असलेली नाळ यांची प्रभावी झलक दाखवणाऱ्या ‘फौजी’ या आगामी मराठी चित्रपटाचा दमदार लुक नुकताच प्रेक्षकांसमोर आला आहे. देशाच्या सीमेवर लढणाऱ्या जवानांच्या धैर्याची, त्यागाची आणि भावविश्वाची अंगावर काटा आणणारी कहाणी मांडणाऱ्या या चित्रपटात दोन जवानांच्या आयुष्याचा प्रवास केंद्रस्थानी आहे. मातृभूमीच्या रक्षणासाठी स्वतःचे आयुष्य पणाला लावणाऱ्या या वीरांची देशसेवा, संघर्ष आणि भावनिक प्रवास ‘फौजी’मधून प्रभावीपणे उलगडणार आहे.
फौजीतून उलगडणार भावनिक प्रवास
सहनिर्मात्या स्वप्नजा विश्वनाथ नाथ म्हणाल्या, ‘देशासाठी स्वतःचा देह झिजवणाऱ्या त्या तमाम योद्ध्यांचे अश्रू, त्याग आणि त्यांच्या कुटुंबीयांची तगमग जेव्हा रुपेरी पडद्यावर साकारते, तेव्हा छाती अभिमानाने फुलून येते आणि डोळे नकळत पाणावतात. ‘फौजी’ हा केवळ चित्रपट नाही, तर मातृभूमीसाठी सर्वस्व अर्पण करणाऱ्या प्रत्येक जवानाच्या शौर्याला आणि त्यांच्या कुटुंबीयांच्या त्यागाला वाहिलेली भावपूर्ण मानवंदना आहे.
दिग्दर्शक ह.भ.प. घनशाम विष्णुपंत येडे म्हणाले की, सीमेवर बंदूक हातात घेऊन उभा असलेला जवान हा केवळ एक सैनिक नसतो, तर त्याच्या मागे त्याचे कुटुंब, नाती, स्वप्नं आणि मातृभूमीविषयीची अपार निष्ठा असते. हीच भावना प्रेक्षकांपर्यंत पोहोचवण्याचा प्रामाणिक प्रयत्न आम्ही ‘फौजी’च्या माध्यमातून केला आहे. ‘देशासाठी.. धर्मासाठी.. मातीसाठी’ ही केवळ चित्रपटाची टॅगलाईन नाही, तर या संपूर्ण कथेमागची भावना आहे.
Gia & Gauri New Webseries: रितिका श्रोत्रीचा नवा अंदाज; ‘जिया आणि गौरी’मध्ये साकारतेय दोन रंग
