रविवार, 1 नोव्हेंबर 2026
( फोटो सौजन्य- सोशल मिडिया)
Samantha Ruth Prabhu: अभिनेत्री सामंथा रुथ प्रभू सध्या तिच्या आयुष्यातील खास टप्प्याचा आनंद घेत आहे. पती आणि दिग्दर्शक राज निदिमोरूसोबत ती आपल्या पहिल्या बाळाच्या स्वागतासाठी सज्ज असल्याचं सांगितलं जात आहे. दरम्यान, सामंथाने सोशल मीडियावर तिच्या पारंपरिक डोहाळे जेवणाच्या कार्यक्रमाचे काही सुंदर फोटो आणि व्हिडीओ शेअर केले आहेत. या झलक पाहिल्यानंतर चाहत्यांमध्येही उत्सुकता निर्माण झाली आहे.
सामंथाने तिच्या इन्स्टाग्राम अकाऊंटवर या खास सोहळ्यातील काही क्षण शेअर केले. यामध्ये पारंपरिक पद्धतीने करण्यात आलेल्या विविध धार्मिक विधींची झलक पाहायला मिळते. ‘कला आवरण’ (श्री कल्पम), अभिषेक आणि इतर विधी या सोहळ्यात पार पडले. या खास प्रसंगी सामंथा सरसोंच्या रंगाच्या अनारकली सूटमध्ये दिसली.
शेअर केलेल्या एका व्हिडीओमध्ये सामंथावर पवित्र जलाचा अभिषेक केला जात असून, त्याचवेळी मंत्रोच्चार सुरू असल्याचं दिसत आहे. आई आणि बाळाच्या आरोग्यासाठी व कल्याणासाठी हे विधी करण्यात आल्याचं सामंथाने सांगितलं आहे.
सोहळ्यादरम्यान सामंथाने आपला पोशाखही बदलला. यानंतर ती पिवळ्या रंगाच्या सिल्क साडीत दिसली. पारंपरिक दागिने आणि साध्या, मोहक अंदाजात सामंथाचा हा लूक चाहत्यांचं लक्ष वेधून घेत आहे.
या पारंपरिक सोहळ्याचं महत्त्व सांगताना सामंथाने म्हटलं की, ती नेहमीच भारतीय परंपरांचा आदर करत आली आहे. प्रत्येक विधीचा अर्थ आपल्याला माहीत असेलच असं नाही, मात्र जुन्या परंपरा, मंत्र आणि त्यांचे उच्चार यामागे खोल आध्यात्मिक अर्थ असल्याचा तिचा विश्वास आहे.
View this post on Instagram
सामंथाच्या म्हणण्यानुसार,ओटीभरणाच्या वेळी श्रीविद्या परंपरेतील एका पुजाऱ्याने तिला प्रत्येक विधीचा अर्थ समजावून सांगितला. त्यामुळे प्रत्येक मंत्र, अर्पण आणि विधीमागे एक विशिष्ट उद्देश असल्याचं तिला समजलं.
यातील ‘कला आवरण’ (श्री कल्पम) हा श्रीविद्या परंपरेतील विशेष विधी असल्याचं सामंथाने सांगितलं. या विधीमध्ये होणाऱ्या आईच्या सात चक्रांद्वारे देवीच्या ९४ कलांचा किंवा दैवी गुणांचा सन्मान केला जातो, अशी तिची माहिती आहे. पवित्र जल आणि मंत्रांच्या माध्यमातून होणाऱ्या आईच्या चक्रांचं शुद्धीकरण, ऊर्जावर्धन आणि आध्यात्मिक आशीर्वादासाठी हा विधी केला जातो.
या विधीची सर्वात खास गोष्ट म्हणजे होणाऱ्या आईला देवीचा दर्जा दिला जातो, असं सामंथाने सांगितलं. त्यामुळे तिच्यासाठी हा पारंपरिक सोहळा अत्यंत खास आणि आध्यात्मिक अनुभव ठरला.
सामंथाने शेअर केलेले हे फोटो आणि व्हिडीओ सध्या सोशल मीडियावर चर्चेत असून, चाहत्यांकडून तिच्या पारंपरिक लूकचं आणि या खास सोहळ्याचं कौतुक केलं जात आहे.
