सौजन्य - सोशल मिडीया
नवी दिल्ली : लोकसभा निवडणुकीनंतर आता भाजपमध्ये राष्ट्रीय अध्यक्ष निवडीला वेग आला आहे. त्यानुसार, येत्या 1 डिसेंबरपासून निवड प्रक्रिया सुरु केली जाणार आहे. के. लक्ष्मण यांची राष्ट्रीय निवडणूक अधिकारी म्हणून नियुक्ती केली आहे. केंद्रीयमंत्री जे. पी. नड्डा हे अध्यक्षपदी सध्या आहेत. मात्र, त्यांच्या पदाचा कार्यकाळ यापूर्वीच संपला आहे. त्यामुळे आता भाजपला नवा अध्यक्ष लवकरच मिळणार आहे.
भाजपाचे राष्ट्रीय सरचिटणीस अरुण सिंह यांनी जारी केलेल्या निवेदनात म्हटले आहे की, राज्यसभा सदस्य नरेश बन्सल, लोकसभा सदस्य संबित पात्रा आणि पक्षाच्या राष्ट्रीय उपाध्यक्षा रेखा वर्मा संघटनेच्या निवडणुकीसाठी राष्ट्रीय सहप्रभारी असतील. भाजपच्या सूत्रांचा हवाला देत प्रदेशाध्यक्षांच्या निवडीची प्रक्रिया 1 डिसेंबरपासून सुरू होणार असल्याचे सांगण्यात आले आहे. ही समिती राज्यस्तरावरून निवडणुकीला सुरुवात करणार आहे. या दरम्यान मंडळ, जिल्हा आणि नंतर प्रदेशाध्यक्ष निवडले जातील.
तसेच जिल्हाध्यक्ष व प्रदेश समितीच्या निवडणुकीनंतर प्रदेशाध्यक्ष व राष्ट्रीय समिती सदस्यांची निवड होणार आहे. प्रदेश समिती सदस्य प्रदेशाध्यक्षांची निवड करतील. त्याचबरोबर राष्ट्रीय समितीचे सदस्य राष्ट्रीय अध्यक्षाची निवड करतील.
के. लक्ष्मण ओबीसी मोर्चाचे अध्यक्ष
भाजपा अध्यक्ष जे. पी. नड्डा यांनी संघटना निवडणुकीसाठी या नियुक्त्यांना हिरवा कंदील दिला असून त्या तत्काळ लागू होतील. लक्ष्मण हे उत्तर प्रदेशातील पक्षाचे राज्यसभा सदस्य आणि पक्षाच्या ओबीसी मोर्चाचे अध्यक्ष आहेत. सध्या भाजपामध्ये सदस्यत्व मोहीम सुरू असून ती पूर्ण झाल्यानंतर नवीन अध्यक्ष निवडीची प्रक्रिया सुरू होणार आहे.
