चेन्नई : तामिळनाडूच्या पद्मराजन यांनी तब्बल 238 वेळा निवडणुकीत पराभव झाल्यानंतरही पुन्हा एकदा लोकसभा निवडणूक लढवण्याची तयारी सुरू केली आहे. 65 वर्षीय पद्मराजन हे एका टायर रिपेअर शॉपचे मालक आहेत. त्यांनी 1988 मध्ये तामिळनाडूमधील मेत्तूर येथून निवडणूक लढवण्यास सुरुवात केली.
जेव्हा त्यांनी निवडणूक लढवणार असल्याचं सांगितले तेव्हा लोक त्यांची खिल्ली उडवायचे. पण एक सामान्य माणूसही निवडणुकीत भाग घेऊ शकतो, हे त्यांना सर्वांना दाखवून द्यायचे होते. ‘इलेक्शन किंग’ म्हणून प्रसिद्ध असलेले पद्मराजन यांनी देशभरात झालेल्या राष्ट्रपतिपदापासून ते स्थानिक निवडणुकांमध्ये भाग घेतला आहे.
पद्मराजन म्हणाले की, सर्व उमेदवारांना फक्त निवडणुकीत जिंकायचे असते पण माझ्याबाबतीत तसे नाही. केवळ निवडणुकीत भाग घेतल्याने मला आनंद होतो आणि आपण जिंकलो किंवा हरलो याने काही फरक पडत नाही. पराभूत होऊनही आनंदी आहे. ते आताही तामिळनाडूच्या धर्मपुरी जिल्ह्यातून निवडणूक लढवत आहेत. ‘लिम्का बुक ऑफ रेकॉर्ड’मध्ये स्थान जिंकणं ही दुसरी गोष्ट आहे.
जिंकलो तर आश्चर्यच वाटेल
मला एकाही मताची आशा नव्हती. पण तरीही लोकांनी माझ्यासाठी मतदान केले. लोकं आपला उमेदवारी अर्ज दाखल करताना संकोच करतात, म्हणूनच मला त्यांच्यामध्ये जागरूकता निर्माण करण्यासाठी एक रोल मॉडल बनायचे आहे. मी शेवटच्या श्वासापर्यंत निवडणूक लढवत राहीन पण कोणतीही निवडणूक जिंकलो तर मलाच आश्चर्य वाटेल.
