ठाकरे गटाची आव्हानयाचिका नसतानाही आमदार अपात्रतेवर सर्वोच्च न्यायालयात उद्या सुनावणी; जाणून घ्या नेमकं प्रकरण काय?

शिवसेना आमदार अपात्रता प्रकरणावर विधानसभा अध्यक्ष राहुल नार्वेकर (Rahul Narvekar) यांनी निकाल दिल्यानंतर आता मंगळवारी (दि.16) या प्रकरणी सुप्रीम कोर्टात सुनावणी होणार आहे.

नवी दिल्ली : शिवसेना आमदार अपात्रता प्रकरणावर विधानसभा अध्यक्ष राहुल नार्वेकर (Rahul Narvekar) यांनी निकाल दिल्यानंतर आता मंगळवारी (दि.16) या प्रकरणी सुप्रीम कोर्टात सुनावणी होणार आहे. शिवसेना ठाकरे गट आणि राष्ट्रवादी शरद पवार गट यांनी या प्रकरणात दाखल केलेल्या याचिका कोर्टाने एकत्रित केल्या होत्या. त्यावर न्यायालयात सुरु असलेल्या सुनावणीचाच हा भाग आहे.

ठाकरे गटाची आव्हानयाचिका नाही

नार्वेकर यांनी कोणालाही अपात्र न करता शिवसेना हा पक्ष शिंदेंना दिला. त्यानंतर ठाकरे गटाने सर्वोच्च न्यायालयात जाण्याची भूमिका जाहीर केली. परंतु अद्याप नार्वेकरांच्या निकालाला आव्हान देणारी याचिका ठाकरे गटाकडून न्यायालयात दाखल झालेली नाही. त्यामुळे 16 जानेवारी रोजी सुनावणी झाली तर ही सुनावणी शिवसेना आणि राष्ट्रवादी यांची एकत्रित आमदार अपात्रतेच्या प्रकरणावर होईल.

शरद पवार गटाची धाकधूक वाढली

नार्वेकरांनी शिवसेनेबाबत निर्णय देताना पक्ष संघटनेपेक्षा विधिमंडळातील बहुमताचा विचार केला. त्यामुळे राष्ट्रवादीच्या शरद पवार गटाची धाकधूकही वाढली आहे. कारण विधिमंडळातील बहुमत सध्या अजित पवार गटाकडे आहे. राष्ट्रवादीच्या पक्ष आणि चिन्हावर अजित पवारांनी दावा केला असून हा वाद निवडणूक आयोगात पोहोचला आहे.

आता व्हीपचे दडपण

नार्वेकर यांनी शिंदे गटाच्या भरत गोगावले यांचा व्हीप अधिकृत ठरविल्याने ठाकरे गटाला मोठा धक्का बसला आहे.

अध्यक्षांच्या कामकाजाचा कोर्टाकडून आढावा

शरद पवार गटाचे आमदार जयंत पाटील यांनी अजित पवार यांच्यासोबत गेलेल्या आमदारांवर अपात्रतेची कारवाई करण्याचे अध्यक्षांना निर्देश देण्यासंदर्भात याचिका दाखल केली होती. त्यावरून सुप्रीम कोर्टाकडून अध्यक्षांच्या कामकाजाचा कोर्टाकडून आढावा घेतला जाण्याची शक्यता आहे.