शुक्रवार, 16 ऑक्टोबर 2026
माजी केंद्रीय मंत्री आणि द्रमुक पक्षाचे नेते ए. राजा यांनी वादग्रस्त विधान केले आहे. ए. राजा यांनी भारत माता व सनातन धर्माबाबत वादग्रस्त विधान केल्यामुळे त्यांच्यावर टीका केली जात आहे. यापूर्वी तमिळनाडूचे मुख्यमंत्री एम. के. स्टॅलिन यांचे पूत्र आणि राज्याचे क्रीडामंत्री उदयनिधी स्टॅलिन यांनी अनेकांच्या भावना दुखावतील असे विधान केले होते. त्यानंतर आता ए. राजा यांनी संतापजनक वक्तव्य केले असून भारत कधीच एक राष्ट्र नव्हतं. भारत एक राष्ट्र नव्हे तर हा एक उपखंड आहे. असे ए. राजा म्हणाले आहेत.
आम्ही सर्वजण रामाचे शत्रू आहोत
ए. राजा यांनी वादग्रस्त विधान करताना हनुमानाची वानराशी तुलना केली. तसेच ‘जय श्रीराम’ हा नारा घृणास्पद असल्याचं वक्तव्य केलं. ए. राजा म्हणाले, “तुम्ही (सनातनवादी, हिंदुत्ववादी) म्हणत असाल की, अमूक एक तुमचा देव आहे आणि तुम्ही इतरांना ‘भारत माता की जय’ बोलायला सांगत असाल तर आम्ही तुमचा ईश्वर मानत नाही. तसेच तुमच्या भारतमातेचा आम्ही स्वीकार करत नाही. त्यांना सांगा आम्ही सर्वजण रामाचे शत्रू आहोत. माझा रामायणावर आणि रामावर विश्वास नाही.” असे देखील ए. राजा म्हणाले आहेत.
भारत एक राष्ट्र नाही तर एक उपखंड
त्याचबरोबर भारत हा एक राष्ट्र कधीच नव्हता असे देखील ए. राजा म्हणाले. “भारत कधीच एक राष्ट्र नव्हतं. एका राष्ट्राचा अर्थ होतो, एक भाषा, एक परंपरा आणि एक संस्कृती. तेव्हा ते एक राष्ट्र असतं. परंतु, भारत एक राष्ट्र नाही. भारत एक उपखंड आहे. भारत हा एक उपखंड असल्याचं वाक्य रेटताना ए. राजा म्हणाले, इथे तमिळ हे एक राष्ट्र म्हणजेच एक देश आहे. मल्याळम एक भाषा, एक राष्ट्र, एक देश आहे. उडिया एक भाषा, एक राष्ट्र आणि एक देश आहे. अशी सगळी राष्ट्रं मिळून भारत हा मोठा उपखंड तयार होतो. त्यामुळे भारत हा देश नसून एक उपखंड आहे.” असे विधान ए. राजा यांनी केला आहे.
विविधतेत एकता असूनही आपल्यामध्ये मतभेद आहेत
“या उपखंडात वेगवेगळ्या भाषा, परंपरा आणि संस्कृती आहेत. तुम्ही तमिळनाडूला आलात तर तिथली वेगळी संस्कृती तुम्हाला पाहायला मिळेल. केरळमधील संस्कृती वेगळी आहे. दिल्लीत वेगळी संस्कृती आहे. ओडिशात वेगळी संस्कृती आहे. काश्मीरमध्ये एक वेगळी संस्कृती आहे, तुम्ही त्या संस्कृतींचा स्वीकार करा. मणिपूरमधील लोक श्वानाचं (कुत्रा) मांस खातात. तुम्ही ती गोष्टदेखील स्वीकारली पाहिजे. एखादा समाज गोमांस खात असेल तर त्यात तुम्हाला काही अडचण असण्याचं कारण नाही. त्या लोकांनी तुम्हाला गोमांस खायला सांगितलं आहे का? त्यामुळेच विविधतेत एकता असूनही आपल्यामध्ये मतभेद आहेत. परंतु, तुम्ही ते मतभेद स्वीकारले पाहिजेत,” असे ए. राजा म्हणाले आहेत.
