देशात लोकसभा निवडणूक होणार सात टप्प्यांमध्ये; तारखांची घोषणा 9 मार्चनंतर होण्याची शक्यता

2024 च्या लोकसभा निवडणुकांकडे सर्वांचेच लक्ष लागले असतानाच केंद्रीय निवडणूक आयोग मार्चच्या दुसऱ्या आठवड्यात तारखा जाहीर करण्याची शक्यता आहे. तत्पूर्वी आयोगाला आधी जम्मू-काश्मीरमधील सुरक्षा व्यवस्थेची स्थिती जाणून घ्यायची आहे, असे सूत्रांनी सांगितले.

नवी दिल्ली : 2024 च्या लोकसभा निवडणुकांकडे सर्वांचेच लक्ष लागले असतानाच केंद्रीय निवडणूक आयोग मार्चच्या दुसऱ्या आठवड्यात तारखा जाहीर करण्याची शक्यता आहे. तत्पूर्वी आयोगाला आधी जम्मू-काश्मीरमधील सुरक्षा व्यवस्थेची स्थिती जाणून घ्यायची आहे, असे सूत्रांनी सांगितले. देशात सार्वत्रिक लोकसभा निवडणूक एप्रिल-मेमध्ये होण्याची शक्यता आहे. आयोग 9 मार्चनंतर तारखा जाहीर करण्याची शक्यता असल्याचेदेखील सूत्राने सांगितले.

सध्या निवडणूक अधिकारी राज्यांना भेटी देऊन माहिती गोळा करत आहेत. अहवालानुसार, 2024 ची निवडणूक 2019 सारखीच असू शकते, असेही संकेत आहेत. 2019 मध्ये लोकसभेच्या 543 जागांसाठी सात टप्प्यांत निवडणुका झाल्या. आयोगाने 10 मार्च रोजी निवडणुकीच्या तारखा जाहीर केल्या होत्या. त्यावेळी निवडणूक आयोगाने जाहीर केलेल्या कार्यक्रमानुसार पहिल्या टप्यातील मतदान 11 एप्रिल रोजी झाले.

दुसऱ्या टप्प्यात 18 एप्रिल, तिसऱ्या टप्प्यात 23 एप्रिल, चौथ्या टप्प्यात 29 एप्रिल, पाचव्या टप्प्यात 6 मे, त्यानंतर 12 मे आणि शेवटच्या टप्प्यात 19 मे रोजी मतदान झाले होते. आयोगाने 23 मे रोजी निकाल जाहीर केला होता, ज्यामध्ये भाजपाला पूर्ण बहुमत मिळाले होते. लोकसभेसोबतच अरुणाचल प्रदेश, आंध्र प्रदेश, सिक्कीम आणि ओडिशामध्ये विधानसभेच्या निवडणुकाही झाल्या.