शुक्रवार, 25 सप्टेंबर 2026
मनसे अध्यक्ष राज ठाकरेंची मोठी घोषणा; आता ईव्हीएमविरोधात करणार जनआंदोलन
मुंबई : निवडणूक आयोगाच्या कारभाराबद्दल मी आणि माझा पक्ष गेल्या अनेक दिवसांपासून जे सांगत होतो ते आता स्पष्टपणे समोर आले आहे. आयोगाला हाताला धरून एसआयआर आणि मतदारयाद्या यात घोटाळे करून भाजपने निवडणुका कशा जिंकल्या हे आता दिसलेच आहे. मुख्य निवडणूक आयुक्तांचा राजीनामा हा तर व्हायलाच हवा, पण या असल्या कणाहीन निवडणूक आयोगाला हाताशी धरून जे सरकार निवडून आले त्या सरकारने राजीनामा द्यायला हवा, अशी मागणी मनसे अध्यक्ष राज ठाकरे यांनी केली आहे.
राज ठाकरे यांनी आता सर्व विरोधी पक्षांनी एकत्र येऊन निवडणूक आयोगाच्या कार्यपद्धतीविरोधात लढा उभारण्याचे आवाहन केले आहे. पहिली लढाई निवडणूक आयोगाच्या कारभाराविरोधात आहे. त्यानंतर ईव्हीएमविरोधातील लढा उभा करावा. ईव्हीएमऐवजी बॅलेट पेपरवर निवडणुका व्हाव्यात, यासाठी विरोधी पक्षांनी जनआंदोलन उभारले पाहिजे, असे ठाकरे यांनी म्हटले. यापुढची लढाई ईव्हीएम विरोधातील असेल असेही ते सोशल मीडिया पोस्टमध्ये म्हणाले आहेत.
दरम्यान, २०२५ च्या अखेरीस महापालिका निवडणुकांच्या आधी महाराष्ट्रातील विरोधी पक्षांचे नेते राज्याच्या मुख्य निवडणूक आयुक्तांना आणि त्यांच्या सहकाऱ्यांना भेटत होते. त्यावेळी या अधिकाऱ्यांकडे प्रत्यक्षात कोणतेच अधिकार नसल्याचे आम्हाला जाणवत होते. आम्ही हे जाहीरपणे अनेकदा बोललो. दोन निवडणूक आयुक्तांनी वारंवार आक्षेप नोंदवले आणि तरीही आयोगाने आपली प्रक्रिया सुरू ठेवली. त्यामुळे मुख्य निवडणूक आयुक्त ज्ञानेश कुमार निर्णय घेत होते असे चित्र दिसते. मात्र, त्यांना हे निर्णय घ्यायला लावणारे कोण होते, याची चौकशी झाली पाहिजे, असे ठाकरे यांनी म्हटले.
ज्ञानेश कुमारांनी राजीनामा द्यावा
मुख्य निवडणूक आयुक्त ज्ञानेश कुमार यांनी राजीनामा द्यावा. तसेच त्यांच्या निर्णयांमागे कोण होते, याची चौकशी झाली पाहिजे अशी मागणी ठाकरे यांनी केली. निवडणूक आयोगाच्या स्वायत्ततेचा मुद्दा उपस्थित करताना ठाकरे यांनी केंद्रातील सत्ताधारी सरकारवरही निशाणा साधला. “कणाहीन निवडणूक आयोगाला हाताशी धरून सरकार निवडून आले असेल तर त्या सरकारनेही राजीनामा द्यावा”, अशी मागणी त्यांनी केली.
मते कोण चोरते, याचे उत्तर मिळाले
भाजपधार्जिणे पत्रकार नेहमी विचारतात की तुमच्या सभेला गर्दी होते, मग मते कुठे जातात? आता त्यांना आमची मते कोण चोरतं आणि त्यांना कशी आणि कोणाची मदत मिळते, याचे उत्तर मिळाले असेल असा टोला राज ठाकरे यांनी लगावला.
