Indian Airlines : भारतात विमान प्रवासाचा वेग वाढणार! एअरलाईन्स आणखी 1,000 विमाने खरेदी करणार; पीयूष गोयल यांची मोठी माहिती, सौजन्य : आयएएनएस
Indian Airlines : भारतात हवाई प्रवासाची मागणी वेगाने वाढत असल्याने आगामी काळात भारतीय विमान कंपन्या आणखी सुमारे 1 हजार विमानांची खरेदी करू शकतात, अशी माहिती केंद्रीय वाणिज्य आणि उद्योगमंत्री पीयूष गोयल यांनी दिली. भारतीय विमान वाहतूक क्षेत्राचा वेगाने विस्तार होत असून सध्या विमान कंपन्यांनी दिलेल्या ऑर्डरही भविष्यातील गरजा पूर्ण करण्यासाठी पुरेशा ठरणार नसल्याचे त्यांनी स्पष्ट केले.
इजिप्त दौऱ्यादरम्यान पत्रकारांशी बोलताना पीयूष गोयल यांनी सांगितले की, इंडिगो, एअर इंडिया आणि अकासा एअर यांसारख्या भारतीय विमान कंपन्यांनी यापूर्वीच बोईंग आणि एअरबसकडे 1 हजार 200 हून अधिक विमानांची ऑर्डर दिली आहे. मात्र, देशातील विमान वाहतूक उद्योगाची एकूण गरज 2 हजारांहून अधिक विमानांची असल्याचा अंदाज आहे.
वाढती प्रवासी संख्या आणि नव्या मार्गांवरील उड्डाणांची गरज लक्षात घेता विमान कंपन्या विमान उत्पादकांकडे लवकर डिलिव्हरी देण्याची मागणी करत आहेत. विमानांचा ताफा वाढल्यास भारत आणि इजिप्त यांच्यातील हवाई संपर्कही अधिक मजबूत होईल. त्यामुळे दोन्ही देशांमधील व्यापार आणि पर्यटनाला चालना मिळण्याची शक्यता आहे.
विमान वाहतूक क्षेत्रात वेगाने विस्तार
विमान वाहतूक क्षेत्रातील सल्लागार संस्था ऑलिव्हर वायमनच्या 2026 च्या अहवालानुसार, भारतातील व्यावसायिक विमानांचा ताफा 2026 ते 2036 या काळात सरासरी वार्षिक 7.1 टक्के दराने वाढू शकतो. जागतिक विमान वाहतूक बाजारपेठेतील ही सर्वाधिक वेगवान संभाव्य वाढींपैकी एक आहे.
नागरी विमान वाहतूक मंत्रालयाच्या आकडेवारीनुसार, भारतीय विमान कंपन्यांनी दिलेल्या अनेक मोठ्या ऑर्डरमधील विमानांची डिलिव्हरी अद्याप बाकी आहे. काही विमानांचा पुरवठा 2034 पर्यंत टप्प्याटप्प्याने होण्याची शक्यता आहे. जगभरातील विमान कंपन्यांकडून मोठ्या प्रमाणात ऑर्डर दिल्या जात असल्याने विमान उत्पादक कंपन्यांकडे मोठी प्रलंबित मागणी आहे. त्यात इंजिन आणि अन्य महत्त्वाच्या सुट्या भागांच्या कमतरतेमुळेही विमानांच्या उत्पादन आणि वितरणावर परिणाम होत आहे.
या आव्हानांवर मात करण्यासाठी केंद्र सरकार विमान लीजिंग क्षेत्राला अधिक आर्थिक पाठबळ देण्याचा विचार करत आहे. यामध्ये बँकांकडून अधिक कर्ज उपलब्ध करून देणे, रुपयातील वित्तपुरवठ्याला प्रोत्साहन देणे आणि विमान लीजिंगसाठी नियामक प्रक्रिया सुलभ करणे यांचा समावेश आहे.
नागरी विमान वाहतूक मंत्रालयाच्या माहितीनुसार, सध्या भारतीय विमान कंपन्यांच्या ताफ्यातील 85 टक्क्यांहून अधिक विमाने भाडेतत्त्वावर घेतलेली आहेत. त्यामुळे देशांतर्गत विमान लीजिंग व्यवस्था मजबूत करणे आणि आर्थिक स्रोत सहज उपलब्ध करून देणे महत्त्वाचे ठरणार आहे.
सध्या बहुतांश विमान लीजिंग करार आयर्लंड आणि सिंगापूरसारख्या आंतरराष्ट्रीय केंद्रांमधून केले जातात. त्यामुळे भारताला दरवर्षी विमान भाड्यापोटी मोठ्या प्रमाणात परकीय चलन खर्च करावे लागते. ही परिस्थिती बदलण्यासाठी सरकार गुजरातमधील गिफ्ट सिटीला देशांतर्गत विमान लीजिंग आणि वित्तीय केंद्र म्हणून विकसित करण्यावर भर देत आहे.
Ans: हवाई प्रवासाची वाढती मागणी लक्षात घेता भारतीय विमान कंपन्या आगामी काळात आणखी सुमारे 1 हजार विमानांची ऑर्डर देऊ शकतात, असे पीयूष गोयल यांनी सांगितले.
Ans: इंडिगो, एअर इंडिया आणि अकासा एअर यांसारख्या कंपन्यांनी बोईंग आणि एअरबसकडे 1 हजार 200 हून अधिक विमानांची ऑर्डर दिली आहे.
Ans: बँकांकडून अधिक कर्ज उपलब्ध करून देणे, रुपयातील वित्तपुरवठ्याला प्रोत्साहन देणे आणि नियामक प्रक्रिया सुलभ करणे यांसारख्या उपायांवर सरकार विचार करत आहे.






