रविवार, 1 नोव्हेंबर 2026
(फोटो सौजन्य-सोशल मीडिया)
Ram Charan-Sukumar RC17: दाक्षिणात्य चित्रपटसृष्टीतील सुपरहिट जोडी म्हणजे अभिनेता राम चरण आणि दिग्दर्शक सुकुमार. ‘रंगस्थलम’सारखा समीक्षकांची प्रशंसा मिळवणारा आणि बॉक्स ऑफिसवर यशस्वी ठरलेला चित्रपट दिल्यानंतर ही जोडी पुन्हा एकदा नव्या प्रोजेक्टसाठी एकत्र आली आहे. त्यांच्या आगामी पॅन-इंडिया चित्रपटाचा तात्पुरता टायटल ‘RC17’ असून, या चित्रपटाचा भव्य पूजा सोहळ्याने अधिकृत शुभारंभ करण्यात आला आहे.
मैत्री मूव्ही मेकर्स या प्रतिष्ठित बॅनरअंतर्गत या चित्रपटाची निर्मिती केली जात आहे. या घोषणेमुळे राम चरण आणि सुकुमार यांना पुन्हा एकदा एकत्र पाहण्यासाठी उत्सुक असलेल्या चाहत्यांचा आनंद द्विगुणित झाला आहे. चित्रपटाच्या शुभारंभाचे वृत्त समोर येताच सोशल मीडियावरही या प्रोजेक्टची चर्चा सुरू झाली आहे.
राम चरण आणि सुकुमार यांची जोडी यापूर्वी ‘रंगस्थलम’ या चित्रपटातून प्रेक्षकांच्या भेटीला आली होती. ग्रामीण पार्श्वभूमीवर आधारित या चित्रपटाला समीक्षकांसह प्रेक्षकांचीही पसंती मिळाली होती. चित्रपटातील राम चरण यांच्या अभिनयाचे विशेष कौतुक झाले होते. त्यामुळे आता ही जोडी पुन्हा एकत्र येत असल्याने ‘RC17’कडून मोठ्या अपेक्षा व्यक्त केल्या जात आहेत.
दिग्दर्शक सुकुमार यांनी ‘पुष्पा’ फ्रँचायझीच्या माध्यमातून जागतिक स्तरावर आपली वेगळी ओळख निर्माण केली आहे. तर राम चरण यांनी ‘RRR’च्या ऐतिहासिक यशानंतर आंतरराष्ट्रीय स्तरावरही लोकप्रियता मिळवली. अशा दोन दमदार नावांचा एकत्रित प्रोजेक्ट असल्याने ‘RC17’ हा सध्या चर्चेचा विषय ठरत आहे.
चित्रपटाचा पूजा सोहळा पार पडला असून, प्रोजेक्टच्या पूर्वतयारीचे कामही सुरू झाले आहे. मात्र, चित्रपटाच्या कथानकाबाबत आणि इतर कलाकारांबाबत अद्याप अधिकृत माहिती समोर आलेली नाही. सुकुमार यांची वेगळी कथाकथनशैली आणि राम चरण यांची दमदार पडद्यावरील उपस्थिती यामुळे या चित्रपटात काहीतरी भव्य पाहायला मिळेल, अशी चाहत्यांना अपेक्षा आहे.
‘RC17’च्या माध्यमातून ही सुपरहिट जोडी पुन्हा एकदा मोठ्या पडद्यावर कोणती जादू निर्माण करणार, याकडे आता सर्वांचे लक्ष लागले आहे.
